قوستانايدا ءتورت ايلىق بالاعا سيرەك وتا جاسالدى

قوستاناي. 26 ءساۋىر. قوستاناي وبلىستىق بالالار اۋرۋحاناسىندا ءتورت ايلىق سابيگە  وڭىردە بۇرىن جاسالماعان ەرەكشە  وتا جاسالدى. دارىگەرلەر بالانىڭ تىنىسىن بىتەپ تاستايتىن تاڭدايداعى جارعاقشانى الىپ تاستادى. بۇل تۋرالى alau.kz حابارلادى. كىشكەنتاي اسقار ارداق وسىدان ءبىر اي بۇرىن ناۋىرزىم اۋدانىنان كەلگەن بولاتىن.  العاشقىدا دارىگەرلەر قولقاسىنا سۋىق تيگەن دەپ ويلادى.  قانشا ەمدەگەنمەن بالانىڭ جاعدايى  ناشارلاي بەردى. دارىگەرلەر بالانىڭ تاڭدايىندا  جارعاقشا بار ەكەندىگىن انىقتاعان سوڭ, بىردەن  وتا جاساۋ كەرەك دەپ شەشتى. ءسابيدىڭ تىنىس جولىنىڭ بىتەلۋىنە  ەكى ميلليمەتر عانا ساڭىلاۋ  قالدى. بۇرىن مۇنداي وتا ءتۇرى وبلىستا جاسالمايتىن. استانادان سانيتارلىق اۆياتسيامەن تاجىريبەلى دارىگەر الدىرىلدى. وبلىستىق بالالار اۋرۋحاناسى باس  دارىگەرىنىڭ ورىنباارى ولگا سون: «ءبىز دياگنوزدى قويعاندا «انا مەن بالا ۇلتتىق ورتالىعىنداعى» ماماندارمەن حابارلاستىق. ونداعى لور دارىگەر وسىنداي كۇردەلى ناۋقاستاردى قارايتىن ەلىمىزدەگى بىردەن ءبىر مامان», دەدى. وسىنشا كۇردەلى وپەراتسيا  دارىگەرلەردىڭ بار-جوعى ون مينۋت عانا ۋاقىتىن الدى. قازىر بالانىڭ جاعدايى جاقساردى, ول  جان ساقتاۋ بولىمىنەن پالاتاعا  اۋىستىرىلدى. دارىگەرلەردىڭ  ايتۋىنشا, بالانىڭ ومىرىنە ەشقانداي قاۋىپ جوق. وبلىستىق بالالار اۋرۋحاناسىنىڭ دارىگەرلەرى ەندى مۇنداي وتانى وزدەرىنىڭ دە جاساي الاتىندىعىن ايتىپ وتىر. ءنازيرا جارىمبەتوۆا. دەرەك, سۋرەت: alau.kz