تساو حۋا جانە دجانگ گۋي تسان 10 بالاعا وتا جاسادى

وبلىس ورتالىعىنداعى كار­ديوحيرۋرگيالىق ورتالىققا بۇل جولى قىتايدىڭ كارديوحيرۋرگ ماماندارى كەلدى. بۇعان دەيىن «ۇلتتىق مەديتسينالىق حولدينگ» اق-تىڭ وبلىستاعى كۇندەرى شەڭ­بەرىندە وڭىرگە «ۇلتتىق عىلىمي كارديوحيرۋرگيالىق ورتالىق» اق ديرەكتورلار كەڭەسىنىڭ توراعاسى قادىر وماروۆ, «ۇلتتىق عىلىمي-كارديوحيرۋرگيالىق ورتالىق» اق باسقارماسىنىڭ توراعاسى, يۋري پيا باستاعان 30-عا جۋىق كارديوحيرۋرگتەر كەلىپ, جۇرەككە كۇردەلى وتالار جاساعان ەدى. سونداي-اق, ءبىلىم بەرۋ سەمينارلارىن وتكىزىپ, شەبەرلىك ساباقتارىن جۇرگىزدى. وبلىستىق اكىمدىك پەن ۇلتتىق مەديتسينالىق حولدينگ اراسىندا ارىپتەستىك تۋرالى مەموراندۋمعا قول دا قويىلدى. قازىر وبلىستا كارديولوگيالىق كلاستەردى قۇرۋ بويىنشا باعدارلاما ازىرلەنۋدە. وزىق تەحنولوگيالاردىڭ ءتىلىن بىلەتىن ءوز ماماندارىمىزدى دايار­لاۋ قاجەتتىگى تۋدى. جەرگىلىكتى كارديوحيرۋرگتەر رەسەي, بەلارۋس, يزرايل, يۋگوسلاۆيا ەلدەرىندە تاجىريبەلەرىن شىڭداپ, بىلىكتىلىكتەرىن جەتىلدىرىپ كەلىپتى. ولاردىڭ بەسەۋى – «بولاشاق» باعدارلاماسىنىڭ تۇلەكتەرى. ماسكەۋدەگى ا.باكۋلەۆ اتىنداعى جۇرەك-قان تامىرى حيرۋرگياسى ورتالىعىندا تاجىريبەدەن ءوت­كەن داۋرەن جاقىپباەۆ تا بار. ال, حولدينگ كۇندەرى اياسىندا ەلى­مىزدىڭ باس كارديوحيرۋرگى يۋري پيا 12 جاستاعى اناستاسيا كازاك­وۆاعا وتا جاساعان بولاتىن. جالپى, اشىلعالى بەرگى 2-3 جىلدىڭ ىشىندە وڭىرلىك كارديو­حيرۋرگيالىق ورتالىقتا 2435 ادامنىڭ جۇرەگىنە وتا جاسالىپتى. بارلىق بولىمشەلەرى زەرتحانالار, دياگنوستيكالىق زەرتتەۋلەر سوڭعى ۇلگىدەگى مەديتسينالىق قۇرال-جابدىقتارمەن جاراق­تال­عان. ەڭ باستىسى, كارديو­حي­رۋرگيالىق ورتالىق ۇجىمى – جاس دارىگەرلەر, ياعني ولاردىڭ ورتاشا جاسى 28 جاستى قۇرايدى. وبلىسقا جۇمىس ساپارىمەن كەلگەندە ەلباسى جاس كارديوحيرۋرگ دارىگەرلەرمەن جۇزدەسكەن بولاتىن. مامانداردىڭ بار­لى­عى ليتۆا, يزرايل, رەسەي, بەلا­رۋس جانە ەلىمىزدىڭ جەتەك­شى كارديوحيرۋرگيالىق ورتالىق­تارىندا بىلىمدەرىن جەتىل­دىرىپ قايتتى. پاۆلودارعا كەلىپ, مينس­كىلىك پروفەسسور, يۋ.وستروۆسكي, ليتۆالىق پروفەسسورلار شەبەرلىك سىنىپتارىن وتكىزدى. شەبەرلىك-ساباقتار شەڭبەرىندە 92 ادامعا جۇرەككە, سونىڭ ىشىندە 25 بالاعا وتا جاسالدى. ءبارى ساتىمەن بولدى. مەديتسينالىق ورتا بۋىن وكىلدەرى دە ءيزرايلدىڭ رەحوۆوت قالاسىنداعى «كاپلان» اۋرۋحاناسى جانىنداعى مەدبيكەلەر مەكتەبىندە بولىپ, تاجىريبە الماستى. ياعني, يننوۆاتسيا اۋرۋ­حانالارعا كەلدى. ەندى مىنە, شەبەرلىك سىنىپتارى قايتا جالعاستى. قىتايلىق بىلىكتى ماماندار شەبەرلىك سىنىپتارىن وتكىزدى. كارديوحيرۋرگيالىق ورتالىق ديرەكتورىنىڭ مىندەتىن اتقارۋشى وراز مۇقاشەۆتىڭ ايتۋىنشا, جەرگىلىكتى كارديوحيرۋرگتەر پروفەسسور تساو حۋا جانە فۋدجوۋ قالاسى مەديتسينا ۋنيۆەرسيتەتىنىڭ پروفەسسورى دجانگ گۋي تساننىڭ قاتىسۋىمەن بولعان جۇرەككە جاسالعان وتالار بارىسىندا شەبەرلىك سىنىپتارىنا قاتىسىپتى. ءبىزدىڭ وڭىرگە كەلگەن قىتايلىق ماماندار تۋا بىتكەن جانە كىشكەنتايلارىنان جۇرەك اقاۋلارى بار 1 جاستان 11 جاسقا دەيىنگى بالالارعا وتا جاسادى. فاريدا بىقاي, «ەگەمەن قازاقستان». پاۆلودار.