وسكەمەن. 26 ءساۋىر. شىعىس قازاقستاندا پرەزيدەنت سايلاۋى ەرەكشە وتۋدە. ماسەلەن, وسكەمەن قالاسىنداعى №23 سايلاۋ ۋچاسكەسىندە مەرەكەلىك شارا ۇيىمداستىرىلدى. بۇل تۋرالى egemen.kz ءتىلشىسى حابارلادى.
اتالعان سايلاۋ ۋچاسكەسىنىڭ توراعاسى نۇرلان بايجىگىت ۇلىنىڭ ۇيىتقى بولۋىمەن سايلاۋ ۋچاسكەسى اۋماعىنا قازاقتىڭ كيىز ءۇيى تىگىلىپ, داۋىس بەرۋگە كەلگەن ادامدار تەگىن تاماقتاندىرىلدى. قالانىڭ تانىمال ونەرپازدارىنىڭ قاتىسۋىمەن مەرەكەلىك كونتسەرت جۇرت نازارىنا ۇسىنىلدى. سونداي-اق بالالارعا ارنالعان باتۋت قويىلىپ, وندا اتا-انالارىمەن ەرىپ كەلگەن بالالار اسىر سالىپ وينادى.
بالالاردىڭ كوڭىلىن كوتەرۋ ءۇشىن كلوۋن مەن مينوندار شاقىرىلعان ەكەن. بالالارعا جەكە مەرەكەلىك باعدارلاما قاراستىرىلعان سايلاۋ ۋچاسكەسىندە ەرەسەكتەر دە ەسكەرىلگەن. ياعني, تۇرعىندار داۋىس بەرگەن سوڭ ۇتىس كۋپوندارىنا يە بولدى. ۇتىسقا تەلەديدار, شاڭسورعىش, قىسقا تولقىندى پەش, ۇيالى تەلەفون, پلانشەت سىندى باعالى تۇرمىستىق بۇيىمدار ويناتىلدى. «مەن ەرتەڭگىلىك وسى ۋچاسكەگە كەلىپ داۋىس بەردىم. سول كەزدە وسى ۇتىس كۋپونىن العان بولاتىنمىن. بىراق, پرەزيدەنت سايلاۋىنا كەلىپ, تەلەديدار ۇتىپ الامىن دەگەن وي مۇلدە بولعان جوق», – دەيدى باس جۇلدەنى ۇتىپ العان قالا تۇرعىنى گۇلشات كۇدەداەۆا.
كيىز ءۇي تىگىلگەن سايلاۋ ۋچاسكەسىنە جينالعان جۇرت داۋىس بەرگەن سوڭ كونتسەرتتى تاماشالادى. «سايلاۋعا وراي وتكىزىلگەن مۇنداي تاماشا مەرەكەنى ءبىرىنشى رەت كورىپ تۇرمىن», – دەدى قالا تۇرعىنى اسەم تويىمباەۆا تاڭدانىسىن جاسىرا الماي.
دۋمان اناش.
دەرەك, سۋرەت: egemen.kz
