شىمكەنت. 26 ءساۋىر. تۇركىستانداعى 118216 سايلاۋشى قالاعا قاراستى 12 اۋىلداعى 36 جانە شاھاردىڭ وزىندەگى 37 سايلاۋ ۋچاسكەلەرىنە بارىپ تاڭداۋلارىن جاسادى. بۇل تۋرالى egemen.kz ءتىلشىسى حابارلادى.
تۇركىستان وڭىرىندەگى رەسپۋبليكاعا ايگىلى وتباسىلاردىڭ ءبىرى – وتكەن جىلى «مەرەيلى وتباسى» ۇلتتىق كونكۋرسىنىڭ جەڭىمپازى اتانعان بيماحانبەتوۆتەر اۋلەتى. وتاعاسى ەلتاي اتامىز 83 جاستا. قوساعى ەلەنا اجەمىز ەكەۋى 8 بالا, 33 نەمەرە, 15 شوبەرە ءوسىرىپ, وركەن جايعان الىپ بايتەرەككە اينالعان.
ءوز ومىرىندە 68-ءشى رەت سايلاۋعا كەلىپ وتىرعان اقساقالدىڭ كوڭىل كۇيى جاقسى, رۋحى اسقاق. «مەنىڭ ەكى نەمەرەم, ەكى شوبەرەم كامەلەتتىك جاسقا تولىپ, العاش رەت داۋىس بەردى. وتباسىمىزبەن اقىلداسىپ, كىمگە داۋىس بەرەتىنىمىزدى شەشكەنبىز. ايتسە دە, ەشكىمنىڭ تاڭداۋىنا قارسى بولمايمىن. ويتكەنى, ول ونىڭ كونستيتۋتسيالىق قۇقىعى. قاي ۇمىتكەرگە داۋىس بەرسە دە قازاقستاننىڭ بولاشاعى ءۇشىن جاۋاپتى بولاتىن, حالىقتىڭ ىرىسىن تاسىتاتىن, ەلگە بەيبىتشىلىك پەن تاتۋلىق, بىرلىك اكەلۋگە مۇمكىندىگى مول ازاماتقا داۋىس بەرەرىنە سەنەمىن. قۋانىپ تۇرىپ ايتارىم, وسى سايلاۋدا ءبىزدىڭ اۋلەتتەن 51 ادام داۋىس بەرىپ جاتىر», – دەدى «مەرەيلى وتباسى» بايقاۋىنىڭ جەڭىمپازى.
ۇلكەن اۋلەتتىڭ سايالى بايتەرەگىنە اينالعان اقساقالدىڭ قۋانىشى بۇل عانا ەمەس ەكەن. سايلاۋ كۇنى اۋلەتكە تاعى ءبىر شاقالاق كەلدى, قىز بالا الەمنىڭ جارىق ەسىگىن اشتى.
ەندى ەلتاي اعامىزدىڭ 34 نەمەرەسى بار.
وسىلايشا, «مەرەيلى وتباسى» ۇلتتىق بايقاۋىندا جۇزدەن جۇيرىك, مىڭنان تۇلپار شىققان بيماحانبەتوۆتەر اۋلەتى ءبىر كۇندە ەكى بىردەي قۋانىشقا يە بولىپ وتىر.
باقتيار تايجان.
دەرەك, سۋرەت: egemen.kz.
