فوتو: اقوردا
«وزدەرىڭىزگە ءمالىم, قازىر ەلىمىز دامۋدىڭ جاڭا ساتىسىنا قادام باستى. ءبىز سوڭعى 5 جىلدىڭ ىشىندە اۋقىمدى ساياسي رەفورمالاردى جۇزەگە اسىردىق. قازاقستاننىڭ ساياسي جۇيەسى تۇبەگەيلى وزگەردى. پارلامەنتتىڭ ىقپالى, ۇكىمەتتىڭ جاۋاپكەرشىلىگى ايتارلىقتاي ارتتى. بيلىك تارماقتارى اراسىنداعى تەپە-تەڭدىك ورنىعا ءتۇستى. ساياسي پارتيالاردىڭ قوعامدىق ءرولى كۇشەيدى. ازاماتتارىمىز ءوز وي-پىكىرلەرىن اشىق ايتىپ, قوعامدا بەلسەندى بولۋىنا مۇمكىندىك بەرەتىن ناقتى تەتىكتەر پايدا بولدى. سايلاۋ جۇيەسىن جەتىلدىردىك. اۋىل, اۋدان اكىمدەرى تىكەلەي سايلانا باستادى. ساياسي جانە قوعامدىق مادەنيەت ۇلكەن وزگەرىسكە ۇشىرادى», دەدى مەملەكەت باسشىسى.
سونداي-اق مەملەكەت باسشىسى ەڭ ماڭىزدى باستامانىڭ ءبىرى – پرەزيدەنت جەتى جىلدىق مەرزىمگە ءبىر رەت قانا سايلاناتىنىن, وسى شەشىمنىڭ ساياسي ءمان-ماعىناسى ەرەكشە ەكەنىن, بۇل – مەملەكەت باسقارۋ ىسىندە جاڭا ستاندارت قالىپتاستىراتىن ماڭىزدى قادام ەكەنىن اتاپ ءوتتى.
«رەفورمالار, وزگەرىستەر ءالى دە جالعاسا بەرەدى. ەڭ باستىسى, بۇل وزگەرىستەر – حالىقتىڭ تاڭداۋى. سوندىقتان ءبىز ەشقاشان كەرى قايتپايمىز, تەك العا قاراي جۇرەمىز. ءبىز ەكونوميكالىق دامۋدىڭ ناقتى باعىتىن ايقىندادىق. وزىق ەل بولۋ ءۇشىن اۋقىمدى جۇمىستى قولعا الدىق. سىزدەر تىڭ باستامالاردى جۇرتشىلىققا جان-جاقتى تۇسىندىرۋگە زور ۇلەس قوستىڭىزدار. شىن مانىندە, بارلىق رەفورمانى وزدەرىڭىزبەن بىرگە اتقاردىق دەۋگە بولادى. بىراق وزگەرىستەردى جۇزەگە اسىرۋ ءبىر باسقا, ال ونى ورنىقتىرۋ ءبىر بولەك. ول ءۇشىن قوعامدىق سانا تۇبەگەيلى جاڭعىرۋعا ءتيىس», دەدى قاسىم-جومارت توقاەۆ.
مەملەكەت باسشىسى ۇلتتىق قۇرىلتايدىڭ اتىراۋداعى وتىرىسىندا جالپىعا ورتاق قۇندىلىقتار تۋرالى ايتقانىن ەسكە سالىپ, مۇنىڭ ءبارى ۇلتتىڭ جاڭا ساپاسىن قالىپتاستىرۋ ءۇشىن ايرىقشا ماڭىزدى ەكەنىن اتاپ ءوتتى.
«اشىعىن ايتساق, وسى قۇندىلىقتاردى قوعام ساناسىنا ورنىقتىرۋ جۋرناليستەرگە تىكەلەي بايلانىستى. اقپارات وكىلدەرى بولماسا, ونى جۇرتقا جاريا ەتۋ مۇمكىن ەمەس. سوندىقتان جۋرناليستەر قاۋىمى وسى ماڭىزدى جۇمىسقا زور جاۋاپكەرشىلىكپەن قارايدى دەپ سەنەمىن. ءبىز ءاربىر ءسوزىمىزدى قوعامدى تۇزەۋگە جۇمساساق, بولاشاعىمىز دا باياندى بولارى حاق. مەن قۇرىلتاي وتىرىسىندا ەلىمىزگە قاتەر توندىرەتىن بەس كەسەلگە توقتالدىم. تاعى دا قايتالاپ ايتقىم كەلەدى. جۇرتتى ناشاقورلىق پەن قۇمارپازدىقتان, تۇرمىستىق زورلىق-زومبىلىقتان, ۆانداليزم مەن ىسىراپشىلدىقتان قورعاۋ – ورتاق مىندەت. مەملەكەت بۇل باعىتتا ناقتى قادامدار جاساپ جاتىر», دەدى مەملەكەت باسشىسى.
