استانا. 20 قاڭتار. استانالىق «بارىس» ءوز ايدىنىندا ۋفانىڭ «سالاۆات يۋلاەۆ» كومانداسىن قابىلداپ, 3:2 ەسەبىمەن جەڭىسكە جەتتى. بۇل تۋرالى vesti.kz حابارلادى.
ءبىرىنشى كەزەڭدە ەسەپ اشىلعان جوق. دەسەك تە, قوس تاراپتا دا شايبا سوعاتىن تاماشا مۇمكىندىكتەر بولدى. ماسەلەن, ويىننىڭ نەبارى ءۇشىنشى مينۋتىندا «بارىس» ساپىنان كونستانتين پۋشكارەۆ ءتارتىپ بۇزىپ, ەكى مينۋتقا ايدىننان قۋىلدى. ايتسە دە, بۇل باسىمدىقتى ۋفالىقتار پايدالانا المادى. ءوز كەزەگىندە, ايدىن يەلەرى دە ءدال وسىنداي ءۇش مۇمكىندىككە يە بولعانىمەن, تابلوداعى ەسەپ وزگەرىسسىز قالدى. كەزەڭ سوڭىندا «سالاۆات يۋلاەۆ» تاعى دا ويىنشىلار سانى جونىنەن باسىمدىققا يە بولدى. بۇل جولى «بارىس» قاقپاشىسى پاۆەل پولۋەكتوۆ شەبەرلىگىمەن كوزگە ءتۇسىپ, ءوز يەلىگىن گولدان امان ساقتاپ قالدى.
ۇزىلىستەن كەيىن اندرەي نازاروۆتىڭ شاكىرتتەرى جيناقىلىق تانىتىپ, شيراق قيمىلداۋعا كوشتى. ناتيجەسىندە, ويىننىڭ 34-مينۋتىندا رومان ستارچەنكو ەسەپ اشىپ, «قازاقستان» سپورت كەشەنىنە جينالعان جانكۇيەرلەردى قۋانىشقا بولەدى. ەكىنشى ۇزىلىسكە دەيىن ۋفادان كەلگەن كوماندا قانشا تىرىسقانىمەن, تارازى باسىن تەڭەستىرە المادى.
ءۇشىنشى كەزەڭ تاعى دا «بارىستىڭ» باسىمدىعىمەن باستالدى. تورەشى ىسقىرىعى ەستىلە سالىسىمەن شابۋىلعا ۇمتىلعان استانالىقتار كەۆين داللمەننىڭ ءدال سوققىسىمەن ەسەپتى ەسەلەدى. بۇل ويىننىڭ 41-مينۋتى ەدى جانە «بارىستىڭ» ويىنشى باسىمدىعىن پايدالانعانىن ايتا كەتكەن ءجون. ال داللمەنگە ناتيجەلى پاس شىعارعان برەندون بوچەنسكي بولدى. الايدا, دەر كەزىندە ەس جيعان قوناقتار ويىننىڭ 51 جانە 57-مينۋتتارىندا ەكى بىردەي شايبا سوعىپ, ەسەپتى تەڭەستىرىپ كەتتى. «سالاۆات يۋلاەۆ» ساپىنان كوزگە تۇسكەندەر, سايكەسىنشە, ەۆگەني سكاچكوۆ پەن انتون سلەپىشەۆ.
ويىننىڭ بىتۋىنە نەبارى ءبىر مينۋت قالعان كەزدە «بارىس» ساپىنان نيكولاي انتروپوۆ تاماشا سوققىسىمەن ەسەپتى 3:2-گە جەتكىزدى. كوك جولاقتىڭ بويىنان شايباعا يەلىك ەتكەن ول ءۇش بىردەي قورعاۋشىنى قاپى قالدىرىپ, قاقپانى ءدال كوزدەگەنىن ايتا كەتەيىك.
بۇل جەڭىسىنەن كەيىن «بارىس» قۇرلىقتىق حوككەي ليگاسىنىڭ شىعىس كونفەرەنتسياسىندا قايتادان 6-ورىنعا كوتەرىلدى. وسىعان دەيىن ەكى ويىن قاتارىنان جەڭىلگەن ولار 7-ورىنعا ءتۇسىپ قالعان بولاتىن. ەلوردالىق كوماندا كەلەسى ويىنىن 22 قاڭتار كۇنى نوۆوسيبيرسكىنىڭ «سيبير» كومانداسىنا قارسى وتكىزەدى. اتالمىش تارتىس استانادا وتەدى.
ەلامان قوڭىر.
دەرەك: vesti.kz.
سۋرەت: hcbarys.kz.
