كۋرسانت فورماسىن كيگەن كىلەڭ ۇزىن بويلى, جالىندى جاس جىگىتتەر كوشەلەردە پاترۋلدىك قىزمەت اتقارىپ جۇرگەنى بەلدەرىنە قامشى ءىلىپ, الەم-جالەم كيىنىپ جۇرگەندەردىڭ مىسىن باسىپ, تىنىشتىق پەن ءتارتىپ ورناي باستادى. سودان بەرى كۋرسانتتار سولتۇستىكتىڭ بارلىق توتەنشە ىستەرىنە دە بەلسەنە قاتىستىرىلىپ, كومەك قولىن سوزىپ كەلەدى. بيىلعى تاسقىن كەزىندە دە ولار الدىڭعى شەپتەن تابىلىپ, جۇزدەگەن ادامدى قۇتقارۋعا قاتىستى.
قازىر بۇل وقۋ ورىنى ۇلتتىق ۇلان اكادەمياسى دەپ اتالادى. وبلىس ورتالىعىندا وتكىزىلەتىن بارلىق مادەني ءىس-شارانىڭ, پاتريوتتىق ىستەردىڭ بەل ورتاسىنان اكادەميانىڭ كۋرسانتتارى تابىلىپ, بەلسەنە قاتىسىپ جاتادى. سوندىقتان وبلىستىڭ مادەنيەت, ىشكى ساياسات, ءبىلىم بەرۋ باسقارمالارى, قالا تۇرعىندارى كۋرسانتتارعا ۇنەمى ريزاشىلىعىن بىلدىرەدى. كەيدە قىستىڭ قىسقا كۇنىندە قاراڭعى كوشەلەرمەن قورقا سوعىپ جاياۋ كەلە جاتساڭ قالىڭ قارا تون كيىپ, كەزەكشىلىكتە جۇرگەن ءۇش كۋرسانت الدىڭنان شىعا كەلگەندە كادىمگىدەي قۋانىپ قالاسىڭ. كەيبىر ايعاي-شۋ شىعارىپ, بۇزاقىلىق كورسەتىپ جاتقان اۋمەسەرلەردىڭ قولىن بۇراپ, پوليتسيانىڭ كولىگىنە اپارا جاتقاندارىن دا كورىپ ريزا بولاسىڭ.
بۇگىنگى تاڭدا اكادەميانى پولكوۆنيك ارتۋر توقىشەۆ باسقارادى. مۇندا قۇقىق قورعاۋ سالاسىنىڭ 8 ماماندىعى بويىنشا وفيتسەرلەر دايارلانادى. وقۋ ورنىنىڭ 28 جىلدىق تاريحىنداعى قول جەتكەن تابىستارى وتە مول. وقۋ ورداسىن بىتىرگەن ءتورت مىڭنان ارتىق تۇلەك ەلىمىزدىڭ ءار تۇكپىرىندە حالىقتىڭ تىنىشتىعى مەن بوستاندىعىن ساقتاۋعا زور ۇلەس قوسىپ كەلەدى. مادەنيەت, سپورت سالالارىنداعى تابىستارى دا از ەمەس.
وقۋ ورنى وزدەرىنىڭ العاشقى تۇلەكتەرىن 2000 جىلى ۇشىردى. ال بيىل 190 ادامنان تۇراتىن 24-تۇلەكتەرىن قازاقستاننىڭ بارلىق ءوڭىرى مەن قالاسىنا شىعارىپ سالىپ وتىر. ازاماتتاردىڭ ديپلوم الۋ سالتاناتىنا ىشكى ىستەر ءمينيسترى ەرجان سادەنوۆ, وبلىس اكىمى عاۋەز نۇرمۇحامبەتوۆ, ۇلتتىق ۇلاننىڭ باس قولباسشىسى, گەنەرال-لەيتەنانت ەركىن بوتاقانوۆ, رەسپۋبليكانىڭ تۇكپىر-تۇكپىرىنەن كەلگەن اتا-انالار مەن تۋىستارى قاتىستى. قوناقتاردىڭ اراسىندا تاجىكستان ىشكى ىستەر مينيسترلىگىنىڭ وكىلدەرى دە بولدى. ويتكەنى بيىل ديپلوم العان وفيتسەرلەردىڭ 10-ى ۇكىمەتارالىق كەلىسىم بويىنشا سول ەلدەن كەلىپ, وقىعاندار ەدى.
جالىندى جاستاردىڭ بۇگىنگى قۋانىشتارى ەرەكشە سەزىلەدى. مىنبەرگە كوتەرىلگەن ىشكى ىستەر ءمينيسترى ءسوزىن الدىمەن بالالارىن وتانىمىزدىڭ ادال ازاماتى قىلىپ تاربيەلەگەن اتا-انالارعا العىس ايتۋدان باستادى. «ەلىمىزدىڭ ىشكى ءتارتىبىن باقىلاۋعا ۇلدارىن اتتاندىرعان, ونىڭ قيىندىعى مەن تاۋەكەلىن ەڭسەرۋگە تاربيەلەگەن اتا-انالارعا مىڭ العىس ايتامىن. مىنە, بۇگىن ەلىمىزدىڭ ىشكى ىستەر اسكەرىنىڭ وفيتسەرلىك كورپۋسى جاڭا لەيتەنانتتارمەن تولىعىپ وتىر. اكادەميادان العان تەرەڭ بىلىمدەرىڭدى, كاسىبي جانە اسكەري دايىندىقتارىڭدى ەلىمىزدىڭ قۇقىلىق جانە ءتارتىپ قۋاتىن ارتتىرۋعا جۇمسايدى دەپ سەنەمىن», دەدى ول.
جاس وفيتسەرلەردى وبلىس اكىمى عاۋەز نۇرمۇحامبەتوۆ تە قۇتتىقتادى. ءوڭىر باسشىسى ءسوزىن كۋرسانتتاردىڭ بيىلعى سۋ تاسقىنى كەزىندەگى ەرلىگىنە ريزاشىلىعىن بىلدىرۋدەن باستادى. «ساربازدار ۇيلەردى قالپىنا كەلتىرۋگە جانە زارداپ شەككەندەرگە ۇيلەرىنە تەز ورالۋىنا ءوز ۇلەستەرىن قوستى. وسىنىڭ ارقاسىندا كوپتەگەن ادامنىڭ ءومىرىن ساقتاپ قالدىق. سولتۇستىكقازاقستاندىقتاردىڭ اتىنان سىزدەرگە العىسىمدى ايتامىن. ەر ازامات وسىنداي قيىن ساتتەردە شىڭدالادى. سىزدەر ناعىز ەرلىك تانىتىپ, ابىرويلى ەڭبەك ەتتىڭىزدەر. ەرىم دەيتىن ەل امان بولىپ, ەلىم دەيتىن ساربازدار كوپ بولسىن», دەدى اكىم قۇتتىقتاۋ سوزىندە.
ديپلومداردى سالتاناتتى جاعدايدا تاپسىرۋ ءراسىمى اكادەميانى ۇزدىك بىتىرگەن ابىلايحان ايتۋاروۆ, جالعاس جەڭىس, تيمۋر اعىباەۆ, دياس ابىلاكىموۆ – تورتەۋىنە پرەزيدەنت ق.توقاەۆتىڭ اتىنان ىشكى ىستەر ءمينيسترى, گەنەرال-لەيتەنانت ەرجان سادەنوۆتىڭ تاپسىرۋىمەن باستالدى.
اكادەميانىڭ جاس تۇلەكتەرىنىڭ ءبىرى عالىمجان كەنەسارىنى اڭگىمەگە تارتقانىمىزدا, ول ءوزىنىڭ قۋانىشتى ەكەنىن جەتكىزدى. «بۇگىن ارمانىم ورىندالىپ, يىعىما لەيتەنانت پوگونىن تاعىپ تۇرمىن. ءتورت جىل بويى وسى ءساتتى اڭساعان ەدىم. قىزىلجار ءوڭىرى مەنىڭ ەسىمدە ارقاشان ساقتالادى. وسى قالاعا بالا بولىپ كەلىپ, تەرەڭ ءبىلىم مەن ومىرلىك تاجىريبە الىپ, جىگىت بولىپ اتتانىپ بارا جاتىرمىن», دەدى عالىمجان.
«مۇنداعى وقۋ وڭاي بولعان جوق. ءتورت جىل بويى كازارمادا, قاتاڭ تارتىپتە بولدىق. ءتارتىپ بولماسا ناتيجە دە بولمايدى, سوندىقتان ۇستازدارىمىز ءبىزدىڭ بوساڭسۋىمىزعا ەرىك بەرگەن جوق. سونىڭ ارقاسىندا مىنە, ديپلوم الىپ, مامان اتانىپ تۇرمىز. ۇستازدارىما العىس بىلدىرەمىن», دەدى تاعى ءبىر تۇلەك تەمىرحان پەرنەبەك.
بالاسىنىڭ ديپلوم الۋ راسىمىنە الماتى وبلىسىنان ارنايى كەلگەن اقجارقىن ايساەۆا دا ءوزىنىڭ قاتتى قۋانىپ تۇرعانىن ءبىلدىردى. ء«تورت جىل بويى وقىعان ءبىلىمىن بالام ەندى ەلدىڭ قىزمەتىنە ادال جۇمساسىن دەپ تىلەيمىن. وتانىمىزداعى تىنىشتىقتى وسى ازاماتتار قورعاماسا كىم قورعايدى. بالامنىڭ سونداي دارەجەگە جەتكەنىنە كوزىمە جاس الىپ, قۋانىپ تۇرمىن», دەدى انا. ءسويتىپ, ەلىمىزدىڭ ىشكى ىستەر اسكەرى جاڭا وفيتسەرلەرمەن تولىقتى.
پەتروپاۆل
