پاتەرلى بولعانداردىڭ 43-ءى كوپبالالى وتباسى بولسا, 20-سى – وسى ءبىر ءساتتى سارعايىپ توسقان جەتىم بالالار. قولدارىنا جاڭا دا جارىق, ساۋلەتتى پاتەرلەردىڭ كىلتىن ۇستاپ تۇرىپ, ءيسى مۇسىلمان ءۇشىن قاسيەتتى قۇربان ايت مەرەكەسىندە جاقسىلىققا قارىق بولعاندارىن جاقسى ىرىمعا بالاستى. مەملەكەت باسشىسى قاسىم-جومارت توقاەۆ بىرىڭعاي تۇرعىن ءۇي ساياساتىن جاقسارتۋ بويىنشا تاپسىرما بەرگەن ەدى. ۇكىمەت وسى باعىتتا ناقتى شارالار قابىلداپ, وڭىرلەردە وبلىس باسشىلىعى دايىن پاتەرلەردى ساتىپ الىپ, حالىقتىڭ الەۋمەتتىك جاعىنان از قامتاماسىز ەتىلگەن توپتارىنا بەرە باستادى.
– بۇگىن مەملەكەت باسشىسىنىڭ تاپسىرماسىنا سايكەس جەكەمەنشىك قۇرىلىس كومپانيالارىنان دايىن پاتەرلەردى ساتىپ الىپ, كوپبالالى جانە الەۋمەتتىك جاعىنان از قامتىلعان وتباسىلارعا بەرۋدەمىز. بۇل ىزگى جوبا حالىقتىڭ الەۋمەتتىك-تۇرمىستىق جاعدايى مەن ءومىر ءسۇرۋ ساپاسىن جاقسارتۋعا ارنالعان, – دەدى وبلىس اكىمى مارات احمەتجانوۆ ءوز سوزىندە. – جىل سوڭىنا دەيىن وسى باعدارلاما بويىنشا 841 وتباسى جايلى پاتەرلەرگە يە بولادى دەپ جوسپارلانىپ وتىر. ونىڭ ىشىندە كوكشەتاۋ قالاسى بويىنشا 500 پاتەر بەرىلسە, قالعاندارى وبلىستىڭ قالالارى مەن اۋداندارىندا بەرىلەدى. كەيىنگى بەس جىلدا مۇنشا پاتەر بەرىلمەگەن ەكەن. ءبىر ايتا كەتەرلىگى, بۇل كۇنى جوسپار بويىنشا قوسشى قالاسى مەن زەرەندى, بۋراباي اۋداندارىندا دا جوعارىدا اتالعانداي توپتارعا 201 پاتەر تاپسىرىلدى.
باسپانالى بولعانداردىڭ قۋانىشتارىندا شەك جوق دەۋگە بولادى. كوڭىلدەرى كوتەرىڭكى. كەۋدەلەرىن كەرنەگەن سەزىمدەرىن جاسىرا الماي, كوز جاسىنا دا ەرىك بەرىپ ءجۇر.
– مەملەكەت باسشىسى مەن جەرگىلىكتى اتقارۋشى ورگاندارعا اق العىسىمىزدى جەتكىزگىمىز كەلەدى, – دەيدى جەتى بالانىڭ اناسى اننا بۋركوۆا. – ءبىز ءوزىمىز تىرنەكتەپ قاراجات جيناپ مۇنداي ءۇيدى الا الماس ەدىك.
ءوڭىر باسشىسى جۋرناليستەرمەن تىلدەسكەن كەزىندە پاتەرلەردىڭ ساپاسى مەن جايلىلىعىنا ايرىقشا ءمان بەرىلەتىنىن ايتىپ ءوتتى. تەك جاڭا پاتەرلەر عانا ساتىپ الىنادى ەكەن. ءبىرىنشى كەزەكتە كوكشەتاۋ قالاسىنىڭ تۇرعىندارىنا 129 پاتەر بەرۋ كوزدەلگەن. بۇگىن 36 وتباسى باسپانالى بولسا, كەلەسى اپتادا تاعىدا 38 پاتەر بەرىلمەك. بۇل ماقساتقا بيۋدجەتتەن 16 ميلليارد تەڭگە قاراجات قاراستىرىلعان. كەيىن پاتەرلى بولعان وتباسىلار قولدانىستاعى زاڭ اياسىندا ءتيىستى سوماسىن تولەپ, جەكەشەلەندىرە الادى. جىل سوڭىنا دەيىن وبلىستا جالعا بەرىلەتىن جانە نەسيەلىك باسپانا باعدارلامالارى اياسىندا 1 500-گە جۋىق وتباسى پاتەرلى بولماق.
جاڭا ۇيلەردە بارلىق جاعداي قاراستىرىلعان. اۋلاسىندا بالالاردىڭ ويىن الاڭدارى بار.
– پاتەر كەزەگىنە تۇرعانىما ون جىلدان استى. مەن ءۇش مىڭىنشى بولىپ تۇر ەدىم. ول كەزدە بالالارىم كىشكەنتاي ەدى, – دەيدى گۇلنار قوجاحمەتوۆا ەسىمدى جالعىزباستى, كوپبالالى انا. – كۇيەۋىم دە ومىردەن ءوتىپ كەتتى. بۇگىن وسىنداي جاقسىلىقتىڭ بولعانىنا سەنەر-سەنبەسىمدى بىلمەي تۇرعان جايىم بار.
دانا حالىق ء«ۇيى جوقتىڭ كۇيى جوق» دەپ تەگىن ايتپاسا كەرەك. باسپانالى بولعان وتباسىلار ءوز شاڭىراقتارىندا شاتتىقتىڭ نۇرى سەبەزگىلەپ تۇراتىنىنا سەنىمدى.
كوكشەتاۋ
