فوتولار: Maqsut Narikbayev University
اتالعان ۋنيۆەرسيتەتتىڭ ءباسپاسوز قىزمەتى ءمالىم ەتكەندەي بيىل MNU ستۋدەنتتەرى QAA ارقىلى اككرەديتتەلگەن, ياعني ۇلىبريتانيانىڭ جوعارى ءبىلىم بەرۋ ساپاسىنىڭ ستاندارتتارىنا سايكەس كەلەتىن ديپلومدارىن قولدارىنا الدى.
مەرەكە ءداستۇرلى تۇردە ۋنيۆەرسيتەتتىڭ ورتالىق فەميدا الاڭىندا ءوتتى. MNU پروۆوستى سەرگەي پەن ءبىرىنشى كەزەكتە ءسوز الىپ, تۇلەكتەردى ۋنيۆەرسيتەتتى اياقتاۋىمەن قۇتتىقتاپ, جىلى لەبىزىن ءبىلدىردى.
«بۇگىن ءاربىرىڭىزدىڭ جاھاندى جاقسارتۋعا اتسالىسا الاتىندىعىڭىزعا كەپىل بولاتىن ديپلومدارىڭىزدى قولدارىڭىزعا الاسىزدار. الەم تۇرعىندارىنىڭ سانى 8 ميلليارد بولسا, سىزدەر سولاردىڭ ىشىندەگى – 694 جۇيرىگىسىزدەر. سەبەبى سىزدەر – MNU تۇلەكتەرىسىزدەر. ءبىز بارشاڭىزعا سەنىم ارتىپ وتىرمىز, ال جەتىستىكتەرىڭىز جاقىندارىڭىزعا, ءبىزدىڭ ۋنيۆەرسيتەتكە ماقتانىش بولاتىنى انىق. ومىرلىك جانە كاسىبي جولدا دانالىق پەن ابىروي بيىگىنە كوتەرىلىڭىزدەر», دەدى سەرگەي پەن.
سونداي-اق MNU ستۋدەنتتەرى بار ىقىلاسپەن وتان ءۇشىن ەڭبەكتەنۋگە, پاتريوتيزم, ادالدىق پەن ادىلدىكتى العا تارتۋعا انت بەردى. ءداستۇر بويىنشا فەميدا ءمۇسىنىنىڭ جانىنداعى ورتالىق الاڭعا «جۇلدىز» قويىلىپ, بۇل تۇلەكتەر بۋىنى ۋنيۆەرسيتەت تاريحىنا ماڭگىلىككە ەندى.
ءىس-شارانىڭ ارنايى قوناعى, ءماجىلىس دەپۋتاتى ايداربەك حودجانازاروۆ تۇلەكتەردى قۇتتىقتادى.
«سىزدەر ۇزدىك ۋنيۆەرسيتەتتىڭ شاكىرتىسىزدەر! ەگەر ءسىز ءوز ورتاڭىزدىڭ ەڭ اقىلدىسى بولىپ كورىنسەڭىز, دەمەك, قورشاعان قاۋىمىڭىزدى وزگەرتۋىڭىز كەرەك. ءاردايىم وزىڭىزدەن الدەقايدا اقىلدى, تاجىريبەلى ادامدارمەن سويلەسىڭىز. بارشاڭىزعا باقىت تىلەيمىن. بۇل جاھان قانشا كەڭ كورىنگەنىمەن, سىزدەر الار اسۋ الدا!», دەدى ءماجىلىس دەپۋتاتى.
سالتاناتتى ءىس-شارا ساحناسىندا بەلگىلى ءانشى داستان ورازبەكوۆ ءان شىرقاپ, مەرەكەلىك كوڭىل-كۇي ۇستەدى.
