وسكەمەن. 26 ءساۋىر. شىعىس قازاقستان وبلىسىنىڭ تۇرعىندارى سايلاۋعا ءبىر كىسىدەي قاتىسىپ, جوعارى ازاماتتىق بەلسەندىلىك تانىتۋدا. بۇل تۋرالى egemen.kz ءتىلشىسى حابارلادى.
وبلىس ورتالىعىنداعى گۋمانيتارلىق كوللەدجدە ورنالاسقان №79 سايلاۋ ۋچاسكەسىنە تاڭعى ساعات 7.00-گە جۋىق تۇرعىندار جينالىپ, ۋچاسكەنىڭ اشىلۋىن كۇتىپ تۇردى. سايلاۋ ۋچاسكەسى ەلىمىزدىڭ انۇرانىمەن اشىلدى. سايلاۋ ۋچاسكەسىنىڭ توراعاسى ەرلان قۇدايبەرگەنوۆ جينالعان قاۋىمعا داۋىس بەرۋ ءتارتىبى تۋرالى ءتۇسىندىرىپ, كوپشىلىك الدىندا بيۋللەتەندەردى شىعارىپ, داۋىس بەرىلگەن بيۋللەتەندەردى سالاتىن جاشىكتەردى مورلەدى.
بيىلعى سايلاۋدىڭ ەرەكشەلىگى, سايلاۋ ۋچاسكەلەرىنە ەلدەن بۇرىن كەلىپ داۋىس بەرگەن ازاماتتارعا, العاش رەت داۋىس بەرۋشىلەرگە جانە بالالارىمەن كەلگەن وتباسىلارعا سىيلىقتار ۇلەستىرىلدى. ساعات 9.00-دەن باستاپ بارلىق سايلاۋ ۋچاسكەلەرىندە وقۋشىلاردىڭ شىعارماشىلىق ءۇيى, «ءۇمىت» بالالار ءۇيى مەن ەتنومادەني ۇيىمداردىڭ شىعارماشىلىق ۇجىمدارىنىڭ قاتىسۋىمەن كونتسەرتتىك باعدارلامالار جانە كىشىگىرىم ساۋدا-ساتتىق ورىندارى ۇيىمداستىرىلدى.
سونداي-اق سايلاۋ ۋچاسكەسىنە داۋىس بەرۋگە كەلگەن تۇرعىن تىزىمنەن ءوزىن تابا الماعان جاعدايدا, كوميسسيا حاتشىلىعى ەكى مينۋتتىڭ ىشىندە حالىققا قىزمەت كورسەتۋ ورتالىعىنىڭ بازاسى ارقىلى انىقتاما قاعازىن شىعارىپ بەرۋ ارقىلى, كەدەرگىسىز داۋىس بەرۋگە مۇمكىندىك جاسادى. حالىقارالىق باقىلاۋشىلاردىڭ ايتۋىنشا, وڭىردە پرەزيدەنتتىك سايلاۋ بارىسى جوعارى قارقىنمەن وتۋدە. تمد بايقاۋشىلار ميسسياسىنىڭ وكىلى پەتر فريزەن تاڭەرتەڭگىلىكتەن بەرى بىرنەشە سايلاۋ ۋچاسكەلەرىن ارالاپ ۇلگەرگەنىن, ازىرگە ەشقانداي زاڭ بۇزۋشىلىق بايقالماعانىن جەتكىزدى.
دۋمان اناش.
دەرەك, سۋرەت: egemen.kz
