كەزدەسۋ بارىسىندا حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرىن, سونداي-اق قازاقستاننىڭ ۇقشۇ-عا توراعالىعى كەزىندەگى باسىمدىقتاردى ورىنداۋ جونىندەگى شارالاردى ىسكە اسىرۋ بارىسى تالقىلانادى.
وتىرىس قورىتىندىسى بويىنشا ۇيىم قىزمەتىن ودان ءارى جەتىلدىرۋگە باعىتتالعان قۇجاتتارعا قول قويىلىپ, بىرقاتار ساياسي مالىمدەمە قابىلدانادى دەپ كۇتىلۋدە. «كەزدەسۋگە رەسەي سىرتقى ىستەر ءمينيسترى سەرگەي لاۆروۆ قاتىسادى», دەپ حابارلادى رف ءسىم رەسمي وكىلى ماريا زاحاروۆا.
بۇعان دەيىن ارمەنيا سىرتقى ىستەر ءمينيسترى ارارات ميرزوياننىڭ بۇگىنگى كەزدەسۋگە قاتىسپايتىنى بەلگىلى بولدى.
ەسكە سالايىق, ماۋسىم ايىنىڭ باسىندا قازاقستان پرەزيدەنتى قاسىم-جومارت توقاەۆ ۇقشۇ باس حاتشىسى يمانعالي تاسماعامبەتوۆتى قابىلدادى. مەملەكەت باسشىسى اتاپ وتكەندەي, ۇيىم تەرروريزم, ەسىرتكى جانە قارۋ-جاراق اينالىمى, اقپارات سالاسىنداعى قىلمىستار سياقتى سىن-قاتەرلەر مەن قاۋىپ-قاتەرلەرگە قارسى تۇرۋعا ەرەكشە نازار اۋدارۋى كەرەك.
ۇقشۇ: تاريحى جانە قاتىسۋشىلارى
ۇجىمدىق قاۋىپسىزدىك تۋرالى شارتتى ۇيىمداستىرۋ 1992 جىلى 15 مامىردا تاشكەنتتە (وزبەكستان) قازاقستان, رەسەي, ارمەنيا, قىرعىزستان, تاجىكستان جانە وزبەكستان مەملەكەتتەرىنىڭ باسشىلارى قول قويعان ۇجىمدىق قاۋىپسىزدىك تۋرالى شارتتى جاساۋ كەزەڭىنەن باستالادى. كەيىن وعان ازەربايجان, بەلارۋس جانە گرۋزيا قوسىلدى (1993). شارت 1994 جىلعى 20 ساۋىردە راتيفيكاتسيالاۋ راسىمدەرى اياقتالعاننان كەيىن كۇشىنە ەندى.
1999 جىلى قازاقستان, رەسەي, ارمەنيا, بەلارۋس, قىرعىزستان جانە تاجىكستان ۇجىمدىق قاۋىپسىزدىك تۋرالى شارتتىڭ قولدانىلۋ مەرزىمىن ۇزارتۋ تۋرالى حاتتاماعا قول قويدى, ونىڭ نەگىزىندە قاتىسۋشى ەلدەردىڭ جاڭا قۇرامى قالىپتاستىرىلدى جانە شارتتى بەس جىلدىق مەرزىمگە ۇزارتۋدىڭ اۆتوماتتى ءتارتىبى قۇرىلدى (ازەربايجان, گرۋزيا جانە وزبەكستان شارتتاعى مۇشەلىكتەرىن توقتاتتى). 2002 جىلى 14 مامىردا ماسكەۋدە ۇجىمدىق قاۋىپسىزدىك كەڭەسى ۇجىمدىق قاۋىپسىزدىك شارتىنا حالىقارالىق ايماقتىق ۇيىم مارتەبەسىن بەرۋ تۋرالى شەشىم قابىلدادى.
