مۇحيت سايلاۋ ۇلى باسقاراتىن ءوڭىر – حالىق سانىنان دا, جەر بەدەرى جاعىنان دا ەڭ ۇلكەن اۋدان. مۇحيتتىڭ شەتكە اكىم بولىپ كەلگەنىنە ءتورت جىلدان استى. ەندى عانا اكىم بوپ تاعايىندالعان ەدى, كوۆيد ىندەتى كوپ شارۋانى ىركىدى. بىراق اۋىل-ايماقتاعى ماسەلەلەردىڭ ءبارىن ىشتەن بىلەتىن مۇحيت سايلاۋ ۇلى اۋدان ينفراقۇرىلىمىن دامىتامىن دەپ ءوز-وزىنە ۋادە بەرگەن. پرەزيدەنتتىڭ اۋىلدى كوتەرۋ جونىندەگى پارمەندەرىن, وبلىس باسشىسىنىڭ وسى تۇرعىداعى تاپسىرمالارىن ءساتتى ورىنداپ وتىر.
اۋدان باسشىسى – وسى وڭىردە ءوسىپ-ونگەن ازامات. ەڭبەك جولىن وسىنداعى اكىمشىلىكتەن باستاعان ول مەملەكەتتىك قىزمەتتىڭ بىرنەشە باسپالداعىنان وتەدى. العاشقى ەڭبەك جولى دا قىزىق باستالادى. اكەسى قالادا جۇرگەن ۇلىن جۇمىسقا ورنالاستىرامىن دەپ, اۋىلعا شاقىرىپ الادى. سول كەزدە اۋدان اكىمىنىڭ ورىنباسارىنا جۇرگىزۋشى قاجەت بولىپ, وعان ءوتىنىش جازادى. اكىمشىلىك قىزمەتكەرلەرى مۇحيت سايلاۋ ۇلىنىڭ «ينجەنەر-مەحانيك» ماماندىعى بويىنشا ديپلومى بارىن كورىپ, ءوندىرىس بولىمىنە مامان بولىپ ءوتىنىشىن قايتا جازدىرادى. سول كەزدەن باستاپ, مەملەكەتتىك قىزمەتتىڭ قازانىندا قاينايدى. تاجىريبە جيناقتايدى. قۇرىلىس, ساۋلەت جانە كوممۋنالدىق شارۋاشىلىق بولىمىندە دە ەسەلى ەڭبەك ەتەدى. ابدەن قىزمەتتىڭ ماشاقاتىن سەزىنگەن مامانعا ونەركاسىپ جانە كاسىپكەرلىك ءبولىمىن تاپسىرادى. ونى دا ويداعىداي باسقارادى. كەلە-كەلە اۋدان اكىمى اپپاراتىنا جەتەكشىلىك ەتەدى. قازىرگى باسشىلىق قىزمەتىنە دەيىن اۋدان اكىمىنىڭ ورىنباسارى بولادى. ءسويتىپ, 1997 جىلدان بەرى مەملەكەتتىك قىزمەتتىڭ ىستىق-سۋىعىن كورىپ كەلەدى.
ءاۋ باستا ايتا كەتكەنىمىزدەي, جاڭا تاعايىندالعان اكىمنىڭ الدىندا ينفراقۇرىلىمدى دامىتۋ ارقىلى اۋدان جۇرتشىلىعىنا يگىلىك سىيلاۋ مىندەتى تۇردى. قىزمەتىنە كىرىسە سالىسىمەن بۇرما اۋىلىنداعى سۋ قۇبىرىن قايتا جاڭارتادى. اقسۋ, قىزىلتاۋ, اقباۋىر, قىزىلقوي, بەكەت, ەركىندىك, اقوي, وسپەن اۋلىنا سۋ قۇبىرىن تارتادى. «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا بىرنەشە اۋىل جۇرتى ساپالى اۋىز سۋمەن قامتىلادى. ال بيىل ۇلتتىق قوردان 310 ملن تەڭگە كولەمىندە قارجى ءبولىنىپ, اقسۋ-ايۋلى اۋىلدىق وكرۋگىنىڭ ەڭبەكشىل اۋلىندا تازا اۋىزسۋ جۇيەسىنىڭ قۇرىلىسى باستالدى. بۇل جۇمىس كەلەر جىلى اياقتالىپ قالادى. مۇنىمەن بۇل باعىتتاعى جۇمىس توقتاپ قالمادى. كوكتىڭكولى وكرۋگىنە قاراستى 56-رازەزد بەن ءاليحان اۋىلدارىنا سۋ قۇبىرى تارتىلادى. جوبانىڭ سمەتالىق قۇجاتتارى تولىعىمەن جاسالدى. بيىل شوپا, ك.مىڭباەۆ, قارمىس, اقتوبە, قايراقتى اۋىلدارىنا كەشەندى-بلوك ءمودۋلى قويىلادى. اقشاتاۋ كەنتىنە سۋ نىسانىن ورناتۋعا 20 ملن قاراستىرىلىپ وتىر.
جول ماسەلەسى دە جولعا قويىلىپ كەلەدى. اۋدان ورتالىعى اقسۋ-ايۋلى اۋىلىنىڭ ءۇش باستى كوشەسىنە اسفالت توسەلدى. «اۋىل – ەل بەسىگى» جوباسى اياسىندا كوپتەگەن اۋىلدىڭ ءىشى اسفالتتالدى. ينفراقۇرىلىممەن يگىلىك اكەلەمىن دەگەن نەگىزگى كۇش سالعان جۇمىستارى – وسى.
اۋدان اكىمى كوممۋنالدىق شارۋاشىلىقتىڭ قىر-سىرىن ابدەن مەڭگەرىپ العان. ماسەلەن, اۋدان ورتالىعىندا بۇرىن-سوڭدى مۇلدەم بولماعان كارىز جۇيەسىنىڭ قۇرىلىسى باستالعالى تۇر. قازىر ەلەكتر جەلىلەرى تارتىلىپ جاتىر. كەلەر جىلى قۇرىلىس جۇمىسى اياقتالىپ, ەل-جۇرت يگىلىگىن كورەدى. ەل اراسىندا بۇل دا مۇحيت اكىمنەن قالعان ىزگى ءىز بولىپ ايتىلادى.
بىلۋىمىزشە, مۇحيت مىرزا ۇنەمى اۋىل-اۋىلدى ارالاپ, توسەلىپ جاتقان اسفالتتى, سالىنىپ جاتقان الەۋمەتتىك ماڭىزى بار نىسانداردىڭ جۇمىسىن قاداعالاپ كەلۋدى قاعيدات ەتىپ العان. تاعى ءبىر ەرەكشەلىگى – جوبا قۇجاتتارىن جاتقا سوعادى. سالىنىپ جاتقان مەكتەپ, فاپ, سپورت كەشەنى, جول بولسىن, قانشا قاراجات بولىنگەنى, مەردىگەر ۇيىمعا بەرىلگەن مەرزىمدى, قۇرىلىس ماتەريالدارى سەكىلدى قاجەتتىلىكتەردىڭ ءبارىن ءبىر وقىپ وتكەننەن-اق, ساناسىنا ساقتاپ الاتىن قابىلەتى بار.
مۇحيت اكىمنىڭ ەل باسقارۋداعى تاعى ءبىر ءتيىمدى تەتىگى – ءىرى ينۆەستورلار تارتۋىندا. سول ارقىلى ول حالىقتىڭ ءال-اۋقاتىن جاقسارتىپ, اۋدان ەكونوميكاسىنىڭ دامۋ ديناميكاسىن جوعارىلاتاتىن ەدىك دەيدى. ءوزى قىزمەتكە كىرىسكەلى بەرى اۋدان بويىنشا جۇمىس ىستەپ تۇرعان كاسىپورىنداردان بيۋدجەتكە 207,5 ملرد تەڭگە كولەمىندە ينۆەستيتسيا قۇيىلعان. الداعى 2024-2026 جىلى ينۆەستيتسيالىق جوبالاردان 130 ملرد تەڭگە كاپيتالعا تۇسەدى دەيدى.
اۋدان كولەمىندە مەديتسينا, ءبىلىم, مادەنيەت, سپورت سالاسى بويىنشا دا اتقارىلىپ جاتقان جۇمىستار اۋقىمدى. ءبىزدىڭ مۇحيت اكىمنىڭ ەل باسقارۋداعى باستى باعىتىن جەتكىزگىمىز كەلدى. ول – جول مەن سۋ.
– شىنى كەرەك, جيىن-تويلاردان گورى ءوزىمدى ەل ىشىندە جۇرگەندە ەركىن سەزىنەمىن. كادىمگى قايناپ جاتقان جۇمىستاردىڭ بەل ورتاسىندا ءجۇرىپ, ولاردى باقىلاپ جۇرگەن ۇنايدى. مۇمكىن, مەملەكەتتىك قىزمەتتەگى جىلدار بارىسىندا سونى كورىپ شىڭدالعاننان بولار. ۇنەمى اۋىلداردى ارالايمىن. كابينەتتە قامالىپ وتىرعاننان, جۇمىس ونبەيتىندەي كورىنەدى. ونبەيدى دە. ەلدى كوتەرۋ ەڭ اۋەلى اۋىلدى كوتەرۋدەن باستالادى. ءبىزدىڭ موينىمىزدا وسىنداي ۇلكەن جۇك تۇر. اۋىل جۇرتىنىڭ سۇرايتىنى – اۋىزسۋ مەن جول. ءالى دە اتقاراتىن جۇمىسىمىز كوپ, ماسەلەمىز دە جەتەرلىك, – دەيدى اكىم.
اكىم باسپانا ماسەلەسىن شەشۋدى كۇن تارتىبىنەن تۇسىرمەيدى. اقادىر كەنتى مەن اقسۋ-ايۋلى اۋىلىنداعى ءۇي كەزەگىن ازايتساق دەگەن ارمانى بار. سول سەبەپتى دە جىل سايىن جاڭا ءۇيدىڭ كىلتىن كەزەكتە تۇرعاندارعا تابىستايدى. اقسۋ-ايۋلى اۋلىنىڭ شەتىنەن جاڭا شاعىن اۋدان بوي كوتەرۋدە. قاز-قاتار جاڭا ۇيلەر سالىنىپ, باسپانا كەزەگى ءبىرتىن-ءبىرتىن قىسقارا بەرەدى.
«اكىم بولۋدىڭ قيىندىعى الدىڭا كومەك سۇراپ كەلگەن جانعا قول ۇشىن بەرە الماي, ماسەلەسىن شەشە الماعانىڭدا قاتتى سەزىلەدى. شەشكىڭ كەلمەگەندىكتەن ەمەس, شىنىمەن قولىڭنان كەلمەي قالاتىن كەز بولادى. الدىمىزعا ءۇي سۇراپ كەلگەن انالاردىڭ جانارىن كورىپ جانىڭ اۋىرادى. سول سەبەپتى قاندايدا ءبىر قاراجاتتىڭ كوزىن تابا قالساق, تۇرعىن ءۇي ماسەلەسىن شەشۋگە بۇرىپ جاتىرمىز. بارىمىزدى باسپانا كەزەگىن ازايتۋعا سالامىز», دەيدى مۇحيت سايلاۋ ۇلى.
راس, جالپى اكىم اتاۋلىعا جۇكتەلگەن مىندەت جەتىپ ارتىلادى. مۇنشاما مىندەتتى ءمىنسىز اتقارا ءبىلۋ ەكىنىڭ ءبىرىنىڭ قولىنان كەلمەيدى. اۋدان باسشىسىنىڭ موينىندا قانشاما قازاق اۋلىنىڭ سەنىمى جاتىر. سول سەنىم ۇدەسىنەن شىعا ءبىلۋدى سەرت ەتكەن مۇحيت سايلاۋ ۇلىنىڭ اكىم بولىپ, ەل باسقارۋداعى باعىتىن ءبىز وسىلاي باعامدادىق. باعاسىن حالىق بەرەدى.
«شىنى كەرەك, مەملەكەتتىك قىزمەتتە ءجۇرىپ, بالالارىمىزدىڭ قالاي ءوسىپ كەتكەنىن بىلمەي قالدىق», دەيدى اكىم. اكىمنىڭ جارى سەكەر قوجانقىزى دا الەۋمەتتىك سالادا ۇزاق جىل قىزمەت ەتكەن. كەيىن ۇيدەگى بالالارىنا كوڭىل بولەيىن دەپ جۇمىسىن توقتاتادى. مۇحيت سايلاۋ ۇلى ەكەۋى التى بالا تاربيەلەپ وتىر. ۇلدارى نۇرداۋلەت – قازاق كۇرەسى جانە دزيۋدودان سپورت شەبەرىنە ۇمىتكەر. بوزكىلەمدە بەلدەسىپ ءجۇر. بۇل قاسيەت اكىم اكەسىنەن دارىعان دەسە دە بولادى. ويتكەنى جاس كەزىندە بوكسپەن اينالىسقان. ال قازىر ۇيىندە كۇنارا تەمىر-تەرسەك كوتەرىپ, جاتتىعادى. سپورت – سەرىگى. قولى قالت ەتكەندە بيليارد وينايدى. بۇل ويىن ادام ويىن ۇتقىرلىققا, دالدىككە شىنىقتىرىپ, بويىن سەرگىتەدى. سوندىقتان بولار, شەت اۋدانىنىڭ شارۋاگەر اكىمى قاي ءىستىڭ باسىندا بولماسىن سەرگەك جۇرەدى.
قاراعاندى وبلىسى,
شەت اۋدانى
