سونداي-اق ول اعا-باۋىرلارىمەن دە تانىستى.
ينفورمبيۋرونىڭ حابارلاۋىنشا, كانادالىقتاردىڭ قولىندا وسكەن جاندوس اقتاۋلىق اناسىن تاۋىپ, باۋىرلارىمەن كەزدەستى. باسقا ەلدە وسكەن جاندوستى 10 ايلىعىندا تورونتودا تۇراتىن شەتەلدىك وتباسى اسىرىپ العان. ولار ەر جەتكەن ۇلدارىنىڭ قالاۋىنا قارسى شىقپاي, قازاقستانعا الىپ كەلگەن. ول 17 جىلدان كەيىن عانا ءوز تۋعان جەرىنە اياق باستى.
- انام مەنى تاستاپ كەتسە دە وعان ەش وكپەم جوق ەكەنىن ايتقىم كەلەدى. ونى جازعىرمايمىن دا. تاعدىردىڭ جازۋى سولاي شىعار. ال اتا جۇرتىم مەنى ەرەكشە ىستىق ىقىلاسىمەن قارسى الدى. جايلاۋدا بولىپ, دومبىرا اسپابىمەن تانىستىم. حالقىم قوناقجاي ەكەن, - دەدى جاندوس.
كانادالىق اتا-اناسىن قازاقستانعا ەرتىپ كەلگەن جىگىت باۋىرلارىمەن دە تانىستى. سوسىن سابيلەر ۇيىنە بارىپ, ءوزىن باققان تاربيەشىلەرمەن قاۋىشتى. تاعدىرلاس بالالارمەن ۇزاق ۋاقىت ويناپ, كوز جاسىنا دا ەرىك بەردى. جاندوستى وسىرگەن كانادالىق وتباسى بالانىڭ قالاۋىنا قارسى شىقپاي, ماڭعىستاۋ جەرىنە كەلگەندەرىن ايتادى.
ول تۋعان اناسىن كورگىسى كەلە مە جوق پا ءوزى شەشەدى دەپ كەلدىك. ۇلىمىزدىڭ تورونتودا قازاق دوستارى كوپ. ولارمەن ءجيى كەزدەسىپ, ارالاسىپ تۇرادى. سوندا دوستارىنىڭ ءبىرى اناسىن تابۋعا كەڭەس بەرگەن. ءبىز ونىڭ نيەتىن قولداپ, اقتاۋعا الىپ كەلدىك, - دەدى اسىراپ العان اناسى شاناس مۇحامەد. جاندوس تۋعان جەرىنە قوناق رەتىندە ءجيى كەلىپ تۇراتىنىن جەتكىزدى. قازاقتىڭ قوناقجايلىعىنا ريزا بولعان جىگىت تورونتو قالاسىنا قايتا كەتەدى.
