مەملەكەت باسشىسى قاسىم-جومارت توقاەۆ بيىل اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا حالقىمىزدىڭ قانىندا جاناشىرلىق, قامقورلىق, باۋىرمالدىق سىندى اسىل قاسيەتتەردىڭ بارىن ايرىقشا اتاپ ءوتتى.
«قازاقستان – ءبارىمىزدىڭ قاسيەتتى قارا شاڭىراعىمىز. سوندىقتان ءاربىر ازامات ەل تاعدىرىنا ءوز تاعدىرىنداي قاراۋعا ءتيىس. ءبىزدىڭ كۇشىمىز ىنتىماقتا. ەلىمىزدىڭ الەۋمەتتىك ساياساتى وسى قۇندىلىققا نەگىزدەلگەن. مەملەكەت تە, قوعام دا كومەككە شىن مۇقتاج ادامداردى قولداۋعا قاشاندا دايىن. ءبىزدىڭ ەرىكتىلەرىمىزدىڭ ەرەن ەڭبەگى – جاناشىر بولۋدىڭ شىنايى ۇلگىسى. ولار كەز كەلگەن ساتتە وزگەلەرگە رياسىز كوڭىلمەن كومەكتەسۋگە ۇمتىلادى. بيزنەس وكىلدەرى جانە باسقا دا ازاماتتارىمىز ءتۇرلى قايىرىمدىلىق شارالارعا بەلسەنە اتسالىسادى. بۇل دا – تىلەۋلەس بولۋدىڭ ايقىن كورىنىسى», دەپ پرەزيدەنت ىرگەلى قۇندىلىقتاردىڭ ماڭىزدىلىعىن تاعى ءبىر مارتە ەسكە سالدى.
وسى ساباقتاستىقتىڭ ءجىبىن ۇزبەي باستالعان جوبا اياسىندا كۇنتىزبەدەگى ماڭىزدى كۇندەرگە, حالىقارالىق جانە ءتۇرلى الەۋمەتتىك, مادەني تاقىرىپتارعا ارنالعان «جاقسىلىق اپتالىعى», جىل سايىنعى تاقىرىپتىق ءىس-شارالار وتكىزۋ جوسپارلانىپ وتىر. ءبىر ايتا كەتەرلىگى, تاقىرىپتار اتاۋى جىل سايىن وزگەرىپ وتىرادى. بۇل الەۋمەتتىك جاۋاپكەرشىلىكتىڭ ءتۇرلى سالالارىنا قىزىعۋشىلىقتى ارتتىرا وتىرىپ, وزەكتى ماسەلەلەردى قامتۋعا ۇمتىلادى.
«يگى ىستەر مارافونىنىڭ» العاشقى اپتاسى ەكولوگياعا ارنالادى. جوباعا قاتىسۋ ءۇشىن جاساعان يگى ءىس تۋرالى الەۋمەتتىك جەلىلەردە اقپارات جاريالاپ, Qazvolunteer.kz ونلاين پلاتفورماسىندا تىركەۋدەن ءوتۋى قاجەت.
مارافون قورىتىندىسىندا ەڭ بەلسەندى قاتىسۋشىلار العىسحاتتارمەن جانە ەستەلىك سىيلىقتارمەن ماراپاتتالادى. تولىق اقپارات Qazvolunteer.kz سايتىندا جانە الەۋمەتتىك جەلىدەگى @kz_nvs جانە @qazvolunteer.kz پاراقشالارىندا جاريالانادى.
