فوتو: dzen.ru
ء«بىر كەزدەرى اتالارىمىز «اسىق ويناعان وزار, دوپ ويناعان توزار» دەۋشى ەدى. قازىر بۇل ءسوزدى «ويىن ويناعان توزار» دەپ وزگەرتسەك بولاتىن سياقتى. مۇندا ويىن دەپ مەڭزەپ تۇرعانىم – ءباس تىگىپ, قۇمار ويناپ, وڭاي ولجا ىزدەپ جۇرگەندەر. لۋدومانيا دەپ اتالاتىن قۇبىلىس سوڭعى جىلدارى ەلىمىزدە كەڭ بەلەڭ الىپ كەتتى. اشىق دەرەكتەرگە سايكەس, قازىر ەلىمىزدە 350-مىڭعا جۋىق لۋدومان بار. بۇل تەك تىركەلگەندەرى, ال بۇل تىزىمگە ىلىكپەي-اق ءومىرىن ويىنعا تىگىپ جۇرگەندەردىڭ سانى قانشا؟ بۇدان بولەك اجىراسقان وتباسىلاردىڭ 40%-ى لۋدومانيا كەسىرىنەن ەكىگە كەتەدى ەكەن, ءسۋيتسيدتىڭ 20%-ى دا لۋدومانيا ءۇشىن بولادى دەگەن دەرەك بار», دەپ جازدى م.سەرالى.
ونىڭ ايتۋىنشا, لۋدومانداردىڭ اراسىندا قىلمىسقا باراتىندار دا جەتىپ جاتىر. سەبەبى قۇمار وينايتىنداردىڭ ورتاشا قارىزى شامامەن 10 ملن تەڭگەنى قۇرايدى دەگەن بەيرەسمي اقپارات بار. اسا الاڭداتارلىق ماسەلە – سوڭعى جىلدارى كامەلەتتىك جاسقا تولماعاندار اراسىندا دا قۇمار ويىنعا ەلىتۋشىلەردىڭ قاراسى ارتقان.
«وسى وزەكتى ماسەلەنى شەشۋ ءۇشىن زاڭ قابىلداۋ تۋرالى ۇسىنىس قوعامدا بۇرىننان تالقىلانىپ كەلە جاتقان ەدى. اتىراۋدا وتكەن قۇرىلتاي وتىرىسىندا ق.توقاەۆ تا: «بۇل دەرت جاس ۇرپاققا وتە ۇلكەن زيان كەلتىرەدى. ونلاين-ويىندار بالالاردىڭ كۇندەلىكتى ەرمەگىنە اينالىپ بارادى. قۇزىرلى ورگاندار بىلتىر ينتەرنەت-كازينونىڭ بەلگىسى بار 4 مىڭنان استام سايتتى بۇعاتتادى», دەگەن ەدى», دەدى ول.
سونىمەن قاتار م.سەرالى كوپتەن بەرى تالقىلانىپ كەلە جاتقان زاڭعا ەنگەن وزگەرىستەردىڭ نەگىزگىسىنە توقتالىپ ءوتتى:
بىرىنشىدەن, قۇمار ويىندارعا/باس تىگۋگە قاتىسۋىنا تىيىم سالىناتىن ادامدار ساناتىنىڭ ءتىزىمى كەڭەيتىلدى. ەندى ولاردىڭ قاتارىنا بورىشكەرلەردىڭ بىرىڭعاي تىزىلىمىندە تۇرعان تۇلعالار قوسىلدى.
ەكىنشىدەن, جاۋاپتى مەملەكەتتىك لاۋازىمدى اتقاراتىن, مەملەكەتتىك فۋنكتسيالاردى ورىنداۋعا ۋاكىلەتتىلىك بەرىلگەن ادامداردىڭ, ولارعا تەڭەستىرىلگەن ادامداردىڭ قۇمار ويىندارعا/باس تىگۋگە قاتىسۋىنا شەكتەۋ قويىلدى. ەندى قۇمار ويىندارعا/باس تىگۋگە قاتىسا المايتىنداردىڭ اراسىندا مەملەكەتتىك قىزمەتشىلەر, اسكەري قىزمەتشىلەر, ارنايى جانە قۇقىق قورعاۋ ورگاندارىنىڭ قىزمەتكەرلەرى, بيۋدجەتتىك ۇيىمداردىڭ باسشىلارى بار. ەگەر ولار زاڭ بۇزسا, تەك ەسكەرتۋمەن شەكتەلىپ قالماي, بىردەن جۇمىستان شىعارىلادى. مۇنداي ناقتى شارالار زاڭنىڭ مۇلتىكسىز ورىندالۋى ءۇشىن كەرەك.
ۇشىنشىدەن, بۋكمەكەرلىك كەڭسەلەردىڭ جارنامالارىنا شەكتەۋ قويىلدى. ەندى ولاردىڭ قىزمەتىن كولىك قۇرالدارىندا, باق-تا, كينو, ۆيدەو جانە انىقتامالىق قىزمەت كورسەتۋ ورىندارىندا جارنامالاۋعا تىيىم سالىنادى.
«تەك بۋكمەكەرلىك كەڭسە ورنالاسقان جەردەگى سىرتقى جارناماعا, سپورت عيماراتتارىنىڭ ءىشى مەن سپورتشىلاردىڭ كيىمىندە, سپورتتىق تاقىرىپقا ماماندانعان جانە رەسمي تىركەلگەن باق-تا, سونداي-اق وتاندىق تەلەارنالار حالىقارالىق سپورتتىق جارىستاردى تىكەلەي ترانسلياتسيا جاساعان كەزدە جارنامالاۋعا رۇقسات ەتىلەدى. ياعني, ولاردىڭ جارناماسىن Qazsport-تان كورىپ قالساڭىز, ءبارى دۇرىس, ال ەگەر بۋكمەكەرلەردى حابار جارنامالاپ جاتسا, بۇل زاڭعا قايشى.
لۋدومانيامەن كۇرەس تەك زاڭ قابىلداۋمەن شەكتەلىپ قالعان جوق. 2026 جىلعا قاراي جىلدار بويى لۋدومانيانىڭ قۇرىعىندا جۇرگەندەردىڭ سانىن ەكى ەسەگە قىسقارتۋ ماقساتىندا قازاقستان بيلىگى ولارعا مەملەكەت ەسەبىنەن تەگىن ەمدەۋ مەن مەديتسينالىق-الەۋمەتتىك وڭالتۋ ۇسىنۋدى جوسپارلاپ وتىر ەكەن. بۇل ماقساتتارعا بيۋدجەتتەن 80 ملن تەڭگەدەن استام قارجى بولىنگەن. سونداي-اق ەل بيلىگى لۋدومانيامەن كۇرەس اياسىندا ءتورت باعىت بويىنشا 42 ءىس-شارا ۇيىمداستىرماق», دەپ جازدى ول.
تاعى ءبىر ايتا كەتەتىن جايت – eGov mobile قوسىمشاسىندا قازاقستان ازاماتتارى قۇمار ويىندار مەن ءباس تىگۋگە قاتىسۋلارىن ەرىكتى تۇردە شەكتەۋ تۋرالى ءوتىنىش بەرە الادى. وندا بارلىق زاڭدى ويىن مەكەمەلەرى مەن بۋكمەكەرلىك كەڭسەلەردىڭ سايتتارىنا 6 ايدان 12 ايعا دەيىن كىرۋگە تىيىم سالۋعا بولادى.
