كورمەدە نەگىزىنەن قوستانايلىق سۋرەتشىلەر سالعان سوعىس ارداگەرلەرىنىڭ, ۇلى وتان سوعىسى باتىرلارىنىڭ پورترەتتەرى كورەرمەن نازارىن بىردەن جاۋلايدى. سونىمەن قاتار جەرگىلىكتى فوتوگرافتار شىعارمالارى دا كورمەدەن ورىن الدى.
كورمەنىڭ اشىلۋىنا سوعىس ارداگەرلەى شاقىرىلىپ, ولارعا قۇرمەت كورسەتىلدى. كورمەنى ۇيىمداستىرعان وبلىستىق تاريحي-ولكەتانۋ مۋزەيىنىڭ قىزمەتكەرلەرى كورمەگە كەلۋشىلەرگە مايداننان جازىلعان حاتتاردىڭ كوشىرمەسىن تاراتتى. مۋزەيدىڭ عىلىمي قىزمەتكەرلەرىنىڭ مالىمەتىنشە, مايداننان كەلگەن 60 حاتتىڭ تۇپنۇسقاسى ساقتاۋلى. مۋزەي مايداننان ساعىنىشقا تولى حاتتاردىڭ مىڭعا جۋىق كوشىرمەسىن قوستانايلىقتارعا تاراتتى. كورەرمەندەر ءۇشبۋ حاتتاردى قۋانا الىپ, تولقي وقىدى, ساقتاپ قويۋعا ۋادە ەتتى. كورمەدە كەلۋشىلەر تەك سۋرەتتەردى تاماشالاعان جوق, كوركەمونەرپازدار ولاردى پاتريوتتىق جانە سوعىس جىلدارىنداعى اندەرمەن قارسى الدى.
وبلىستىق ارداگەرلەر كەڭەسىنىڭ توراعاسى كەنجەبەك ۋكين: «جەڭىستىڭ 70 جىلدىق مەرەكەسى دە ەسىك قاعىپ تۇر. بۇل جەڭىس حالقىمىزعا وڭايلىقپەن كەلگەن جوق. قوستاناي وبلىسىنان باسقاسىن ايتپاعاندا 1268 ايەل مايدانعا اتتتاندى. ال تىلدا دا ەڭبەك مايدانى ءجۇرىپ جاتتى. وتان ءۇشىن بارلىعى دا ولىمگە باس تىكتى. سوندىقتان جەڭىس ونەر تاقىرىبىنا اينالىپ كەلەدى. سوعىس — ماڭگىلىك تاقىرىپ», دەدى. كورەرمەندەر قوستانايلىق قىلقالام شەبەرلەرى گەورگي سوكوۆتىڭ, ولەگ كۋسكوۆتىڭ, نيكولاي ءتورشيننىڭ, ۆاديم بىكوۆتىڭ سوعىس تاقىرىبىنا جازعان شىعارمالارىن تاماشالادى.
ءنازيرا جارىمبەتوۆا.
دەرەك: egemen.kz سۋرەت: ng.kz
