فوتو: اقوردا ءباسپاسوز قىزمەتى
مەملەكەت باسشىسى قاتاردى قازاقستاننىڭ ەڭ جاقىن سەرىكتەستەرىنىڭ ءبىرى رەتىندە اتاپ ءوتىپ, ەكى ەلدىڭ ماقساتتارى ورتاق جانە تىلەۋلەس ەكەنىن ايتتى.
ء«سىزدىڭ ەلىڭىزبەن تىعىز قارىم-قاتىناس جاساۋعا نيەتتى ەكەنىمىزدى اتاپ وتكىم كەلەدى. مەنىڭ دوحاعا جاساعان ساپارىم تۋرالى جاقسى ەستەلىكتەر قالدى. بۇل ەكىجاقتى ىنتىماقتاستىقتى دامىتۋعا تىڭ سەرپىن بەرۋ تۇرعىسىنان ايتۋلى وقيعا بولدى. ءبىز بايلانىستارىمىزدى ستراتەگيالىق سەرىكتەستىك دەڭگەيىنە كوتەردىك. مەنىڭ ساپارىم بارىسىندا وتە ماڭىزدى قۇجاتتارعا قول قويىلدى. قازاقستان ۇكىمەتى وسى كەلىسىمدەردىڭ تابىستى جۇزەگە اسىرىلۋى ءۇشىن قولدان كەلگەننىڭ ءبارىن جاسايدى دەپ ويلايمىن», دەدى پرەزيدەنت.
شەيح ءتاميم بەن حاماد ءال ءتاني استاناعا تاعى دا كەلىپ, شىۇ سامميتىنە قاتىسۋ زور مارتەبە ەكەنىن ايتتى.
«ارينە, دوحاعا جاساعان وتە ماڭىزدى ساپارىڭىز ەسىمدە. ءسىز ءوزارا قارىم-قاتىناسىمىزدى ستراتەگيالىق دەڭگەيگە كوتەرگەنىمىزدى ەسكە سالدىڭىز. مەن قارىم-قاتىناستارىمىزدى ماقتان تۇتامىن. ەلدەرىمىز ءالى دە اۋقىمدى جۇمىس اتقارۋعا, سونىڭ ىشىندە ەكونوميكالىق جانە ينۆەستيتسيالىق بايلانىستاردى ودان ءارى نىعايتۋعا ءتيىس», دەدى قاتار ءامىرى.
كەزدەسۋ بارىسىندا تاراپتار ساۋدا-ەكونوميكالىق, مادەني-گۋمانيتارلىق, كولىك-لوگيستيكالىق, سونداي-اق اۋىل شارۋاشىلىعى, ەنەرگەتيكا, ءبىلىم بەرۋ, دەنساۋلىق ساقتاۋ جانە تەلەكوممۋنيكاتسيا سالالارىنداعى ەكىجاقتى بايلانىستاردى نىعايتۋ پەرسپەكتيۆالارىن تالقىلادى. وڭىرلىك جانە حالىقارالىق كۇن تارتىبىندەگى وزەكتى ماسەلەلەرگە ەرەكشە نازار اۋدارىلدى.
