فوتو:depositphotos.com
«بيىلعى جىلدىڭ 5 ايىنىڭ قورىتىندىسى بويىنشا رەسپۋبليكا كاسىپورىندارىندا 626 جۇمىسشى زارداپ شەكتى, بۇل 2023 جىلدىڭ سايكەس كەزەڭىمەن سالىستىرعاندا (518 جۇمىسشى) 20,8 پايىزعا كوپ, ونىڭ ىشىندە 79 ادام قايتىس بولدى, بۇل 29 پايىزعا ارتىق. وتكەن جىلدىڭ وسى كەزەڭىندە 61 جۇمىسشى قازا تاپقان ەدى», دەدى تولەگەن وسپانقۇلوۆ قوستاناي وبلىسىنداعى وندىرىستىك جاراقاتتانۋ ماسەلەلەرىنە ارنالعان كەڭەس بارىسىندا.
ونىڭ ايتۋىنشا, قوستاناي وبلىسىندا (61 ادام زارداپ شەكتى), اباي وبلىسىندا (51 ادام), قاراعاندى وبلىسىندا (44 ادام) جانە الماتىدا (42 ادام) جاراقات الۋدىڭ جوعارى دەڭگەيى ساقتالىپ تۇر.
كەلەسى كاسىپورىنداردا جۇمىس ىستەيتىن ادامدار ءوندىرىس ورىندارىندا ەڭ كوپ جاراقات العان:
- تاۋ-كەن مەتاللۋرگيا ونەركاسىبى – 17 پايىز;
- قۇرىلىس يندۋسترياسى – 13 پايىز;
- كوممۋنالدىق قىزمەتتەر – 5 پايىز.
«قوستاناي وبلىسىندا ەڭ كوپ زارداپ شەككەندەر تاۋ-كەن مەتاللۋرگيا ونەركاسىبىنىڭ كاسىپورىندارىندا تىركەلدى – 14 پايىز, ماشينا جاساۋ ونەركاسىبىندە – 9 پايىز. سونىمەن قاتار جاراقاتتانۋ دەڭگەيى جوعارى كاسىپورىنداردىڭ ءبىرى – قوستاناي «پايدالى قازبالار» اق. وسى كاسىپورىندا سوڭعى 5 جىلدا 11 ادام زارداپ شەكتى, ونىڭ بىرەۋى قايتىس بولدى», دەپ تولىقتىردى وسپانقۇلوۆ.
