وزىق تەحنولوگيا, وركەندى ءوندىرىس

بۇل يننوۆاتسيالىق جوبانى جۇزەگە اسىرۋشى «كاسپي پليۋس» جشس- ءنىڭ تاۋ-كەن سالاسىنا جانە تەمىر-بەتون قۇراستىرمالارىن وندىرۋگە قاجەتتى بەكىتۋ ماتەريالدارىن, تەمىر قۇراستىرمالارىن جانە ارماتۋرالىق دانەكەرلەندىرىلگەن تورلاردى ۇسىنۋدا ۇستانىپ وتىرعان باستى ۇستانىمى. سەرىكتەستىك وسىنداي وڭدەلگەن تەمىر ونىمدەرىن جاساۋمەن جانە وندىرۋمەن اينالىساتىن جاس تا ىرعاقتى دامىپ كەلە جاتقان كومپانيا. بۇل وندىرىستىك كومپانيا ەلىمىزدىڭ تاۋ-كەن ءوندىرۋ سالاسى ءۇشىن وتاندىق بەكىتۋ ماتەريالدارىن وندىرەتىن تاۋار وندىرۋشىلەر تىزىمىنە ەنگىزىلگەن. سەرىكتەستىك تاۋ-كەن سالاسى ءۇشىن ءارتۇرلى بەكىتۋ بۇيىمدارىن شىعارادى. ءوندىرىس ولاردى ءوندىرۋدى ءوز سىزبالارىمەن, سونداي-اق, ارناۋلى تەحنولوگيانى پايدالانا وتىرىپ, ۇلگىلەر بويىنشا دا جۇزەگە اسىرادى. كومپانيا بارلىق ونىمدەردى ءوزىنىڭ وندىرىستىك الاڭدارىندا شىعارادى. سوندىقتان سەرىكتەستىكتىڭ قانداي دا بۇيىمدى تاپسىرىسشىنىڭ تالابى جانە تەحنيكالىق ولشەمدەر بويىنشا جاساۋ مۇمكىندىگى مول. «كاسپي پليۋس» جشس تاڭداعان ستراتەگيانى قازاقستاننىڭ تاۋ-كەن شاحتالىق سالاسى ءۇشىن بەكىتۋ بۇيىمدارىن شىعاراتىن بالامالى وندىرىسشىلەردەن تۇبىرىمەن وزگەشە دەۋ ورىندى. كاسىپورىن ارىپتەستەرىنە بەكىتۋ بۇيىمدارىن بارلىق رۇقسات قۇجاتتارىمەن جانە قر ست جانە كەدەن وداعى سەرتيفيكاتتارىمەن ۇسىنادى. – ارينە, ءبىز بۇعان بىردەن قول جەتكىزدىك دەسەك كۇپىرلىك بولار ەدى. مەن ول كەزدە «ۆوسحود وريەل»جشس-نە تسەمەنت جەتكىزىپ جۇرگەنمىن. سەرىكتەستىكتىڭ تەمىر تورلاردى شەتەلدەن اكەلىپ جۇرگەنىن كورىپ, نەگە ءوزىمىز جاساماسقا دەگەن وي كەلدى. ءسويتىپ, كاسىپورىن باسشىلارىنا تەمىر تور جاساپ ۇسىنسام الاسىڭدار ما دەپ تامىرلارىن باسىپ كوردىم. ولار بىزدە ونى جاساۋ مۇمكىن ەمەس دەگەندەي ءۋاج ايتتى. الامىز دەپ كەپىلدىك بەرە المايمىز, جاساپ كور, دەدى. مەن بوس قالعان گاراجدى جالعا الىپ, تەمىر تور دانەكەرلەۋ ىسىنە كىرىسىپ كەتتىم. جاساعان تورىمىزدىڭ ساپاسىنا كوز جەتكىزۋ ءۇشىن ونى ەكى تراكتورمەن كەرىپ تارتقاندا, تەمىر دانەكەرلەنگەن جەردەن ەمەس, تىنىنەن ءۇزىلدى. بۇل ءبىزدىڭ تەمىر دانەكەرلەۋدى جەتىك مەڭگەرگەنىمىزدىڭ ايعاعى بولاتىن. ءسويتىپ, ءبىزدىڭ مۇنداي ءونىمدى ساپالى جاسايتىنىمىزعا كوزدەرى جەتتى. سولاي تەمىر وڭدەۋ جۇمىسى قارقىن الدى. كەلە-كەلە قىتايعا, تۇركياعا, مالايزياعا, سينگاپۋرعا, رەسەيگە بارىپ, وسى زامانعى تەمىر وڭدەۋ تەحنولوگيالارىمەن تانىستىق, وزدەرىمىز كوپ ىزدەندىك, وسى زامانعى ەڭ وزىق وڭدەۋ ستانوكتارىن جەتكىزدىك. قازىر ءبىزدىڭ كاسىپورىنداعىداي تەمىر وڭدەۋ ستانوكتارى ەلىمىزدە جوققا ءتان, – دەدى «كاسپي پليۋس» جشس ديرەكتورى جاندوس پانگەرەەۆ ءبىزدى ءوندىرىس الاڭىنا باستاپ كەلە جاتىپ. شىندىعىندا, بۇل ءوزى بىرەگەي كاسىپورىن ەكەن. ءبىزدىڭ بۇرىنعى زاۋىتتارداي ارسىل-گۇرسىل جوق, اينالا تاپ-تازا, جيناقى. ستانوكتاردىڭ ارقايسىسى بىرنەشە وپەراتسيانى اتقارادى. ءتىپتى, ونشاقتى وپەراتسيانى ءبىر ءوزى اتقاراتىندارى دا بار. بارلىعى بىردەي ساندىق باسقارۋ باعدارلاماسى بويىنشا جۇمىس ىستەيدى. وسىنداعى وننان استام ستانوكتاردا نەبارى توعىز-اق ادام ەڭبەك ەتەدى. جۇمىسشىلاردىڭ دەنى اۋىلدان كەلگەن جاستار. قيمىلدارىنان تەحنولوگيانى جەتىك مەڭگەرگەندەرى انىق اڭعارىلادى. ولار قىتايدا, گەرمانيادا, رەسەيدە وقىپ, تاجىريبەدەن وتكەن. مۇندا جاسالاتىن بۇرعىلاپ قازۋ وتىمدەرىنىڭ توبەسىن بەكىتەتىن تەمىر بۇيىمداردى (جەڭىلدەتىلگەن اركا) گەرمانيادا سىناقتان وتكىزىپ, ساپالى ەكەنىنە كوزدەرى جەتكەن. ءتىپتى, نەمىستەر وسىندا كەلگەندە وزدەرىنىڭ ۇلگىلىك اركالارىن سەرىكتەستىكتە جاسالعان اركامەن شاتاستىرىپ العان كورى­نەدى. سەبەبى, مۇندا جوعارى تەحنو­لو­­­­گيا­لى ستانوكتارمەن جۇمىس ىستەيدى. سەرىكتەستىك تاۋ-كەن شاحتالىق سالاسى ءۇشىن بەكىتۋ بۇيىمدارى نارىعىندا 2008 جىلدان بەرى جۇمىس ىستەپ كەلەدى. ءوندىرىس الاڭى 3 مىڭ شارشى مەتردى قۇرايدى. كاسىپورىندا بىلىكتىلىگى جوعارى مامان جۇمىسشىلار ەڭبەك ەتەدى. وندىرىستىك تسەحتار گەرمانيا, وڭتۇستىك كورەيا, رەسەي جانە قىتايدىڭ قوندىرعىلارىمەن جاراقتاندىرىلعان. تەمىرلەردى وڭدەۋ ونىمدىلىگى جوعارى ساندىق باسقارۋ باعدارلاماسىمەن جۇمىس ىستەيتىن ورتالىقتاردا جۇزەگە اسىرىلادى. وسى تەحنولوگيالاردىڭ تيىمدىلىگى مەن كوپ سالالىعىنىڭ ارقاسىندا جاڭا ءونىمدى شىعارۋعا, قايتا رەتتەۋگە كوپ ۋاقىت كەتپەيدى, مۇندا دايىندالعان ءونىمنىڭ ساپاسىنا كەپىلدىك بەرىلەدى. مۇنداي تەحنولوگيانى وندىرىستە پايدالانۋ ماشينا جاساۋ, اۋىل شارۋاشىلىعى, ەنەرگەتيكا ونەركاسىبىنە قاجەتتى تەمىر ونىمدەرىن, قوسالقى بولشەكتەردى شىعارۋعا مۇمكىندىك بەرەدى. سەرىكتەستىك تاۋ-كەن شاحتا سالاسىنا مەتالل قۇراستىرمالى اركالىق بەكىتپەلەر جاسايدى. ولار قولداناتىن شاحتالار مەن توننەلدەردە پايدالانىلاتىن Pantex جۇيەسىنە بالاما جوق دەۋگە بولادى. Pantex جۇيەسى تياناقتى تەستىلەنگەن جانە الەم بويىنشا پايدالانىلادى. 2008 جىلدان باستاپ تاۋ جىنىستارىن جانە تەمىر-بەتون قۇراستىرمالارىن بەكىتۋ ءۇشىن ارماتۋرالىق تورلاردى دانەكەرلەۋ ءوندىرىسى يگەرىلدى. ارماتۋرالىق تورلاردى دانەكەرلەۋ ارماتۋرالىق سىمداردى سالقىن دەفورماتسيالاۋ ادىسىمەن جۇرگىزىلەدى. – ءبىز جەكە تاپسىرىس بويىنشا تەمىر تورلاردى ءارتۇرلى ولشەمدە, مىرىشتالعان تۇرلەرىندە جاساي الامىز, تاۋ-كەن شاحتاسى ءۇشىن پلاستيكالىق قۇبىر شىعارۋمەن دە اينالىسامىز. ءبىزدىڭ كومپانيا 2014 جىلدان باستاپ ارناۋلى كورروزياعا قارسى پۆح پلاستيك قۇبىرلارىن شىعارۋدى جۇزەگە اسىردى. ول انكەرلىك قۇرامعا كىرەدى. بۇل بىزگە باسەكەگە قابىلەتتى جانە يمپورتتى الماستىرۋشى ءونىم شىعارۋدا مۇمكىندىك بەردى. كومپانيانىڭ وندىرىستىك الاڭى ەۋروپادا وندىرىلگەن ستانوكتارمەن جاراقتاندىرىلعان, وسى زامانعى وزىق تەحنولوگيانىڭ ارقاسىندا كاسىپورىن وندىرەتىن ونىمدەر باسەكەگە قابىلەتتى جانە الەمدىك ستاندارتتارعا ساي كەلەدى. كوم­پانيا وبلىستا ءارتۇرلى ولشەمدەگى انكەر­لەر, تورلار, اركالىق بۇيىمدار ءوندىرى­سىن قالىپتاستىرۋ ماقساتىندا جاڭا قون­دىر­عى ساتىپ الدى. تەمىر وڭدەۋ ءۇشىن سان­دىق باسقارۋ باعدارلامالى نەمىس قوندىر­عىلارىن ساتىپ الۋ جۇمىستارى قارقىندى جۇرگىزىلۋدە, – دەيدى سەرىكتەستىك باسشىسى. سەرىكتەستىك وسى از عانا ۋاقىتتا ءوزىن تۇراقتى, سەنىمدى جانە ادال جەتكىزۋشى رەتىندە تانىتا ءبىلدى. كومپانيا بەس جىلدان بەرى وڭىردەگى كەن وندىرۋمەن اينالىساتىن كوپتەگەن كومپانيالارمەن ارىپتەستىك قاتىناستى نىعايتىپ كەلەدى. كاسىپورىن وندىرەتىن تەمىر ونىمدەرى ەلىمىزدىڭ بارلىق وڭىرلەرىندە پايدالانىلادى. جۇمىسشىلاردىڭ بىلىكتىلىگى مەن تاجىريبەلىلىگى قانداي دا تاپسىرىستى تەز جانە ساپالى ورىنداۋعا العىشارت جاساۋ­دا. سەرىكتەستىكتىڭ قوندىرعىلارىنىڭ ساپالىلىعى مەن پايدالانۋ سيپاتىنىڭ جوعارىلىعى, جەتكىزۋدىڭ جانە تولەمنىڭ ءتيىمدى جولدارىنىڭ قاراستىرىلۋى كاسىپورىننىڭ سەنىمدى ارىپتەستىك بەدەلىن كوتەردى. وندىرىستىك كورمەلەرگە تۇراقتى قاتىساتىن «كاسپي پليۋس» جشس «Astana Mininq and Metallurqy», «Mininq Week Kazakhstan 2014» ديپلومدارىمەن ماراپاتتالعان. كومپانيانىڭ بۇرعىلاپ قازۋ ءوتىمىنىڭ اۆستراليالىق ءادىسىن قولداناتىن «ۆوسحود وريەل» جشس-مەن تىعىز ارىپتەستىك قاتىناسى قالىپتاسقان. سونداي-اق, نەمىس ادىسىمەن بۇرعىلايتىن «شاحتباۋقازاقستان» جشس-مەن ىنتىماقتاستىقتا جۇمىس ىستەيدى. بۇل ءادىستى ەۋروپا, امەريكا, اۆستراليا جانە باسقا باتىس ەلدەرى قولدانادى. – ەلباسى ن.نازارباەۆ «نۇرلى جول – بولاشاققا باستار جول» اتتى قازاقستان حالقىنا جولداۋىندا تەمىر وڭدەۋدى دامىتۋعا باسىمدىق بەردى. ءبىز وسى تاپسىرما اياسىندا ءونىمدى جۇمىس ىستەۋگە باعىت ۇس­تاۋدامىز. كاسىپورىندا شىعارىلاتىن وڭدەل­گەن تەمىر بۇيىمدارىنىڭ اسسور­تيمەن­تىن كەڭەيتۋدەمىز, جاڭا زاماناۋي تەحنو­لوگيالىق جەلىلەردى پايدالانۋدى جەتىلدى­رە تۇسۋدەمىز. سونىڭ ناتيجەسىندە قازىر سەرىك­تەستىكتىڭ ءوندىرىس الاڭىنان توپىراقتىق, فراكتسيالىق جانە قۇبىرلىق, توپىراقتىق كەرمەلىك, توپىراقتىق بولاتپوليمەرلىك, اركالىق بەكىتپەلەر, شايبالار, ارماتۋرالىق دانەكەرلەنگەن تورلار, بەكىتۋ بۇيىمدارى, ەۋرودۋالدار, بولات فيبرا شىعارىلادى. فيبرانىڭ قولدانۋ سالاسى كەڭ. بۇل تەمىر بەتوننىڭ, قاتتى جامىلعىنىڭ بەرىكتىگىن ارتتىراتىن مەتالل بۇيىمى بولىپ تابىلادى, – دەيدى ءسوز اراسىندا ول. جاندوس بولات ۇلى مۇنداي يننوۆا­تسيا­لىق جوبانى جۇزەگە اسىرۋعا وبلىس اكىمى ارحيمەد مۇحامبەتوۆ, «دامۋ» كاسىپ­كەرلىكتى دامىتۋ قورى اقتوبە فيليالىنىڭ باسشىسى تولەمىس شوتانوۆتىڭ قولداۋ كورسەتكەنىن جەتكىزدى. كومپانيانىڭ نەگىزىنەن ەكىنشى دارەجەلى اتف بانكپەن ارىپتەستىك قاتىناستا جۇمىس ىستەيتىنىن ايتىپ ءوتتى. يننوۆاتسيالىق كاسىپورىن باسشىسى ءوز ونىمدەرىن تەك قانا ەلىمىزدىڭ تاۋ-كەن جانە شاحتا سالاسىنا عانا ەمەس, كورشىلەس رەسەي نارىعىنا شىعارۋدى ويلاستىرۋدا. ول ءۇشىن ورىنبور قالاسىنان وزدەرىنىڭ وكىلەتتىگىن اشۋ كوزدەلۋدە. قازىر كومپانيا بەلسەندى يننوۆاتسيالىق ساياساتىن جۇرگىزۋدە, وسى زامانعى وزىق تەحنولوگيانى ەنگىزۋدە, جاڭا ءونىم تۇرلەرىن يگەرۋدە, باتىستىق ارىپتەستەرىمەن ىسكەرلىك قاتىناستى نىعايتۋدا, ديللەرلىك جۇيەلەردى كەڭەيتۋدە, كليەنتتەرمەن بايلانىس نىعايۋدا, كاسىپورىنعا بىلىكتى ماماندار تارتۋدا ىزدەنىستىڭ ارناسىن كەڭەيتىپ كەلەدى. مىنە, وسىلاي وزىق تەحنولوگيامەن جۇمىس ىستەيتىن بىردەن-ءبىر كاسىپورىننىڭ وركەندى ءوندىرىس رەتىندەگى بەدەلىن بيىكتەتۋگە باتىل قادام جاسالۋدا. ساتىبالدى ءساۋىرباي, «ەگەمەن قازاقستان». اقتوبە وبلىسى.