كوللاجدى جاساعان – قونىسباي شەجىمباي, «EQ»
كەيىنگى جىلدارى باۋىرلاس ەكى ەل اراسىنداعى تۋريستەر اعىنى ارتىپ كەلە جاتقانىن بايقاۋعا بولادى. ونىڭ ىشىندە زيارات ءتۋريزمى قارقىندى دامىپ كەلەدى.
تاياۋدا تۋريزم جانە سپورت ءمينيسترى ەرمەك مارجىقپاەۆ شىۇ-عا مۇشە مەملەكەتتەردىڭ تۋريزم اكىمشىلىكتەرى باسشىلارىنىڭ وتىرىسى اياسىندا وتكەن وزبەكستاننىڭ ەكولوگيا, قورشاعان ورتانى قورعاۋ جانە كليماتتىڭ وزگەرۋى ءمينيسترى ازيز ابدۋحاكيموۆپەن كەزدەستى. كەزدەسۋ بارىسىندا ەرمەك مارجىقپاەۆ قازاقستان مەن وزبەكستاننىڭ تۋريزم سالاسىنداعى ىنتىماقتاستىعى دامىپ كەلە جاتقانىن اتاپ ءوتتى. قازىرگى تاڭدا ترانسشەكارالىق ءتۋريزمدى دامىتۋعا باعىتتالعان بىرلەسكەن بىرنەشە جوبا ىسكە اسىرىلۋدا.
سونداي-اق مينيستر وزبەكستان اۋماعىندا يسلام مادەنيەتىنىڭ جانە يۋنەسكو-نىڭ بۇكىلالەمدىك مۇراسى رەتىندە تانىلعان كوپتەگەن قاسيەتتى مەكەنى بار ەكەنىنە توقتالدى. اتاپ ايتقاندا, الەمنىڭ تانىمال تۋريستىك جانە مادەني استانالارى سانالاتىن قوقان, شاحريسابز, سامارقاند سياقتى تاريحي قالالارى بار. قازاقستان مەن وزبەكستاننىڭ مەملەكەتتىك ورگاندارى مەن تۋريستىك كومپانيالارىنىڭ قاتىسۋىمەن قولعا الىنعان «تاباررۋك زيورات» جوباسى تەك قازاقستان ازاماتتارىن عانا ەمەس, باسقا ەلدەردەن كەلەتىن تۋريستەردى دە تارتۋعا ىقپال ەتەدى.
«وسى باعىتتاعى جۇمىستاردى جالعاستىرۋدى ۇسىنامىن. بىرلەسكەن ترانسشەكارالىق جوبالاردى ىسكە اسىرۋ قازاقستان مەن وزبەكستان اراسىنداعى تۋريستەر اعىنى وسۋىنە وڭ اسەر ەتەتىنىنە سەنىمدىمىن. «تاباررۋك زيورات» – ەجەلگى قالالار مەن ەسكەرتكىشتەردى عانا ەمەس, ەڭ باستىسى – تۇركى مەملەكەتتەرىنىڭ ورتاق تاريحىن بىرىكتىرەتىن بىرەگەي جوبا. كەيىنگى جىلدارى قازاقستاندا ماڭعىستاۋ وبلىسىنىڭ تۋريستىك الەۋەتى قارقىندى دامىپ كەلە جاتىر. ايماق ساياحاتشىلارعا ءوزىنىڭ سۇلۋ تابيعاتىمەن, كۋرورتتارىمەن عانا ەمەس, سونىمەن قاتار كوپتەگەن قۇپياسى بار باي تاريحىمەن دە قىزىقتى دەپ ويلايمىن. وسىعان بايلانىستى ماڭعىستاۋ وبلىسىن وزبەكستان وڭىرلەرىمەن بايلانىستىراتىن جاڭا باعىت ازىرلەۋدى, تۇراقتى تىكەلەي اۋە رەيس باعىتتارىن كەڭەيتۋ مۇمكىندىگىن قاراستىرۋ قاجەت», دەدى ەرمەك مارجىقپاەۆ.
