جامبىلدىق سايلاۋشىلاردىڭ 49,9 پايىزى داۋىس بەردى

تاراز. 26 ءساۋىر. جامبىل وبلىسىنىڭ سايلاۋشىلارى بۇگىنگى ناۋقاندا بەلسەندىلىك تانىتۋدا. تاراز قالاسىنداعى №50 سايلاۋ وكرۋگىندە كۇندىزگى ساعات 10-عا دەيىن 800-گە جۋىق سايلاۋشى ءوز تاڭداۋىن جاساپ ۇلگەردى. بۇل تۋرالى egemen.kz ءتىلشىسى حابارلادى. ۋچاسكەدە سايلاۋشىلارعا بارلىق جاعداي جاسالعان. اۋلادا اسەم ءان قالىقتاپ جاتسا, ىشتە داۋىس بەرۋشىلەردىڭ كەيبىرى شاحمات, دويبى ويىندارىن قىزۋ كىرىسىپ كەتىپتى. سونداي-اق, سايلاۋ ۋچاسكەسى جانىندا ساۋدا دۇڭگىرشەكتەرى قويىلىپ, ەل قاجەتتى ازىق-ت ۇلىكتەرىن ساتىپ الۋدا. ال, تاراز قالاسىنداعى №39 سايلاۋ وكرۋگىنە العاشقىلاردىڭ ءبىرى بولىپ كەلگەن 78 جاستاعى بوتاباي مالدىباەۆ اقساقال ەل تاعدىرى شەشىلەتىن جاۋاپتى ساتكە بەي-جاي قاراي المايتىنىن ايتادى. بۇگىندە بەينەتىنىڭ زەينەتىن كورىپ وتىرعان قاريا داۋىس بەرۋگە اجەي ەكەۋى كەلىپتى. ال, جامبىل پوليتەحنيكالىق كوللەدجىنىڭ ستۋدەنتى زاحار شاريپوۆ ءوز تاڭداۋىن №35 سايلاۋ وكرۋگىندە جاسادى. بولاشاق جىلىجاي مامانى زاحار وسى ناۋقانعا ات سالىسىپ, داۋىس بەرگەنىنە وتە قۋانىشتى. «تاڭەرتەڭ ەرتە تۇرىپ, سايلاۋ ۋچاسكەسىنە جەتكەنشە اسىق بولدىم, بۇل مەن ءۇشىن ۇلكەن جاۋاپكەرشىلىك» دەيدى ول. جامبىلدىق سايلاۋشىلاردىڭ ءوز تاڭداۋلارىن جاساۋدا بەلسەندىلىك تانىتۋى, ارينە, ولاردىڭ بۇل جاۋاپتى ساتكە اسقان جاۋاپكەرشىلىكپەن قارايتىنىن بىلدىرسە كەرەك. بىرلىگى, ىنتىماعى جاراسقان ەلدىڭ حالقى وسىنداي ۇيىمشىل بولادى. وبلىستىق سايلاۋ كوميسسياسىنىڭ مالىمەتىنە قاراعاندا ساعات 12-گە دەيىن جامبىلدىق سايلاۋشىلاردىڭ 49,9 پايىزى, ياعني, 256 944 ادام داۋىس بەردى. وبلىس بويىنشا 461 سايلاۋ ۋچاسكەسى بار. ورالحان ءداۋىت. دەرەك, سۋرەت: egemen.kz