ەلىمىزدە پرەزيدەنت سايلاۋى تالاپقا ساي ءوتىپ جاتىر

استانا. 26 ءساۋىر. رەسپۋبليكامىز بويىنشا پرەزيدەنت سايلاۋى كونستيتۋتسيا تالاپتارىنا ساي ءوتىپ جاتىر. باس پروكۋراتۋرانىڭ رەسمي وكىلى نۇرداۋلەت سۇيىندىكوۆ وسىلاي دەدى. بۇل تۋرالى egemen.kz ءتىلشىسى حابارلادى. نۇرداۋلەت سۇيىندىكوۆ: «سايلاۋ كوميسسيالارى مەن مەملەكەتتىك ورگاندار تاراپىنان ەشقانداي زاڭ بۇزۋشىلىق تىركەلگەن جوق. تەك سايلاۋ الدى ۇگىت-ناسيحات جۇمىستارى كەزىندە جەكەلەگەن ازاماتتار تاراپىنان بۇزۋشىلىقتار ورىن العان. بۇل ماسەلە بويىنشا الدىن الۋ سيپاتىنداعى شارالار قولدانىلدى. اتاپ ايتقاندا, ۇستىمىزدەگى جىلدىڭ 30 ناۋرىزىندا الماتى وبلىستىق پروكۋراتۋراسى ارقىلى 2 ازاماتقا زاڭ بۇزۋشىلىققا جول بەرىلمەيتىنى تۋرالى ەسكەرتىلدى. ولار وزدەرىنىڭ «فەيسبۋكتەگى» پاراقشالارىنا پرەزيدەنتتىككە كانديداتتاردىڭ ار-نامىسىنا, قادىر-قاسيەتىنە نۇقسان كەلتىرەتىن سوزدەر جازعان. اتالمىش جايتقا قاتىستى اكىمشىلىك قۇقىق بۇزۋشىلىق تۋرالى نەمەسە قىلمىستىق ءىس قوزعالعان جوق», دەدى. نۇرداۋلەت سۇيىندىكوۆتىڭ ايتۋىنشا, قازىرگى تاڭدا پروكۋراتۋرا ورگاندارىنا پرەزيدەنت سايلاۋىنا قاتىستى 3 ارىز تۇسكەن. ولاردىڭ ەكەۋىندە سايلاۋ زاڭنامالارىن ءتۇسىندىرۋ ماسەلەسى قوزعالعان. ال قالعان بىرەۋىندە شاعىم يەسى پرەزيدەنتتىككە ۇمىتكەرلەرگە قويىلاتىن تالاپتارمەن كەلىسپەيتىن جەتكىزگەن. بۇل ارىزدار ورتالىق سايلاۋ كوميسسياسىنىڭ قاراۋىنا جىبەرىلگەن. جولدىباي بازار. دەرەك, سۋرەت: egemen.kz.