كەڭەس وتىرىسىندا كوپ قۇجاتقا قول قويىلدى. سونىڭ ىشىندەگى ەكەۋى ءبىزدىڭ ەلگە قاتىستى. ولار – بەلارۋس رەسپۋبليكاسىن ۇيىمعا مۇشەلىككە قابىلداۋ ءراسىمىنىڭ اياقتالۋى جانە وعان شانحاي ىنتىماقتاستىق ۇيىمىنا مۇشە مەملەكەت مارتەبەسىن بەرۋ تۋرالى كەڭەستىڭ شەشىمدەرى. سونىمەن قاتار بەلارۋس رەسپۋبليكاسىنا ۇيىمعا مۇشە مەملەكەت مارتەبەسى بەرىلۋىنە بايلانىستى شانحاي ىنتىماقتاستىق ۇيىمىنا مۇشە مەملەكەتتەردىڭ ۇلەستىك جارناسى تۋرالى شەشىم شىعارىلدى.
وسىلايشا, قازاقستان توراعالىعىنىڭ قورىتىندىسىندا استانا سامميتىندە ءبىزدىڭ ەل ۇيىمنىڭ تولىققاندى مۇشەسى اتانىپ وتىر. بەلارۋس رەسپۋبليكاسى 2015 جىلدان بەرى شىۇ جۇمىسىنا باقىلاۋشى مارتەبەسىندە عانا قاتىسىپ كەلگەن. وعان دەيىن ديالوگ نەگىزىندەگى سەرىكتەس مارتەبەمىز بولعان.
ارينە, ءۇش جىلعا سوزىلعان ۇدەرىستى اسا ۇزاق ۋاقىت دەۋگە كەلمەس. دەگەنمەن وسى از عانا ۋاقىتتىڭ ىشىندە پروتسەدۋرالىق كوپ جۇمىس اتقارىلىپ, بەلارۋس وزىنە مىندەتتەلگەن بارلىق جۇكتەمەنى ابىرويمەن اتقاردى. ونىڭ ۇستىنە ۇيىمنىڭ سەرىكتەسى بولعان 2015 جىلدان بەرى ءبىز بارلىق وتىرىسقا, ءتۇرلى تالقىلاۋعا قاتىسىپ, جالپى العاندا, ۇيىمنىڭ نەگىزگى باعىتتارىمەن, بارلىق ماسەلەسىمەن تانىسپىز.
جالپى, بەلارۋستىڭ ۇيىمعا قابىلدانعانىن باس حاتشى چجان مين «تاريحي جەتىستىك» دەپ باعالاپ وتىر. راسىندا, ەۋرازيا كونتينەنتىندە باستاپقىدا «بەستىك» قۇراممەن قۇرىلعان ىرگەلى ۇيىمنىڭ «وندىعىن» تۇيىندەپ جاتقانىمىز – رامىزدىك تۇرعىدان ايرىقشا جاڭالىق. ەڭ باستىسى, ۇيىم ەلدەرىنىڭ قاتارىن كوبەيتىپ, الەۋەتىن ارتتىرۋ وڭىردەگى ساۋدا-ەكونوميكالىق بايلانىستاردى, قاۋىپسىزدىك شارالارىن جانداندىرۋ ءۇشىن اسا قاجەت. اسىرەسە ءبىزدىڭ ەلگە جەتكىزىلەتىن تاۋارلاردىڭ 70 پايىزى بۇگىندە وسى ۇيىمعا مۇشە مەملەكەتتەرگە تيەسىلى. الدىمەن وسى ۇيىمنىڭ اياسىندا بەلارۋستەن پاكىستانعا دەيىنگى كولىك-لوگيستيكانى بارىنشا دامىتۋدى كوزدەپ وتىرمىز.
جالپى العاندا, شانحاي ىنتىماقتاستىق ۇيىمى – ماڭىزدى كەلىسسوزدەرگە قول جەتكىزىپ, اۋقىمدى ساياسي شەشىمدەر قابىلدايتىن الاڭ. ءبىز ءوز تاراپىمىزدان تەحنولوگيا جاعىنان تاجىريبە الماسىپ, اقپاراتتىق قاۋىپسىزدىكتى بىرلەسىپ جەتىلدىرۋ, كولىك-لوگيستيكالىق دالىزدەردى كوبەيتۋ باستامالارىنا باسىمدىق بەرمەكپىز.
ماكسيم رىجەنكوۆ,
بەلارۋس رەسپۋبليكاسىنىڭ سىرتقى ىستەر ءمينيسترى
