باس پروكۋرور سايلاۋعا بايلانىستى شىۇ-نىڭ باس حاتشىسىمەن كەزدەستى

استانا. 26 ءساۋىر. قازاقستاننىڭ باس پروكۋرورى اسحات داۋىلباەۆ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى بويىنشا شانحاي ىنتىماقتاستىق ۇيىمى بايقاۋشىلار ميسسياسىنىڭ باسشىسى, ءارى باس حاتشىسى دميتري مەزەنتسەۆپەن كەزدەستى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. اسحات داۋىلباەۆ ديتري مەزەنتسەۆكە ەلىمىزدەگى سايلاۋ ناۋقانىنىڭ زاڭدىلىعىن قامتاماسىز ەتۋ جانە سايلاۋ زاڭناماسىنىڭ بۇزۋشىلىقتارى تۋرالى وتىنىشتەردى قاراۋ بويىنشا جۇرگىزىلىپ وتىرعان جۇمىستار تۋرالى باياندادى. سونداي-اق, باس پروكۋرور قۇقىق قورعاۋ جۇيەسىن جاڭعىرتۋ بارىسى جانە قىلمىستىق زاڭنامانىڭ ارەكەت ەتۋ جاعدايىنداعى قۇقىق قورعاۋ ورگاندارىنىڭ جۇمىسىن, ادام قۇقىقتارىن قورعاۋدىڭ كەپىلدىكتەرىن كۇشەيتۋ سەكىلدى شارالار جونىندە ايتتى. ايتا كەتەيىك, اسحات داۋىلباەۆ كەزدەسۋ سوڭىندا دميتري مەزەنتسەۆتى وسى جىلى استانا قالاسىندا وتەتىن شىۇ-عا مۇشە مەملەكەتتەر باس پروكۋرورلارىنىڭ كەزەكتى وتىرىسىنا قاتىسۋعا شاقىردى. تالعات رايىمبەك. دەرەك, سۋرەت: قازاقستان رەسپۋبليكاسى باس پروكۋراتۋرسىنىڭ ءباسپاسوز قىزمەتى.