اقتوبەدە جول قوزعالىسى ەرەجەلەرى بۇزىلۋىنىڭ 1303 فاكتىسى انىقتالدى

اقتوبە. 20 قاڭتار. اقتوبەدە «اۆتوبۋس» اكتسياسى بارىسىندا جول قوزعالىسى ەرەجەلەرى بۇزىلۋىنىڭ 1303 فاكتىسى انىقتالدى. بۇل تۋرالى egemen.kz ءتىلشىسى حابارلادى. ۇستىمىزدەگى جىلعى 15-17 قاڭتار ارالىعىندا ىشكى ىستەر دەپارتامەنتى اكىمىشىلىك پوليتسيا باسقارماسىنىڭ قىزمەتكەرلەرى اقتوبە وبلىسى اۋماعىندا «اۆتوبۋس» جەدەل-الدىن الۋ ءىس-شاراسىن وتكىزدى. اتالعان ءىس-شارانىڭ ماقساتى – جولاۋشىلار كولىكتەرىنىڭ اپاتتىلىعىن ەسكەرتۋ جانە جول قوزعالىسى قاۋىپسىزدىگىن قامتاماسىز ەتۋ. ءىس-شارا اياسىندا جولاۋشىلار مەن جۇكتەردى جۇيەلى جانە جۇيەسىز تاسىمالداۋدى جۇزەگە اسىرۋعا رۇقسات قۇجاتتارىنىڭ بار-جوعى, اۆتوبۋستىڭ تەحنيكالىق جاعدايى جانە ولاردىڭ بەكىتىلگەن تالاپتارعا سايكەستىگى, اۆتوبۋس جۇرگىزۋشىلەرىنىڭ رەيس الدى مەديتسينالىق جانە تەحنيكالىق تەكسەرۋدەن وتۋىنە باستى نازار اۋدارىلدى. «اۆتوبۋس» پروفيلاكتيكالىق ءىس-شاراسىن وتكىزۋ بارىسىندا اكىمىشىلىك پوليتسيا باسقارماسىنىڭ جەكە قۇرامى بارلىعى 1303 جول قوزعالىسى ەرەجەلەرىن بۇزۋشىلىقتى, ونىڭ ىشىندە جىلدامدىقتى اسىرۋ ەرەجەسى بۇزىلۋىنىڭ 50 دەرەگىن, 17 ماس كۇيىندە كولىك قۇرالىن باسقارۋ دەرەگىن جانە باسقا جول قوزعالىسى ەرەجەلەرىن ساقتاماۋشىلىقتاردى انىقتادى. انىقتالعان جول قوزعالىسى ەرەجەلەرىن بۇزعان جۇرگىزۋشىلەر اكىمشىلىك جاۋاپكەرشىلىككە تارتىلاتىن بولادى. ساتىبالدى ءساۋىرباي. دەرەك: egemen.kz. سۋرەت: idrive.kz.