سۋرەتتى تۇسىرگەن – ەرلان ومار, «EQ»
كەز كەلگەن پايدالى ەڭبەك بارا-بارا بىرەۋدەن بىرەۋ الىپ ۇلتتىق كىتاپقا اينالاتىنىن ەجىكتەپ ايتىپ جاتپايمىز. سوندىقتان قازاقستان ۇكىمەتىنىڭ قاۋلىسىنا سايكەس ەلىمىزدە جاڭا مەرەكە – ۇلتتىق كىتاپ كۇنى جىل سايىن 23 ساۋىردە اتالىپ وتىلەتىنى يگى باستاما عانا ەمەس, بولاشاققا بىرەگەي قادام. پرەزيدەنت قاسىم-جومارت توقاەۆ ۇلتتىق قۇرىلتايدىڭ ءۇشىنشى وتىرىسىندا كوتەرگەن ماسەلە كوپ كەشىكپەي قوعام تاراپىنان قولداۋ تاۋىپ وتىر. مەملەكەت باسشىسى كىتاپ وقۋدىڭ جوعارى مادەنيەتىن قالىپتاستىرۋدى تاپسىرعان بولاتىن. بىرەگەي باستامانى قوعام جىلى قابىلداعانى ءبىلىم مەن عىلىمعا بەتبۇرىس بارىن بىلدىرسە كەرەك. تۇسىنە بىلگەنگە, حالىقتى ادەبيەت الەمىنە مويىن بۇرۋعا, كىتاپ كوكجيەگىنە كوز جىبەرۋىنە ۇندەۋ, ۇگىتتەۋ امالى نەمەسە يشاراسى دەسەك بولادى.
اتالعان جوبا بۇعان دەيىن تۋريزم جانە سپورت مينيسترلىگىنىڭ باستاماسىمەن اشىق نقا سايتىندا جاريالانعان. «جوبا قوعامدا كىتاپ وقۋدىڭ جوعارى مادەنيەتىن قالىپتاستىرۋ ماقساتىندا 23 ءساۋىر – ۇلتتىق كىتاپ كۇنى مەرەكەسىن مەرەكەلىك كۇندەر تىزىمىنە ەنگىزۋ ماقساتىندا ازىرلەنگەن» دەلىنگەن قاۋلى جوباسىندا. 22 مامىرعا دەيىن قوعام تالقىسىنا ۇسىنىلعان قاۋلى 2024 جىلعى 16 شىلدەدە كۇشىنە ەنەتىنىن اتاپ وتكەن ءجون.
مەملەكەت باسشىسىنىڭ ۇلتتىق كىتاپ كۇنىن بەلگىلەۋ تۋرالى تاپسىرماسىنا بايلانىستى ەلىمىزدە كۇنتىزبەگە جاڭا مەرەكە قوسىلعانىنا كەشە مادەنيەت جانە اقپارات ءمينيسترى ايدا بالاەۆا جەكە پاراقشاسىندا ءۇن قوستى.
«پرەزيدەنت ءوز سوزىندە: «شىن مانىندە, وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەپ اتاپ ءوتتى. قوعامدا كىتاپ وقۋ مادەنيەتىن قالىپتاستىرۋ بويىنشا مينيسترلىك تاراپىنان جۇيەلى جۇمىستار جالعاسا بەرەدى. وسى ورايدا مادەنيەت جانە اقپارات مينيسترلىگى ۇلتتىق كىتاپ كۇنىنە وراي ۇزدىك كىتاپتارعا ارنالعان «ۇلتتىق كىتاپ» بايقاۋىن جاريالادى. بايقاۋدا «بالالارعا ارنالعان ۇزدىك كىتاپ», «جاسوسپىرىمدەرگە ارنالعان ۇزدىك كوميكس كىتابى», «نون فيكشن (پسيحولوگيالىق, موتيۆاتسيالىق, بيزنەس) باعىتىنداعى ۇزدىك كىتاپ», «دەتەكتيۆ جانرىنداعى ۇزدىك كىتاپ», «ساتيرا جانرىنداعى ۇزدىك كىتاپ», «ۇزدىك يليۋستراتسيالىق كىتاپ», «ۇزدىك اۋدارما كىتابى», «ەڭ كوپ وقىلعان كىتاپ», «فەنتەزي جانرىنداعى ۇزدىك كىتاپ», «ۇزدىك باسپا» اتالىمدارى بويىنشا جەڭىمپازدار انىقتالادى. سونداي-اق «جىل كىتابىنا» گران-پري سىيلىعى تابىستالادى. بۇل بايقاۋ ۇزدىك كىتاپتاردى انىقتاپ, ونى كوپشىلىككە ناسيحاتتاۋعا, قوعامدى كىتاپ وقۋعا ۇندەۋگە ىقپال ەتەدى دەگەن ويدامىز», دەدى ا.بالاەۆا.
شىن مانىندە, قوعامىمىزدىڭ رۋحاني-مادەني تۇرعىداعى سۇرانىسىنا لايىقتى جاۋاپ بەرۋ ىسىندە ۇلت ادەبيەتىنىڭ باي قورىنا جۇگىنۋ تالاس تۋدىرماۋى كەرەك. وسى باعىتتاعى جۇمىستارعا مەملەكەت تاراپىنان وڭ قاباق تانىتۋ ءۇردىسى بايقالعان ەكەن, ونى ءوز دەڭگەيىندە ورىنداۋدا جايباراقاتتىق, نەمقۇرايدىلىق ورىن الماۋعا ءتيىس. بۇل دەگەنىمىز ءوزىمىزدىڭ قۇنارلى دا باي ادەبيەتىمىزدى ءتيىمدى پايدالانا بىلۋگە شاقىرادى.
«الەم بويىنشا كىتاپقا بايلانىستى حالىقارالىق جوبالار كوپ. ء«بىر ەل – ءبىر كىتاپ», دۇنيەجۇزىلىك كىتاپ جانە اۆتورلىق قۇقىق كۇنى, بالالار كىتابى كۇنى دەگەندەي. بۇل كۇننىڭ ەرەكشەلىگى – ۇلتتىق كىتاپ كۇنى. تامىرىمىزعا ورالۋمەن سيپاتتالادى. انا تىلىمىزدەگى ۇلتتىق تانىممەن سۋارىلعان كىتاپتاردىڭ ناسيحاتتالۋىنا, ول شىعارما اۆتورلارىنىڭ بەدەلى ارتۋىنا ۇلكەن قوزعاۋ سالاتىن اتاۋلى داتا دەسە بولادى. ەكىنشىدەن, مەملەكەتتىڭ ءارتاراپتى دامۋىنىڭ ءوزى ونىڭ رۋحاني كورسەتكىشىنە بايلانىستى. قوعام رۋحاني تۇرعىدان جەتىلگەن سايىن باسقا سالالار دا العا باسادى. سوندىقتان پرەزيدەنت بۇل تاپسىرمانى مەملەكەت دامۋىنىڭ ستراتەگياسى قارالاتىن ۇلتتىق قۇرىلتايدا ورتاعا تاستاۋى تەگىن ەمەس. مۇنداي جيىنداردا كىتاپ, كىتاپحانا, بالالار ادەبيەتى, اۆتورلارعا ماڭىز بەرىپ, ارنايى كۇن بەلگىلەنۋى – بارلىعىمىز ءمان بەرەتىن ۋاقىت كەلدى دەگەن ءسوز. قازىر كىتاپحانادا وقۋ مادەنيەتىن قالىپتاستىرۋدىڭ جاس ەرەكشەلىكتەرىنە بايلانىستى جاڭا فورماتتاردى قولعا الىپ جاتىرمىز. سوڭعى كەزدە كىتاپحانا ىشىندە عانا ەمەس, كەز كەلگەن جەردە كىتاپ وقۋعا مۇمكىندىك تۋدىرۋدى كوزدەپ, «Air Astana» اۋە كومپانياسىمەن ءبىر جوبانى قولعا الىپ, بىتىرۋگە از قالدىق. بورتتاعى مەدياقۇرىلعىلارعا ۇلتتىق ادەبيەتىمىزدىڭ جاۋھارلارىن اۋديوكىتاپ رەتىندە جۇكتەپ شىعامىز. بۇدان دا باسقا جوبالار بار», دەيدى ۇلتتىق اكادەميالىق كىتاپحانانىڭ ديرەكتورى عازيزا قۇدايبەرگەنقىزى.
وسىنداي جوبالار – تۇسىنە بىلگەنگە ولقىلىقتاردىڭ ورنىن تولتىرۋعا جاسالعان وڭ قادامدار. ال ءبىز ءسوز ەتىپ وتىرعان ۇلتتىق كىتاپ كۇنى اتتى مەرەكە وڭ قادامدارعا بەتبۇرىس قانا ەمەس, جانداندىرۋشى, بايىپتى باستاما دەپ تانىعىمىز كەلەدى. ەندەشە, ۇلتتىق كىتاپ كۇنىن حالقىمىزدىڭ ايتۋلى كۇندەرىنىڭ بىرىنە اينالدىرۋ ءوز قولىمىزدا, اعايىن. وسىناۋ كۇن شىن مانىندە ۇلتىمىزدىڭ ۇلى مەرەكەسىنە اينالىپ جاتسا, بۇل ءبىزدىڭ ۇتقانىمىزدى, حالىق رەتىندە وركەنيەت تورىنە شىققانىمىزدى بىلدىرەدى. ءوز ادەبيەتىمىزدىڭ التىن قورىنداعى تاماشا شىعارمالاردان حالقىمىز رۋحاني ءنار السا, قازاقتىڭ كەلەشەگى كەمەل بولاتىنىن ۇعىنا بىلەيىك.
