شىمكەنتتە سايلاۋشىلار بەلسەندى تۇردە داۋىس بەرۋدە

شىمكەنت. 26 ءساۋىر. شىمكەنتتە ءساۋىردىڭ 25-ىنەن 26-نا اۋعان تۇندە اۋا رايى كۇرت بۇزىلىپ, شەلەكتەپ جاڭبىر جاۋدى. سوعان قاراماستان, سايلاۋ ۋچاسكەلەرىنە كەلىپ, داۋىس بەرىپ جاتقان ازاماتتاردىڭ قاتارى قالىڭ. بۇل تۋرالى egemen.kz ءتىلشىسى حابارلادى. №5 قالالىق سايلاۋ ۋچاسكەسىنىڭ توراعاسى ارمان قويشيەۆ تاڭەرتەڭگى ساعات جەتىدەن باستاپ ەڭ الدىمەن ەگدە كىسىلەردىڭ كەلگەنىن ايتتى. جاستار جاعىنىڭ ساعات 10:00-گە تاياعاندا بەلسەندىلىكتەرى ارتىپتى. العاشقى ءتورت-بەس ساعاتتا 300-گە جۋىق سايلاۋشى تاڭداۋىن جاساعان. شەتەلدىك باقىلاۋشىلار ازىرگە بۇل ۋچاسكەگە كەلمەگەن ەكەن. شاعىم ماسەلەسىنە كەلسەك, ەكى ازامات تىزىمنەن اتى-ءجونىن تابا الماي رەنىش بىلدىرگەن. ارمان قويشيەۆ بۇل ماسەلە قازىر جەڭىل شەشىلىپ جاتقانىن ايتتى. ينتەرنەت ارقىلى حالىققا قىزمەت كورسەتۋ ورتالىعىنا تىزىمدە جوق ازاماتتاردىڭ اتى-ءجونىن جىبەرسە, قاي ۋچاسكەدە تىركەۋلى ەكەندىگىن 2-3 مينۋتتا انىقتاپ بەرەدى. پارتيا تاراپىنان كەلگەن باقىلاۋشىلارمەن سويلەستىك. ولار دا سايلاۋدىڭ زاڭدى ءوتىپ جاتقانىن ايتادى. شىمكەنت قالالىق سايلاۋ كوميسسياسىنىڭ توراعاسى ەرلان بەكتۇرعانوۆ ساعات ونعا دەيىن 39 مىڭ 617 سايلاۋشىنىڭ داۋىس بەرگەنىن ايتتى. قالاداعى 222 سايلاۋ ۋچاسكەسى حالىققا قىزمەت ەتۋدە. ونىڭ 20-سى جابىق سايلاۋ ۋچاسكەلەرى بولىپ سانالادى. ول جەرلەردە اۋرۋحانالار, ەكى اسكەري ءبولىم, قارتتار ءۇيى جانە تەرگەۋ يزولياتورىندا ءىسى سوتقا جەتپەگەن ازاماتتار داۋىس بەرەدى. ال مۇگەدەك جاندارعا ساعات 12:00-گە دەيىن ارنايى بولىنگەن ازاماتتار سايلاۋ جاشىگىن اپارادى. ەۋروپا قاۋىپسىزدىك جانە ىنتىماقتاستىق ۇيىمى (ەقىۇ) تاراپىنان كەلگەن باقىلاۋشىلار سايلاۋ ۋچاسكەلەرىندە زاڭدىلىقتىڭ ساقتالۋىن باقىلاۋدا. 29 ناۋرىزدان 1 مامىرعا دەيىن ۇزاق مەرزىمگە كەلگەن دانيا جانە شۆەيتساريا باقىلاۋشىلارىن ءوز جۇمىستارىنان بولەك, بىزدەگى سايلاۋ جۇيەسى قىزىقتىرادى ەكەن. ماسەلەن, شۆەيتساريادا سايلاۋشى داۋىستى پوشتا ارقىلى دا بەرە الادى. شەتەلدىك باقىلاۋشىلاردان ازىرگە شاعىم جوق. ولار سايلاۋدىڭ قالىپتى ءوتىپ جاتقانىن ايتتى. باقتيار تايجان. دەرەك, سۋرەت: egemen.kz.