كوللاج: ulysmedia.kz
دەپۋتاتتىڭ ايتۋىنشا, كەشىرىم جاساۋ ماسەلەلەرى جونىندەگى كوميسسيا كارىم ءماسىموۆتىڭ ءىسى بويىنشا تالقىلاۋ جيىنىن وتكىزدى.
«قر پرەزيدەنتى جانىنداعى كەشىرىم جاساۋ ماسەلەلەرى جونىندەگى كوميسسيانىڭ مىندەتى – كەشىرىم جاساۋ تۋرالى ماتەريالداردى الدىن الا قاراۋ. كوميسسيا پرەزيدەنت جانىنداعى كونسۋلتاتيۆتىك-كەڭەسشى ورگان بولىپ سانالادى. كوميسسيانىڭ قىزمەتى مەملەكەت باسشىسىنىڭ جارلىعىمەن بەكىتىلگەن ارنايى ەرەجەمەن رەتتەلەدى. اپەللياتسيالىق شاعىم بەرىلگەننەن كەيىن, ول تىركەلەدى, سۇراۋلار ىشكى ىستەر مينيسترلىگىنىڭ قىلمىستىق ىزدەستىرۋ دەپارتامەنتىنە, باس پروكۋراتۋراعا جانە جوعارعى سوتقا جولدانادى», دەپ جازدى مارات ءباشىموۆ Facebook پاراقشاسىندا.
ول كەشىرىم جاساۋ جونىندەگى كوميسسيانىڭ قۇرامىنا ۇكىمەتتىك ەمەس ۇيىمداردىڭ وكىلدەرى, عالىمدار, ءتۇرلى ورگانداردىڭ وكىلدەرى, قازاقستانداعى ادام قۇقىقتارى جونىندەگى ۋاكىل, پرەزيدەنتتىڭ قۇقىقتىق ماسەلەلەر جونىندەگى كومەكشىسى, باس پروكۋروردىڭ ورىنباسارى جانە ىشكى ىستەر مينيسترلىگىنىڭ قىلمىستىق اتقارۋ كوميتەتىنىڭ توراعاسى كىرەتىنىن ناقتىلادى.
مارات ءباشىموۆ جازعانداي, كونستيتۋتسيانىڭ 44-بابىندا: «قازاقستان رەسپۋبليكاسىنىڭ پرەزيدەنتى: 15) ازاماتتارعا كەشىرىم جاسايدى» دەلىنگەن. بۇل ونىڭ عانا كونستيتۋتسيالىق قۇقىعى.
«كەز-كەلگەن ازامات مەملەكەت باسشىسىنا كەشىرىم جاساۋ تۋرالى وتىنىشپەن جۇگىنە الادى. كوميسسيانىڭ سوڭعى وتىرىسىندا كەشىرىم جاساۋ تۋرالى كەيبىر ماتەريالدار الدىن الا قارالدى. مەرزىمدى ەكى جىلعا قىسقارتۋ ارقىلى كەيبىر وڭ ۇسىنىستار قاراستىرىلعان. جۋرناليستەردىڭ ك.ماسىموۆكە راقىمشىلىق جاساۋ ماسەلەلەرىن قاراۋعا قاتىستى ساۋالىنا كوميسسيا ونى قابىلداماۋدى ۇسىندى», دەپ قوستى دەپۋتات.
ەسكە سالا كەتەيىك, 2024 جىلدىڭ ماۋسىم ايىندا مەملەكەتكە وپاسىزدىق جاساعانى ءۇشىن سوتتالعان قر ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆ راقىمشىلىق جاساۋ تۋرالى ءوتىنىش جازعانى حابارلانعان ەدى.
