تاسقىن سۋ كەلىپ باسقاندا جالعىز-اق ادام ءوزىنىڭ ساقتانباعان سەبەبىنەن سۋعا كەتسە, ەندى سۋعا وزدەرى بارىپ تۇسكەندەر اراسىنان اينالاسى 4 كۇندە ءۇش ادامنىڭ سۋعا كەتكەنى وبلىس باسشىلارى مەن توتەنشە جاعداي قىزمەتىن تۇيىققا تىرەپ وتىر. وسىعان وراي وبلىس اكىمى عاۋەز نۇرمۇحامبەتوۆ سۋعا ءتۇسۋ قاۋىپسىزدىگىن قامتاماسىز ەتۋ ماسەلەلەرى بويىنشا شۇعىل كەڭەس وتكىزدى. ايماق باسشىسى سولتۇستىكقازاقستاندىقتارعا سۋعا شومىلۋ كەزىندە قاۋىپسىزدىك ەرەجەلەرىن قاتاڭ ساقتاۋ تۋرالى ۇندەۋ جاريالادى. «قايعىلى وقيعالاردىڭ نەگىزگى سەبەپتەرى جابدىقتالماعان جەرلەردە سۋعا ءتۇسۋ, ماس كۇيىندە شومىلۋ جانە بالالارعا قاداعالاۋدىڭ بولماۋىنان. وبلىس بويىنشا جاپپاي شومىلۋ ءۇشىن بارلىعى 60 ورىن انىقتالعان. سۋعا ءتۇسۋ ماۋسىمىن قاۋىپسىز وتكىزۋ ءۇشىن اۋداندار مەن پەتروپاۆل قالاسىنىڭ اكىمدەرىنە ارنايى جابدىقتالماعان قاۋىپتى جەرلەرگە تىيىم سالاتىن جانە ەسكەرتەتىن بەلگىلەر ورناتۋدى تاپسىرامىن», دەدى ع.نۇرمۇحامبەتوۆ. سونىمەن قاتار ول قۇتقارۋ قىزمەتىنە پوليتسيا دەپارتامەنتى جانە ۇلتتىق ۇلانىنىڭ بولىمشەلەرىمەن بىرلەسە وتىرىپ, 6637 اسكەري ءبولىمى جەكە قۇرامىنىڭ پاترۋلدىك مارشرۋتتارىن سۋ قويمالارىنداعى كوپشىلىك دەمالىس ورىندارىنا بارىنشا جاقىنداتۋدى تاپسىردى. سونداي-اق وبلىس اكىمى بارلىق جاۋاپتى مەملەكەتتىك ورگاندارعا تۇرعىندارمەن الدىن الا جۇمىستى كۇشەيتۋدى جانە پروفيلاكتيكالىق اقپاراتتى حاباردار ەتۋ جانە تاراتۋ ماقساتىندا WhatsApp توپتارىمەن تۇراقتى اقپاراتتىق ءوزارا ءىس-قيمىلدى قامتاماسىز ەتۋدى جۇكتەدى.
قازىر تج قىزمەتكەرلەرى سۋعا تۇسۋگە رۇقسات ەتىلمەگەن جەرلەردى كۇن سايىن باقىلاۋعا العان. سۋ جاعاسىنا كەلگەن ادامداردىڭ بارىنە قاۋىپسىزدىك شارالارى تۋرالى دا ايتىلىپ وتىرادى. بۇل جۇمىستاردى رەيدتەر جۇرگىزۋ ارقىلى دا جاسايدى. وعان داۋىس شىعاراتىن دروندار قولدانىلىپ, ەسكەرتۋلەرىن ايتۋداي-اق ايتۋدا. تجد ءباسپاسوز قىزمەتى بۇگىنگە دەيىن حالىققا 2 300 رەت شىعىپ, سۋ قاۋىپسىزدىگى تۋرالى بايانداعاندارىن جەتكىزدى.
وزەنگە باتىپ كەتكەندەر اراسىنان بۇگىنگە دەيىن 2014 جىلى تۋعان بالانىڭ دەنەسى ءالى تابىلعان جوق. ون جاستاعى بالا ۇلكەندەردىڭ قاراۋىنسىز رۇقسات ەتىلمەگەن جەرگە سۋعا تۇسكەن ەكەن. جانىنداعى بالالار ونىڭ «باتتىم» دەگەن ايعايىن عانا ەستىپ قالىپتى. قازىر ونى ىزدەۋگە تجد 52 قىزمەتكەرى سۋعا جۇزەتىن 5 تەحنيكاسىمەن جۇمىلدىرىلدى. تەحنيكالار قاتارىندا سۋ استى درونى دا بار. سونىمەن بىرگە ۆولونتەرلەر مەن پوليتسيا قىزمەتكەرلەرى دە ىزدەۋ جۇمىستارىنا تارتىلعىن.
ايتا كەتەتىن جايت, پەتروپاۆل قالاسىنىڭ سانيتارلىق-ەپيدەميولوگيالىق باقىلاۋ باسقارماسى وسى ۋاقىتقا دەيىن قالا ىرگەسىندەگى پەستروە كولى جانە ەسىل وزەنى جاعاجايلارىنىڭ سۋلارىنان 24 رەت سىناما الىپ, ونىڭ تازالىعىن تەكسەرگەن. سىنامالار باكتەريولوگيالىق, سانيتارلى-حيميالىق, پارازيتولوگيالىق, راديولوگيالىق جانە ۆيرۋسولوگيالىق كورسەتكىشتەر بويىنشا زەرتتەلدى. اتالعان قىزمەت باستىعىنىڭ ورىنباسارى دانيار وسپانوۆتىڭ ايتۋىنا قاراعاندا, ازىرگە ەشقانداي زياندى كورسەتكىشتەر تابىلماعان. «سۋدىڭ قۇرامى قالىپتى نورمادا. قالالىقتار سۋعا قورىقپاي شومىلۋلارىنا بولادى», دەدى ول.
سۋ ساپاسىن باقىلاۋ بۇكىل جاز بويى جۇرگىزىلىپ تۇراتىن كورىنەدى.
سولتۇستىك قازاقستان وبلىسى
