«مۇگەدەك بولسام دا ەش كەدەرگىسىز داۋىس بەردىم»

پەتروپاۆل. 26 ءساۋىر. سولتۇستىك قازاقستان وبلىسىندا جاسى كەلگەن كەيبىر سايلاۋشىلار ءوز ۇيلەرىنەن داۋىس بەرۋدە. سونداي جانداردىڭ ءبىرى – 30 جىل كۇش كۇش قۇرىلىمىندا ەڭبەك ەتكەن ارداگەر, 74 جاستاعى امانگەلدى ەلامانوۆ. ول بۇگىندە دەنساۋلىعى سىر بەرسە دە ەش كەدەرگىسىز داۋىس بەرگەنىن ايتتى. بۇل تۋرالى egemen.kz ءتىلشىسى حابارلادى. «سانالى عۇمىرىمدى ەلىمىزدى, جەرىمىزدى كوركەيتۋگە ارنادىم. ءبىزدىڭ كەزىمىزدە ءار ساياسي ناۋقاننىڭ ءجونى بولەك بولاتىن. الدىن الا ۇلكەن مەيرام رەتىندە دايىندالىپ, ۇستىمىزگە تازا كيىمدەرىمىزدى كيىپ, كوتەرىڭكى كوڭىل-كۇيمەن باراتىنبىز. قازىر زامان وزگەردى دەمەسەڭ, ايىرماشىلىعى شامالى. اسەم اۋەن اۋەلەپ, ساۋدا-ساتتىق قىزىپ تۇرادى. ەڭ باستىسى, ادامداردىڭ نيەتى ءتۇزۋ, پيعىلى دۇرىس. ەلىمىز تىنىش, باقۋاتتى دامىپ كەلەدى», – دەيدى اقساقال. سايلاۋدى ۇيىمداستىرۋشىلارعا العىسىن جاۋدىرعان قارت سايلاۋشى: «قانداي سايلاۋ بولسىن بالالار مەن جاسوسپىرىمدەر كىتاپحاناسىندا ورنالاسقان №626 سايلاۋ ۋچاسكەسىنە وتباسىمىزبەن بارىپ, ءوز تاڭداۋىمىزدى جاساۋشى ەدىك. بيىل قاتتى سىرقاتتانىپ, ءجۇرىپ-تۇرۋعا مۇرشام بولمادى. قاتتى قاپالانىپ وتىرعانىمدا, مىڭ بولعىر جاندار كەلىپ, «اتا, ەش قام جەمەڭىز, سايلاۋ جاشىگىن ۇيگە اكەلەمىز» دەدى. سول ءسوزدى ەستىپ توبەم كوككە جەتكەندەي بولدى. مەن سياقتى مۇمكىندىگى شەكتەۋلى ناۋقاستاردىڭ ەش كەدەرگىسىز داۋىس بەرۋىنە جاعداي تۋدىرىلعانىنا كوڭىلىم ءبىر كوتەرىلىپ قالدى», – دەگەن كۇش قۇرىلىمدارىنىڭ ارداگەرى وتباسىندا وزىنەن باسقا تاعى 4 جاننىڭ ءوز تاڭداۋىن جاساعانىن ايتتى. ءومىر ەسقالي. دەرەك: egemen.kz. سۋرەت: امانگەلدى بەكمۇراتوۆ.