ماسەلەن, پەتروپاۆلداعى پۋشكين كوشەسى جارتىلاي جابىلىپ, جوندەۋ جۇرە باستادى. وبلىس باسشىسى عاۋەز نۇرمۇحامبەتوۆ وبلىس ورتالىعىنداعى لازۋتين, سۇتىشەۆ, بولاتباەۆ, «زەلەنايا» جانە «التىن دالا» كوشەلەرىندەگى جولداردى جوندەۋ جۇمىسىن تەكسەرىپ, ولاردىڭ ساپاسىن كوردى. وكىنىشكە قاراي, جۇقا بەتى عانا سىدىرىلىپ, تەگىستەلگەن سوڭ جولدارعا سونشالىقتى قالىڭدىقپەن اسفالت توسەلەدى. مۇنىڭ پايداسى شامالى, اۋىر جۇك ماشينالارى وتكەندە ولار قايتادان ەزىلىپ, شۇقىرشاقتار پايدا بولادى. ال شۇقىرشاققا كۇزگى جانە كوكتەمدەگى سۋىق جاڭبىردا تۇرىپ قالعان سۋ قاتىپ, مۇزعا اينالادى دا, شۇڭقىردى بۇزىپ, كەڭىتە بەرەدى. سوندىقتان وبلىس اكىمى جول جوندەۋدىڭ ساپاسىن ارتتىرۋدى تالاپ ەتتى.
جالپى, بيىل پەتروپاۆل قالاسىندا 53 كوشەگە اسفالت توسەۋ جوسپارلانعان. ونىڭ ىشىندە 39-ىندا بۇرىن-سوڭدى اسفالت بولماعان. بۇل كوشەلەردىڭ نەگىزگى بولىگى «جۇمىسشى كەنتى», بوركي جانە ورمان شاعىن اۋدانى سىندى قالامىزدىڭ شەتكەرگى اۋداندارىندا ورنالاسقان. وبلىس اكىمى اتقارىلعان جۇمىستىڭ ساپاسىن قاتاڭ قاداعالاپ, جاز كۇندەرىن ءتيىمدى پايدالانۋدى تاپسىردى. «جولداردى ساپالى جوندەمەگەن مەردىگەرلەردىڭ جۇمىسى قابىلدانبايدى. ونى قوعامدىق ۇيىمدار مەن باق وكىلدەرى قاتىستىرىلعان كوميسسيا قابىلدايتىن بولادى», دەپ مەردىگەرلەردى ەسكەرتتى.
جالپى, 5 جىل ىشىندە پەتروپاۆلداعى بارلىق جولداردى قيىرشىق تاس توسەلۋدەن تولىق ارىلتىپ, اسفالت توسەندىسىنە اۋىستىرۋ جوسپارلانعان. «سونداي-اق قالا باسشىلىعى مەن اۋدان اكىمدەرىنە قاڭىراپ بوس جاتقان جانە قاراۋسىز قالعان عيماراتتاردى رەتكە كەلتىرۋدى, مەنشىك يەلەرىمەن قاجەتتى جۇمىستاردى جۇرگىزۋدى تاپسىردىم. وبلىس ورتالىعىندا قالانىڭ كوركىن بۇزاتىن عيماراتتار بولماۋى كەرەك», دەپ جازدى ءوڭىر باسشىسى الەۋمەتتىك جەلىدە.
مامانداردىڭ ايتۋىنا قاراعاندا, جولداردىڭ تەز بۇزىلاتىن باستى سەبەبى – اسفالتىڭ نورماعا سايكەس بولماي, جۇقا توسەلۋىنەن. ۇزاق جىل بويى جول سالاسىندا ينجەنەر قىزمەتىن اتقارعان ءسابيت ەسجانوۆتىڭ ايتۋىنا قاراعاندا, قازىرگى اۋىر سالماقتى جۇك تاسيتىن كولىكتەرگە ءبىزدىڭ جولدار تەحنولوگيالىق تۇرعىدان سايكەس كەلمەيدى. «قالا ىشىندەگى جولدار عانا ەمەس, تراسسالاردىڭ وزىندە كەيبىر اۋىر جۇكتەر تاسيتىن اۆتوكولىكتەردىڭ جۇرۋىنە تىيىم سالۋ كەمشىن. قازىرگى ءوز سالماقتارىمەن قوسا 40-50 توننالىق جۇك تاسيتىن اۆتوموبيلدەر, اسىرەسە جاز ايلارىندا جولدى ەزىپ, بۇزىپ كەتەدى, سونى باقىلاۋدى جەتىلدىرۋ كەرەك», دەيدى. سونىمەن بىرگە ول بىزدەگى نەگىزگى جولدار وتكەن عاسىردىڭ 1980-1990 جىلدارى سالىنعانىن ايتتى. «ول كەزدەگى جولدىڭ بەكۋ ءنورماتيۆى دە تومەن بولاتىن. توسەلگەن اسفالتتىڭ قالىڭدىعى دا ستاندارت بويىنشا 5 سم عانا ەدى, قازىر 7-دەن تومەن بولماۋ كەرەك. سونىمەن بىرگە جولداردى ءاربىر
5 جىل سايىن جاڭعىرتىپ, جوندەپ وتىرۋ كەرەك. ال ءبىز تاۋەلسىزدىكتىڭ العاشقى جىلدارىندا, ونداعان جىل بويى جولدى جوندەي الماي, بارىنشا بۇزىپ الدىق, قازىر سونىڭ ازابىن تارتىپ وتىرمىز», دەدى ول. سونداي-اق ول جول جوندەۋ ماماندارىنىڭ جەتىسپەيتىنىن تىلگە تيەك ەتتى. قازىر جازدا اپتاپ ىستىقتا, قىستا ايازدا, ەكىنىڭ ءبىرى جول جوندەۋ جۇمىسىنا بارعىسى كەلە بەرمەيدى. ولاردىڭ ەڭبەكاقىسى دا ماردىمسىز. قاراپ تۇرساق, بۇل ءىستىڭ پروبلەماسى شاشەتەكتەن ەكەن. ءتيىستى ورىندار اقشانى بوسقا شاشا بەرمەي, ماسەلەنى شەشۋدىڭ ءتيىمدى جولدارىن جۇيەلەگەنى دۇرىس.
سولتۇستىك قازاقستان وبلىسى
