مۇنداي كاسىپ يەلەرىنىڭ ءبىرى – ەگىن شارۋاشىلىعىنا بەيىمدەلگەن شارۋا قوجالىعىنىڭ يەسى جاقسىلىق يبادۋللاەۆ. قۇرىق اۋلىنا قاراستى قىزىلقۇم جەرىندە جاساعان جانكەشتى ەڭبەگىنىڭ ناتيجەسىندە جىلىجاي كاسىبىن ورىستەتىپ, باۋ-باقشا ءوسىرۋدى جولعا قويدى. قازىر 35 گەكتار القاپتىڭ 6 گەكتارىنا جەمىس اعاشتارىن وتىرعىزىپ, 3 گەكتار جەر اۋماعىندا جىلىجاي كاسىبىن جۇرگىزىپ كەلەدى.
«2005 جىلى 25 گەكتارعا جۋىق جەر الىپ, كەيىن 10 گەكتار جەردى قوسىپ, ەڭبەكتەنىپ كەلەمىن. باۋ-باقشانىڭ كۇتىمى وڭاي شارۋا ەمەس. ەگىن القابىن جەراستى سۋىمەن سۋارامىز. ونىمەن قوسا جەمىس اعاشتارى ەرەكشە كۇتىم ناتيجەسىندە جىل سايىن ءونىم بەرەدى. ونى اقتاۋ قالاسىنداعى بازارلارعا جانە قۇرىق اۋلىنا تاسىمالدايمىز. كۇنىنە 700 كيلو ورىك پەن المانى ساتىلىمعا شىعارامىز. بۇل كاسىبىم مەن ءۇشىن اسا قىمبات.تاباندى ەڭبەكتىڭ ناتيجەسى جانىڭا كەرەمەت سەزىم سىيلايدى», دەيدى «رىسبەك» شارۋا قوجالىعىنىڭ جەتەكشىسى جاقسىلىق يبادۋللاەۆ.
ەڭبەك قادىرىن بىلەتىن شارۋا قوجالىعىندا ىسىراپقا جول بەرىلمەيدى. ارتىلعان نەمەسە مەرزىمى ءوتىپ كەتكەن جەمىستەردەن ارنايى «كەپتىرىلگەن ءونىم» دايىندالادى.
«بۇل شارۋاشىلىق – جاقسىلىق اعامىزدىڭ اق ادال ەڭبەگىنىڭ جەمىسى. ودان بولەك, مال ازىعى دا قوسا دايىندالادى. جۇمىسشى سانى تاپشى بولعاندىقتان, جۇمىس كوزىنە جاستاردى ءجيى تارتامىز. الداعى ۋاقىتتا كومەككە قوعامدىق جۇمىسكەرلەر تارتىلادى. ءوز تاراپىمىزدان ارنايى قولداۋ كورسەتىپ كەلەمىز. قازىر اۋدان اۋماعىندا 665 شارۋا قوجالىعى بار. ونىڭ ىشىندە 41-ءى ەگىن شارۋاشىلىعىمەن اينالىسادى», دەيدى قاراقيا اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى ءسابيت قۇسايىنوۆ.
ماڭعىستاۋ وبلىسى
