فوتو: alataugazeti.kz
جۇمىس ساپارى كەزىندە دەپۋتاتتار «الماتى – بىشكەك» تاسجولىنىڭ احۋالىنا جانە «الماتى – استانا» جولىندا ورنالاسقان شامالعان ستانساسىنداعى تەمىرجول وتكەلىنىڭ قۇرىلىسىنا ەرەكشە نازار اۋداردى. سەناتورلار اتقارىلىپ جاتقان جۇمىسقا قاراماستان شەشىمىن تاپپاي كەلە جاتقان بىرقاتار ماسەلە بار ەكەنىن اتاپ ءوتتى. ستاتيستيكاعا سايكەس جىل باسىنان بەرى رەسپۋبليكالىق ماڭىزى بار جولداردا 109 اقاۋ انىقتالعان. ولاردىڭ 82-ءسى كەشەندى جۇمىستى تالاپ ەتەدى.
«وكىنىشكە قاراي, ەلىمىزدەگى رەسپۋبليكالىق ماڭىزى بار جولدار مەن ىشكى جولداردىڭ ساپاسى سىن كوتەرمەيدى. بۇل – جەرگىلىكتى تۇرعىندارمەن كەزدەسۋ كەزىندە ءجيى كوتەرىلەتىن پروبلەمالاردىڭ ءبىرى. كەگەن, رايىمبەك اۋداندارىنداعى رەسپۋبليكالىق ماڭىزى بار تراسسالارداعى تۇيتكىلدەر الەۋمەتتىك جەلىلەردە دە قىزۋ تالقىلانىپ جاتادى. ءبىر جىل وتپەي جاتىپ, جولدىڭ اسفالت جابىنى تولىعىمەن بۇزىلدى. بۇل ماسەلە ءتيىستى مينيسترلىكتەرمەن بىرگە تالقىلاندى. وندا قازاقستان جول عىلىمي-زەرتتەۋ ينستيتۋتىنىڭ قىزمەتكەرلەرى قۇم-قيىرشىق تاس قوسپاسىنىڭ پايدالانىلاتىن نۇسقالارى ەلىمىزدىڭ ۇلتتىق ستاندارتىنا ساي كەلمەيتىنىن ايتتى», دەدى جانبولات جورگەنباەۆ.
سونىمەن قاتار سەناتورلار جولداردى جوندەۋ جانە كۇتىپ ۇستاۋ كەزىندە پايدالانىلاتىن جۇمىستار مەن ماتەريالداردىڭ ساپاسىنا ساراپتاما جۇرگىزىلەتىن ورتالىق زەرتحاناسىنىڭ جۇمىسىمەن تانىستى. بۇعان قوسا, كاسىپورىن ۇجىمىمەن الداعى ماڭىزدى مىندەتتەردى تالقىلادى.
