مەملەكەتتىك ءتىلدى دامىتۋ – مەملەكەتىمىزدىڭ باسىم باعىتتارىنىڭ ءبىرى. قازىرگى تاڭدا شەتەلدىك تەلە جانە راديوارنالار وتاندىق كونتەنتتى تاراتپايدى. وسىعان بايلانىستى شەتەلدىك تەلە جانە راديوارنالارعا وتاندىق ونىمدەردى جالپى تەلە جانە راديوباعدارلامالاردىڭ كەمىندە ون پايىزىنا جەتكىزۋ مىندەتتەمەسىن بەكىتۋ ۇسىنىلادى.
زاڭنىڭ نەگىزگى ەرەكشەلىكتەرى قانداي؟
ءبىرىنشى, جۋرناليستەردىڭ قۇقىقتارىن قورعاۋ بويىنشا قوعامدىق جانە كاسىبي كەڭەستەر قۇرىلادى. بۇل كەڭەس جۋرناليستەردىڭ مۇددەسىن تولىق جەتكىزە الاتىن, قورعاي الاتىن ينستيتۋت بولۋعا ءتيىس.
ەكىنشى, توتەنشە جاعدايلاردا جۋرناليستەردىڭ قۇقىقتارىن قورعاۋ ماسەلەسى. توتەنشە جاعدايلاردا ءوز مىندەتتەرىن اتقارۋ كەزىندە جۋرناليستەر ومىرىنە ۇلكەن قاۋىپ ءتونۋى مۇمكىن. بۇدان بىلاي باق جاڭا زاڭعا سايكەس ءوز قىزمەتكەرلەرىن الەمدىك جەتەكشى اقپارات قۇرالدارى تاجىريبەسىنە ساي قاجەتتى قورعانىس قۇرالدارىمەن قامتاماسىز ەتۋگە مىندەتتى.
ءۇشىنشى, جۋرناليستىك ەتيكا. جۋرناليستەردىڭ قىزمەتى قوعامداعى سالاماتتى اتموسفەرانى دامىتۋعا جانە قاۋىپسىز اقپاراتتىق كەڭىستىكتى قالىپتاستىرۋدىڭ كەپىلى.
ءتورتىنشى, وتاندىق باق-تى قارجىلىق قولداۋ ساپالى اقپاراتتىق ءونىم شىعارۋعا مۇمكىندىك بەرەدى.
بەسىنشى, ۋاكiلەتتi ورگانعا باق-تى جالپىعا ورتاق, ۇلتتىق, مادەني جانە وتباسىلىق قۇندىلىقتاردىڭ بۇزىلۋىنا مونيتورينگ جاساۋ قۇزىرەتi بەرىلمەك.
التىنشى, مەملەكەتتىك اقپاراتتىق ساياسات جونىندەگى رەسپۋبليكالىق كوميسسيانىڭ قۇرامىنا بۇقارالىق اقپارات قۇرالدارى سالاسىنداعى قوعامدىق بىرلەستىكتەردىڭ وكىلدەرى ەنەدى.
جەتىنشى, مەملەكەتتىك جانە مەملەكەتتىك ەمەس باق ۇعىمدارى اجىراتىلادى. ول قوعامدىق ۇيىمدار مەن باق ساراپشىلارىنىڭ ۇسىنىستارى نەگىزىندە قاراستىرىلدى.
سەگىزىنشى, باق-تى مەملەكەتتىك قارجىلاندىرۋ ماسەلەسىندەگى اشىقتىق. زاڭ جوباسىندا قازىردىڭ وزىندە باق ساياساتىنىڭ اشىقتىعى مەن تيىمدىلىگىن ارتتىرۋعا باعىتتالعان گرانتتىق قارجىلاندىرۋ تەتىگى قاراستىرىلعان.
توعىزىنشى, اككرەديتتەۋ كارتاسى. قازىرگى تاڭدا جۋرناليستەر ءتۇرلى ءىس-شارالارعا قول جەتكىزۋ ءۇشىن مەملەكەتتىك ورگاندارعا جۇيەلى تۇردە وتىنىشتەر مەن قۇجاتتاردى تاپسىرىپ وتىرۋى كەرەك. الايدا كەيدە بۇل ءۇردىس ۇزاققا سوزىلادى جانە بيۋروكراتيالىق كەدەرگىلەرگە تاپ بولادى. اككرەديتتەۋ كارتاسى تسيفرلىق پلاتفورما ارقىلى بەرىلەدى دەپ جوسپارلانىپ وتىر. الاڭدا مەملەكەتتىك ورگانداردىڭ ءىس-شارالارى وتەدى, جۋرناليستەر ءبىر-ەكى مينۋت ىشىندە ءوتىنىش بەرە الادى. بۇل ولاردىڭ اقپارات كوزدەرىنە قولجەتىمدىلىگىن جەڭىلدەتەدى.
ايگۇل قاپباروۆا,
سەنات دەپۋتاتى
