كوكشەتاۋ. 26 ءساۋىر. اقمولا وبلىسىندا سايلاۋ بەلسەندى ءوتىپ جاتىر. بۇل تۋرالى egemen.kz ءتىلشىسى حابارلادى.
وبلىستىق سايلاۋ كوميسسياسىنىڭ توراعاسى ءادىلحان شاياحمەتوۆپەن تىلدەسكەنىمىزدە وڭىردە قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى كونستيتۋتسيالىق زاڭعا سايكەس وتكىزىلىپ جاتقانى ايتىلدى. بارلىق 20 اۋماقتىق جانە 808 ۋچاسكەلىك سايلاۋ كوميسسياسى ساياسي ناۋقاندى جوعارى ۇيىمداستىرۋشىلىق ەكپىنمەن باستادى. وبلىستا 462208 ادام داۋىس بەرۋشىلەر تىزىمىنە تىركەلگەن.
سايلاۋ كۇنگى ساعات 14.00-دەگى مالىمەت بويىنشا 355794 ادام جەرگىلىكتى سايلاۋ ۋچاسكەلەرىندە داۋىس بەردى. بۇل جالپى كورسەتكىشتىڭ 76,97 پايىزىن قۇرايدى. ءادىلحان شاياحمەتوۆتىڭ ايتۋىنشا, جۇرتشىلىقتىڭ بەلسەندىلىگى بۇرناعى جىلدارعا قاراعاندا اناعۇرلىم جوعارى.
مۇنى گازەت قوسىنىنا ءتۇسىپ جاتقان حابارلار ايقىنداي تۇسۋدە. ەسىل, اتباسار, ەرەيمەنتاۋ, تسەلينوگراد جانە باسقا اۋداندار وبلىستىڭ ورتا كورسەتكىشىنەن جوعارى مالىمەت بەرۋدە. جەكە مەكەمەلەردەگى بەلسەندىلىك تە كوڭىل وسىرەدى. ماسەلەن, وبلىستىق ىشكى ىستەر دەپارتامەنتىنىڭ باستىعى, پوليتسيا گەنەرال-مايورى جايلاۋبەك حالىق ۇلىمەن سويلەسكەنىمىزدە ول: «بۇگىن 3124 اقمولالىق پوليتسيا قىزمەتكەرى مەن ولاردىڭ وتباسىنداعى 2229 ادام داۋىس بەرۋگە قاتىسۋدا. قازىرگى كورسەتكىشىمىز 90 پايىزعا جاقىندادى»,-دەدى.
وبلىستا سايلاۋدىڭ وتكىزىلۋىن 30 حالىقارالىق بايقاۋشى قاداعالاۋدا.ولاردىڭ جۇمىسىنا سەرگەي كيباسوۆ جەتەكشىلىك ەتەتىن ارنايى ورتالىق كومەك-قولداۋ كورسەتۋدە. سونداي-اق, «سايلاۋدىڭ وتكىزىلۋىن باقىلاۋ جونىندەگى رەسپۋبليكالىق قوعامدىق كوميسسيا» جۇمىس ىستەۋدە. ءبىز سايلاۋ ۋچاسكەلەرىندە, وبلىستىق سايلاي كوميسسياسىندا بايقاۋشىلارمەن وتكىزىلگەن بريفينگتەرگە قاتىستىق. بايقاۋشىلار تاراپىنان سايلاۋعا قاتىستى ەسكەرتپەلەر تۇسكەن جوق.
ەل ازاماتتارى پرەزيدەنت سايلاۋىنىڭ مەملەكەتتىك ماڭىزداعى شارا ەكەندىگىن, ول كوپ ۇلتتى حالقىمىزدى بىرىكتىرە تۇسەتىنىن جانە تاۋەلسىز رەسپۋبليكامىزدىڭ بولاشاعىنا ايقىندايتىنىن پاش ەتۋدە. بۇل وبلىس تۇرعىندارىنىڭ ازاماتتىق بەلسەندىلىگىنىڭ ارتۋىنان, سايلاۋعا يگى ۇمىتتەر جەتەگىمەن كەلگەندىگىنەن بايقالىپ تۇردى.
وبلىستىق سايلاۋ كوميسسياسى ءار ەكى ساعات سايىن جەر-جەردەن مالىمەتتەر جيناۋدا. كورسەتكىش ارتا تۇسەتىنىنە سەنىم نىق.
باقبەرگەن امالبەك.
دەرەك, سۋرەت: egemen.kz
