مادەني ءىس-شارا ەل پرەزيدەنتى ق.توقاەۆ پەن قحر توراعاسى سي ءتسزينپيننىڭ بىرلەسكەن مالىمدەمەسىنە سايكەس 2024 جىلى قىتاي حالىق رەسپۋبليكاسىنداعى قازاقستان رەسپۋبليكاسىنىڭ تۋريزم جىلىن اتاپ ءوتۋ تۋرالى ۋاعدالاستىعىن ىسكە اسىرۋ اياسىندا ءوتىپ وتىر.
ونەر كەشىنە قازاقستاننىڭ ەڭبەك سىڭىرگەن قايراتكەرلەرى ەلمۇرا جاڭابەرگەن, ارداق بالاجانوۆا, سالتانات احمەتوۆا, مەدەت چوتاباەۆ, مادەنيەت قايراتكەرى ەربولات شالدىبەكوۆ, حالىقارالىق جانە رەسپۋبليكالىق كونكۋرستاردىڭ لاۋرەاتى ءادىلحان ماكين, سونداي-اق «گۇلدەر» جانە «استانا سازى» انسامبلدەرى قاتىستى.
ونەرپازدار ءداستۇرلى جانە زاماناۋي ۇلت مادەنيەتى مەن رۋحانياتىن تانىستىرىپ, وتاندىق كومپوزيتورلار مەن حالىق اندەرىن شىرقاپ, قازاقتىڭ كيەلى قارا دومبىراسى مەن قىلقوبىزى ارقىلى ۇلتتىق ونەرىمىزدى قىتاي جۇرتشىلىعىنا پاش ەتتى.
بەلگىلى وتاندىق ورىنداۋشىلاردىڭ قاتىسۋىمەن وتەتىن مۋزىكالىق كەش ونەرسۇيەر قاۋىم ءۇشىن ناعىز مەرەكە بولدى. سالتاناتتى كونتسەرت بەيبىتشىلىك پەن كەلىسىمدى ماقسات تۇتقان كورشى حالىقتاردىڭ ەكىجاقتى قاتىناسىنىڭ دامۋىنا سەرپىن بەرىپ, ۇلتتار دوستىعى مەن سىيلاستىعىنىڭ ارتۋىنا قوسىلعان ۇلەس ىسپەتتەس ەكەنى انىق.
ايتا كەتەيىك, گاسترولدىك ساپار مادەنيەت جانە اقپارات مينيسترلىگىنىڭ, سىرتقى ىستەر مينيسترلىگىنىڭ جانە ديپلوماتيالىق وكىلدىكتەردىڭ قولداۋىمەن جۇزەگە اسىرىلىپ وتىر.
