ءىس-شاراعا وزبەكستان ەلشىلىگىنىڭ, باس كونسۋلدىعىنىڭ, ءا.ناۋاي اتىنداعى تاشكەنت مەملەكەتتىك وزبەك ءتىلى مەن ادەبيەتى ۋنيۆەرسيتەتىنىڭ, ءا.ناۋاي اتىنداعى ناۋاي مەملەكەتتىك پەداگوگيكالىق ينستيتۋتىنىڭ, شىرشىق مەملەكەتتىك پەداگوگيكالىق ۋنيۆەرسيتەتىنىڭ, ش.راشيدوۆ اتىنداعى سامارقاند مەملەكەتتىك ۋنيۆەرسيتەتىنىڭ, الماتى قالاسىنداعى وزبەك ۇلتتىق-مادەني ورتالىعى قوعامدىق بىرلەستىگىنىڭ وكىلدەرى, سونداي-اق جوعارى وقۋ ورىندارىنىڭ عالىمدارى قاتىستى.
فورۋمنىڭ اشىلۋىندا ءسوز سويلەگەن اباي اتىنداعى قازۇپۋ رەكتورى بولات تىلەپ قازاقستان مەن وزبەكستان اراسىنداعى ىنتىماقتاستىقتى دامىتۋدىڭ ماڭىزدىلىعىنا توقتالىپ, بۇل باستاما ەكى ەل اراسىنداعى عىلىمي جانە اكادەميالىق قوعامداستىقتىڭ ارى قاراي ىلگەرىلەۋىنە تىڭ سەرپىن بەرەتىنىن اتاپ ءوتتى. «باۋىرلاس ەلدەرىمىزدىڭ ىنتىماقتاستىعى ءوزارا سىيلاستىق, دوستىق جانە تاتۋ كورشىلىكپەن ۇشتاسىپ جاتىر. اباي مەن ناۋايدىڭ قۇرمەتىنە ۇيىمداستىرىلعان فورۋم سونىڭ ايعاعى. ءبىزدىڭ ورتاق ماقساتىمىز – رۋحاني جانە مادەني قۇندىلىقتار ساباقتاستىعىن دامىتۋ, سونداي-اق ەكى ەلدىڭ جوعارى ءبىلىم مەن عىلىم سالاسىن جاڭعىرتۋ», دەدى رەكتور.
قازىرگى قوعام دامۋىنىڭ رۋحاني, تاريحي جانە فيلوسوفيالىق نەگىزدەرىن ناسيحاتتاۋ, ۇلى ويشىلداردىڭ يدەيالارىن زەرتتەۋگە باعىتتالعان فورۋمدا وزبەكستاننىڭ الماتىداعى باس كونسۋلى ابدۋراحيم كايۋموۆ مەملەكەتتەر دسوتىعىنىڭ ارقاسىندا ناۋاي مەن اباي شىعارمالارىندا كورىنىس تاپقان ورتاق مادەني مۇرا, ۇلى ويشىلداردىڭ ادامزاتتىق قۇندىلىقتارعا نەگىزدەلگەن رۋحاني قازىناسىن ساقتاۋ مەن زەرتتەۋ ءىسىنىڭ جالعاسىن تابا بەرەتىندىگىن اتاپ ءوتتى.
«بۇل ءىس-شارا قازاقستان مەن وزبەكستان اراسىنداعى ءبىلىم بەرۋ ىنتىماقتاستىعىن دامىتۋداعى ماڭىزدى قادام بولىپ تابىلادى. بۇگىندە ءبىلىم الماسۋدى نىعايتۋدا ۇزدىكسىز جۇمىستار جۇرگىزىلىپ جاتىر. سونىڭ ءبىرى – اباي ۋنيۆەرسيتەتىندە ۇلى اقىن ناۋاي ورتالىعىن اشۋ بولىپ وتىر. جاقىن ارادا ش.راشيدوۆ اتىنداعى سامارقاند مەملەكەتتىك ۋنيۆەرسيتەتى ورتالىق ازيا مەملەكەتتەرى مەن مادەنيەتى ينستيتۋتىنىڭ جانىنان اباي ورتالىعىن, قازاق ءتىلى مەن ادەبيەتى ءبولىمىن اشۋ جوسپارلانىپ وتىر», دەپ اتاپ ءوتتى ءوز سوزىندە قازاقستاننىڭ وزبەكستانداعى توتەنشە جانە وكىلەتتى ەلشىنىڭ كەڭەسشىسى ەرعالي قىستاۋباەۆ.
فورۋمدا ەكى ەلدىڭ مادەني مۇراسى مەن رۋحاني دامۋىنىڭ ماڭىزدى سالالارى تالقىلانىپ, ناۋاي مەن اباي شىعارماشىلىعىنىڭ الەمدىك مادەنيەتتەگى ادەبي-كوركەمدىك باعىتتاردىڭ دامۋىنا ىقپالى, وزەكتىلىگى تالقىلاندى. اباي ۋنيۆەرسيتەتىنىڭ بۇل يگى باستاماسى الداعى ۋاقىتتا ەكى ەل اراسىنداعى ء بىلىم مەن عىلىم سالاسىنداعى بايلانىستارى نىعايتۋعا ىقپال ەتەتىن بولادى. رۋحاني بايلانىس وزبەكستان ۋنيۆەرسيتەتتەرى عالىمدارىمەن بىرلەسىپ جۇمىس ىستەۋگە, جاڭا عىلىمي باعىتتاردى قۇرۋعا باعىتتالىپ وتىر. جوعارى وقۋ ورىندارىنىڭ كوشباسشىلىعى مەن باسەكەگە قابىلەتتىلىگىن كۇشەيتەتىن زەرتحانالار مەن حالىقارالىق عىلىمي مەكتەپتەر قۇرۋ جوسپارلانۋدا. مامانداردى دايارلاۋدىڭ ءتۇرلى باعىتتارى بويىنشا بىرلەسكەن ديسسەرتاتسيالىق كەڭەستەر اشۋ, قوس ديپلومدى ءبىلىم بەرۋ باعدارلامالارىن ازىرلەۋ مەن اكادەميالىق ۇتقىرلىقتى كەڭەيتۋ دە جوسپارلانىپ وتىر.
فورۋم «الىشەر ناۋاي مۇراسى: عىلىم, ءبىلىم جانە تاربيە سينەرگياسى» تاقىرىبىندا حالىقارالىق عىلىمي-ادىستەمەلىك سەمينارمەن جالعاسىن تاۋىپ, «ناۋاي وقۋلارى: «ناۋاي – الەم تىلدەرىندە» مانەرلەپ وقۋ كونكۋرسى, وقىتۋشىلار مەن ستۋدەنتتەر اراسىنداعى ناۋاي شىعارماشىلىعىنا ارنالعان پلەنەر ءوتىپ, قاتىسۋشىلار الماتى قالاسىنداعى ستۋدەنت جاستاردىڭ شىعارماشىلىعىمەن تانىستى.
الماتى
