ارينە, ءسوز بوستاندىعىن زاڭمەن رەتتەۋگە بولادى, بىراق ەتيكانى ءاربىر باق ءوز ىشىندە قولعا الۋعا ءتيىس. قاجەت بولسا, ءاربىر رەداكتسيانىڭ ءوز ەتيكالىق كودەكسى بولعانى ءجون. سوندا عانا كەز كەلگەن جۋرناليست ءوز ميسسياسىنا ادال بولا الادى. ال ءوز ىسىنە ادال, ماماندىعىنىڭ ميسسياسىن بىلەتىن جۋرناليسكە «ماسس-مەديا تۋرالى» زاڭ ءسوز بوستاندىعىنا ەركىندىك, قورعالۋىنا مۇمكىندىك بەرسە, وتاندىق جۋرناليستيكانىڭ دامۋىنا سەرپىن الىپ كەلەدى.
مەنىڭ تۇسىنىگىمدە زاڭ ماماننىڭ جۇمىسىن شەكتەمەيدى, دامۋىنا مۇمكىندىك بەرەدى. سەبەبى جۋرناليست – قوعامنىڭ ءۇنىن جەتكىزۋشى. ۇشىنشىدەن, كەز كەلگەن مەملەكەتتىك ورگان, كەز كەلگەن اقپارات قولجەتىمدى ءارى اشىق بولۋعا ءتيىس. دەرەكتەردى الۋ اشىق بولعان كەزدە جۋرناليست ەشقانداي سۇرانىسحات جىبەرمەي, اقپاراتتى ەركىن الۋعا مۇمكىندىك تۋادى. قازىر ءبىز جەتى كۇن, بەس كۇن دەپ جاتىرمىز. شىندىعىندا, ءوزىن سىيلايتىن جانە سىيلاتا بىلەتىن, وسى ەلدىڭ زاڭىنا باعىناتىن كەز كەلگەن مەملەكەتتىك مەكەمە مەن جەكەمەنشىك قاۋىمداستىق جەدەل ءارى تەكسەرىلگەن اقپاراتتى ۇسىنا السا, ءوزى ءۇشىن دە پايدالى. شىن اقپارات شىقپاسا, ەرتەڭگى كۇنى جالعان اقپاراتتىڭ تاراپ كەتۋ قاۋپى باسىم. توتەنشە جاعداي كەزىندە وسىنداي كەلەڭسىزدىكتەردىڭ ءجيى قىلاڭ بەرىپ جاتاتىنى بار. سوندىقتان جاۋاپتى تەز بەرۋدىڭ ماڭىزدىلىعى جۋرناليسكە عانا ەمەس, مەملەكەتتىك ورگان ءۇشىن دە ماڭىزدى. دەمەك اقپاراتقا قولجەتىمدىلىك – اقپارات قۇرالدارىنىڭ بەدەلىن ارتتىرۋدىڭ تاعى ءبىر قۇرالى.
ەربولات مۇحامەدجان,
Maqsut Narikbayev University باسقارما توراعاسىنىڭ ورىنباسارى
