وڭتۇستىك قازاقستان وبلىسىندا سايلاۋشىلار بەلسەندىلىك تانىتۋدا

شىمكەنت. 26 ءساۋىر. وڭتۇستىك قازاقستان وبلىستىق سايلاۋ كوميسسياسىنىڭ توراعاسى الىبەك ومىراليەۆ وبلىستاعى 1255 مىڭ 634 سايلاۋشىنىڭ ساعات 10:00-گە دەيىن 174 مىڭ 931-ءى داۋىس بەرگەنىن مالىمدەدى. بۇل تۋرالى egemen.kz ءتىلشىسى حابارلادى. جاۋىن قۇيىپ تۇرعانىنا قاراماستان 1029 سايلاۋ ۋچاسكەلەرىندە قىزۋ جۇمىس ءجۇرىپ جاتىر. ەقىۇ تاراپىنان 2 باقىلاۋشى 1 ساۋىردەن باستاپ ۇزاق مەرزىمدى باقىلاۋشى رەتىندە قىزمەتىن اتقارۋدا. 24 ءساۋىر كۇنى ەقىۇ-دان 18 باقىلاۋشى كەلگەن. شانحاي ىنتىماقتاستىق ۇيىمىنان 18 باقىلاۋشى جۇمىس جاساۋدا. ال تمد-ەلدەرىنەن 19 باقىلاۋشى كەلگەن ەكەن. ولاردىڭ بارلىعى اۋدان, قالالارداعى سايلاۋ ۋچاسكەلەرىن ارالاپ ءجۇر. ءا.ومىراليەۆ سايلاۋدىڭ قالىپتى ءوتىپ جاتقانىن, سايلاۋ ۋچاسكەلەرىنىڭ توراعالارى مەن حاتشىلىق قۇرامى بۇگىنگە دەيىن ءتۇرلى سەمينارلاردان وتكەنىن, سايلاۋ زاڭدىلىقتارىن ساقتاۋعا ءبىلىم-بىلىگى جەتەتىنىن, شارانىڭ تالاپقا ساي وتۋىنە مۇددەلى ەكەنىن ايتادى. بارلىق سايلاۋ ۋچاسكەلەرىنىڭ ماتەريالدىق-تەحنيكالىق بازاسى كوڭىلدەگىدەي. سايلاۋشىعا داۋىس بەرۋگە بارىنشا جاعداي جاسالىنعان. سايلاۋدى باقىلاۋ قوعامدىق كوميسسياسىنىڭ وقو فيليالى شتابىنىڭ مۇشەسى ۆالەنتينا ۆاششەنكو باقىلاۋشىلاردى دايارلاۋ كەزىڭدە جاستارعا ەرەكشە كوڭىل بولىنگەنىن ايتادى. سەمينارلار, ترەنينگتەر وتكىزىلگەن. سايلاۋعا جاقسى دايىندىقپەن بارۋ ءۇشىن قاجەتتى كومەكتىڭ ءبارى كورسەتىلگەن. زاڭنامالاردى ءبىلۋ, سايلاۋ ءتارتىبىن ساقتاۋ ماسەلەلەرى تالقىلانعان. «ءار ۋچاسكەدە ءبىر بايقاۋشىمىز بولسا جەتكىلىكتى دەپ سانادىق, –دەدى ۆالەنتينا ۆاششەنكو. – ويتكەنى وندا پارتيالار مەن باسقا دا قوعامدىق بىرلەستىكتەردىڭ بايقاۋشىلارى, حالىقارالىق بايقاۋشىلار بولادى. ءبىز بايقاۋشىلاردىڭ سانىنا ەمەس, ولاردىڭ ساپاسى مەن دايارلىعىنا باسا كوڭىل بولدىك». ەل پرەزيدەنتىن سايلاۋ-ۇلكەن ساياسي ناۋقان, حالىقتىڭ ەرتەڭگى كۇنگە دەگەن سەنىمدىلىك تاڭداۋى, ىزگى قادام. قازاقستان – زايىرلى مەملەكەت, سايلاۋ حالىقارالىق ستاندارتتار ولشەمىنە ساي وتكىزىلۋى ءتيىس. وڭتۇستىكتەگى 1029 سايلاۋ ۋچاسكەسىن سايلاۋدى باقىلاۋ قوعامدىق كوميسسياسى فيليالىنىڭ بايقاۋشىلارى كۇنى بويى ارالاپ جۇرەدى. باقتيار تايجان. دەرەك, سۋرەت: egemen.kz.