قاجىمۇقاننىڭ ءرولىن سومداعان اكتەر الەۋحان بەكبولات ۇلى قايتىس بولدى

استانا. 20 قاڭتار. وراسان كۇشتىڭ يەسى, كۇرەستىڭ بىرنەشە تۇرىنەن الەم چەمپيونى اتانعان تۇڭعىش قازاق الىبى, تەڭدەسسىز ونەرىنىڭ ارقاسىندا جەر شارىن ارالاپ, 28 مەملەكەتتە كۇرەسكە ءتۇسىپ, 56 مەدال ولجالاعان ايگىلى قاجىمۇقان پالۋاننىڭ ءرولىن سومداعان بەلگىلى اكتەر الەۋحان بەكبولات ۇلى كەشە 60 جاسىندا جۇرەك اۋرۋىنان كوز جۇمدى. بۇل تۋرالى «قازاقپارات» حابارلادى. دۇنيە ءجۇزىنىڭ چەمپيوندارى يۆان پوددۋبنىي, يۆان شەمياكين, الەكس ابەرگ, يۆان زايكين, گەورگ لۋريح, گەورگ گاككەنشميدت, پول پونس, ۆەيلاند شۋلتس سىندى جامپوزدارمەن قاتار جۇرگەن قازاقتىڭ اتاقتى پالۋانىنىڭ رولىندە ويناۋ ەكىنىڭ ءبىرىنىڭ قولىنان كەلە بەرمەيدى. الەۋحان بەكبولات ۇلى قىزىلوردا وبلىسى جاڭاقورعان اۋدانىندا 1955 جىلى تۋعان. سوم دەنەلى, سۇڭعاق بويلى ازامات كۇرەسكە بەيىمدىلىگىنىڭ ارقاسىندا 200-دەن استام ۇمىتكەردىڭ ىشىنەن تاڭداپ الىنىپ, قاجىمۇقان رولىندە ويناۋعا مۇمكىندىك العان-دى. مارقۇمدى اقتىق ساپارعا شىعارىپ سالۋ ءراسىمى بۇگىن 12:30-دا قاراعاندى تراسساسىنداعى ەر كوكشە كوشەسىندە «رايىمبەك» ءدامحاناسىندا وتەدى. ايدار ورىسباەۆ. دەرەك: «قازاقپارات». سۋرەت: kino-teatr.ru.