شىعىنداردى قىسقارتۋ ءىس-شارالارىن باستادى

«سامۇرىق-قازىنا» اق داعدارىسقا قارسى شارالاردى ىسكە اسىرۋعا كىرىستى. بۇل تۋرالى ۇكىمەت وتىرىسىندا, «سامۇرىق-قازىنا» اق باسقارما توراعاسى ءو.شوكەەۆ حابارلادى. «الەمدىك ەكونوميكاداعى تەرىس وزگەرىستەرگە بايلانىستى كومپانيالاردىڭ بيزنەس-جوسپارلارى دا قايتا قارالاتىن بولادى. سونىڭ ىشىندە, بەكىتىلگەن جوسپارداعى شىعىن كولەمى 337 ملرد. تەڭگەگە قىسقارتىلادى,  وزىندىك قۇن 249 ملرد. تەڭگەگە تومەندەتىلىپ, جالپى اكىمشىلىك شىعىندار 64 ملرد. تەڭگەگە, ياعني 16,6 %-عا قىسقارادى. بەكىتىلگەن جوسپارداعى كاپيتالدى شىعىن 1,3 ملرد. اقش دوللارىنا, تيىسىنشە 18 %-عا قىسقارتىلادى», – دەدى ءو.شوكەەۆ. سونداي-اق, قوردىڭ ينۆەس­تي­تسيا­لىق باعدارلاماسىن 18 %-عا قىس­قارتۋ جوسپارلانعان. قور كومپانيالار توبىنداعى ين­ۆەس­­تيتسيالىق باعدارلامالار حيميا­­لىق, تاۋ-كەن, قۇرىلىس, كولىك, مۇ­ناي-گاز سالالارىن­دا قىسقارا­تىن بولادى. سونى­مەن قوسا, مەم­لە­كەت­تىك يندۋس­تريا­لىق-يننو­ۆاتسيالىق دامۋ باعدار­لاماسى-2, «نۇر­لى جول» باعدار­لاماسى, «EXPO-2017» كورمەسى نىساندارى مەن وزگە دە ستراتەگيالىق ماڭىزى بار جوبالار جۇزەگە اسىرىلا بەرمەك. ءو.شوكەەۆ اتاپ وتكەندەي, قازىر­گى­دەي الماعايىپ ەكونوميكالىق جاع­دايدا «سامۇرىق-قازىنا» قورى بيز­نەستى ترانسفورماتسيالاۋ ىسىنە ەرەكشە كوڭىل بولەتىن بولادى.  «وتكەن جىل­دىڭ 6 قازانىندا مەملەكەت باسشىسى ىسكە قوسقان قوردى ترانسفورماتسيالاۋ باعدارلاماسى قور دامۋىنىڭ نەگىزى بولىپ تابىلادى.  باعدارلاما قور كومپانيالارىنىڭ داعدارىستى جاعدايلارعا دەگەن يممۋنيتەتىن كۇشەي­تەدى. سوندىقتان, ەكونوميكالىق ولشەم­دەر تومەندەپ جاتسا دا, ءبىز بۇل باعدارلامانى توقتاتپايمىز», – دەيدى ءو.شوكەەۆ. بارلىق كومپانيالار ءۇشىن الدا­عى 3 جىلعا جول كارتالارى جاسا­لىپ, بەكىتىلگەن. قورداعى بيزنەس-ۇدە­رىس­تەرگە رەينجينيرينگ جاساۋ مەن ءۇز­دىك حالىقارالىق تالاپقا ساي ستراتە­گيا­لىق حولدينگ/بەلسەندى ينۆەستور مودەلىنە ءوتۋ جۇمىسى دا جالعاسادى. «2015 جىلى ءبىز 10 ءىرى كومپانيادا وپەراتسيالىق ترانسفورماتسيانى باس­تايمىز, كومپانيالار بويىنشا 8 مىڭ ۇدەرىستى زەردەلەپ, قايتا قارايتىن بولامىز. جاڭا KPI, ەڭبەكاقى تولەۋدىڭ گرەيديرلىك ءتاسىلى, 10 HR-باستاما جۇيە­­لەرى ەنگىزىلەدى. قور توبىندا IT-قىز­مەت­تىڭ ورتالىعىن جاساۋ جوسپار­لا­نۋدا, بۇل 70 ملن. اقش دوللارىن ۇنەمدەۋگە مۇمكىندىك بەرەدى. كوم­پا­نيا­لار سانى 600-دەن 500-گە دەيىن قىسقارادى», – دەدى ءو.شوكەەۆ. قور باسشىسى جەكەشەلەندىرۋ باع­دار­لاماسىنىڭ 2015 جىلى دا جالعا­سىن تاباتىنىن اتاپ ءوتتى. «2014 جىلى جەكەشەلەندىرۋ باع­دارلاماسى اياسىندا 64 اكتيۆتى ساتۋ جوس­پارلانسا, سونىڭ 12-ءسى 4,1 ملرد. تەڭگەگە (باعالىق قۇنى 2,5 ملرد. تەڭگە بولعان) ساتىلدى, 12 كومپانيا بويىنشا ساتىپ الۋ كەلىسىمشارتى قول قويۋ كەزەڭىندە, ولاردىڭ جالپى سوماسى  20,3 ملرد. تەڭگە. ءىرى 10 كومپانيا مەن تاعى 24 اكتيۆ بويىنشا جۇمىستار جالعاسۋدا. 5 اكتيۆ بويىنشا ساۋدا  2016 جىلعا اۋىستىرىلدى. وسى جىلى قور توبى 17 اكتيۆتى ساتۋدى جوسپارلاپ وتىر», – دەپ مالىمدەدى «سامۇرىق-قازىنا» اق باسقارما توراعاسى. «ەگەمەن-اقپارات».