اكادەميا ءباسپاسوز قىزمەتىنىڭ مالىمەتىنشە, 2023-2024 وقۋ جىلىندا دوكتورانتۋرا جانە ماگيستراتۋرا ءبىلىم باعدارلامالارى بويىنشا 124 تۇلەك ديپلومىن ءساتتى قورعادى. 30 جىلدا اكادەميا 2814 ماگيستر, 122 دوكتورانتتى دايارلاپ شىعاردى. سالتاناتتى شارانىڭ اشىلۋىندا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي تۇلەكتەرگە ساتتىلىك تىلەدى.
«قازىرگى ۋاقىتتا مەملەكەتتىك قىزمەت سالاسىندا ادىلەتتى قازاقستان قاعيداتتارىنا ساي كەلەتىن جۇيەلى رەفورمالار جۇزەگە اسىرىلۋدا. اشىقتىق, ادىلدىك جانە مەريتوكراتيا قاعيداتتارى نەگىزىندە مەملەكەتتىك قىزمەتكە قابىلەتتى ءارى بىلىكتى ازاماتتاردى, دارىندى جاستاردى تارتۋعا كەڭىنەن جول اشىلۋدا. مەملەكەتتىك باسقارۋ اكادەمياسىن ۇزدىك اياقتاعان تۇلەكتەردىڭ وڭىرلىك دەڭگەيدە كونكۋرسسىز نەگىزدە باسشىلىق لاۋازىمدارعا تاعايىندالا الۋ مۇمكىندىگى دە وسىنىڭ دالەلى. اكادەميادان تۇلەپ ۇشقان ماگيسترانتتار مەن دوكتورانتتار مەملەكەتتىك قىزمەتشىلەر بۋىنىنىڭ ناعىز كوشباسشىلارى بولۋعا ءتيىس. العان كاسىبي قۇزىرەتتىلىكتەرىڭىز مەملەكەتىمىزدىڭ كەشەندى ستراتەگيالىق مىندەتتەرىن شەشۋدە, باسقارۋدىڭ سەرۆيستىك مودەلىنە كوشۋدە شەشۋشى ءرول اتقارادى دەپ سەنەمىن», دەدى مقىا توراعاسى.
ءداستۇر بويىنشا اكادەميا رەكتورى ەرلان ءابىل دە تۇلەكتەردى قۇتتىقتاپ, جىلى لەبىزىن ءبىلدىردى.
ء«بىزدىڭ تۇلەكتەر – «ادال ازامات» ۇعىمىنىڭ قۇندىلىقتارىن بويىنا سىڭىرە وتىرىپ, بولاشاققا باعدارلانعان مەملەكەتتىك باسقارۋ جۇيەسىنىڭ باسەكەگە قابىلەتتى ادامي كاپيتالىنا اينالۋى ءتيىس.
بۇل رەتتە, وزگەرمەلى زامان تالاپتارىنا سايكەس ءبىلىمدى, كاسىبي قۇزىرەتتىلىگى جوعارى مامانداردى دايارلاۋ ماقساتىندا اكادەميا ءوز تاراپىنان اۋقىمدى جۇمىستار جۇرگىزىپ جاتىر. اكادەميا قابىرعاسىندا العان بىلىمدەرىڭىزبەن ەلىمىزدىڭ وركەندەپ, دامۋىنا ەلەۋلى ۇلەس قوسىپ, مەملەكەتتىك باسقارۋ سالاسىنىڭ بىلىكتى مامانى بولاتىندارىڭىزعا, اكادەميا تۇلەگى مارتەبەسىن بيىك ۇستايتىندارىڭىزعا سەنىمىمىز مول», دەدى ەرلان قۋانىش ۇلى.
سونىمەن قاتار رەكتور شارا بارىسىندا «پرەزيدەنتتىك اكادەميا تۇلەكتەرىنىڭ اليانسى» قوعامدىق بىرلەستىگى قۇرىلعانى تۋرالى مالىمدەدى. جاڭادان قۇرىلعان اليانستىڭ پرەزيدەنتى بولىپ مەملەكەتتىك باسقارۋ اكادەمياسىنىڭ تۇلەگى, ەلوردالىق كاسىپكەرلەر پالاتاسىنىڭ باسشىسى قانات الين تاعايىندالدى.
«اليانستى قۇرۋداعى ماقساتىمىز — اكادەميانىڭ ءار جىلدارداعى تۇلەكتەرىنىڭ كورپوراتيۆتىك رۋحىن نىعايتۋ جانە بارلىعىن بىرىكتىرۋ. ارقايسىمىزدىڭ جەكە جانە كاسىبي وسۋىمىزگە ىقپال ەتەتىن مىقتى ۇيىم قۇرا الامىز دەگەن سەنىمدەمىن. ءاربىر تۇلەك اليانستىڭ جانە جالپى قوعام ومىرىنە بەلسەندى قاتىسۋى ءۇشىن جاعداي جاسايمىز. اكادەميا تۇلەكتەرى ءوز بىلىمدەرىمەن, يدەيالارىمەن جانە تاجىريبەلەرىمەن بولىسە الاتىن پلاتفورمالار مەن ءىس-شارالاردى ۇيىمداستىرامىز. ارقايسىسىڭىزدى جەتىستىككە تولى بولاشاقتى بىرگە قۇرۋعا, پرەزيدەنتتىك اكادەميا تۇلەكتەرى اليانسىنىڭ مۇشەسى بولۋعا شاقىرامىن», دەدى قانات تولەۋبەك ۇلى.
اكادەميادا ادامي رەسۋرستاردى باسقارۋ ماماندىعى بويىنشا ماگيستراتۋرانى تامامداعان ايناگۇل قاقيەۆا اتىراۋعا ورالىپ, مەملەكەتتىك قىزمەتتەگى ەڭبەگىن جالعاستىرماق.
«بۇگىن ءبىز ءۇشىن قۋانىشتى كۇن. ماگيسترلىك جوبانى ءساتتى قورعاپ, ديپلوم الىپ جاتىرمىز. اكادەمياعا ءبىلىم الۋشىلارعا بەرگەن زور مۇمكىندىگى ءۇشىن العىس ايتامىز. ءبىز مۇندا ءبىلىم الىپ قانا قويماي, كاسىبي بىلىكتىلىگىمىزدى ارتتىردىق, سونىمەن قاتار شەتەلدىك تاعىلىمداماعا بارۋعا مۇمكىندىك الدىق. مەملەكەتتىك باسقارۋ اكادەمياسىنىڭ 30 جىلدىق مەرەيتويى قۇتتى بولسىن», دەدى تۇلەك.
سالتاناتتى ءىس-شاراعا مەملەكەتتىك قىزمەت ىستەرى اگەنتتىگى توراعاسى دارحان جازىقباي, تۇركيا پرەزيدەنتى جانىنداعى ادام رەسۋرستارى ءوفيسىنىڭ پرەزيدەنتى دوكتور ساليم اتاي جانە ادام رەسۋرستارى ءوفيسى ءبولىمىنىڭ باسشىسى ساۆاش دجەيلان, پرەزيدەنت اكىمشىلىگىنىڭ مەملەكەتتىك قىزمەت بولىمىنىڭ مەڭگەرۋشىسى رۋسلان تۇرعانالى, استانا مەملەكەتتىك قىزمەت حابى باسقارۋشى كوميتەتىنىڭ توراعاسى ءاليحان بايمەنوۆ, قارجى مينيسترلىگىنىڭ اپپارات باسشىسى ەرعالي ەگەمبەردى, بىرىككەن ۇلتتار ۇيىمى دامۋ باعدارلاماسىنىڭ مەملەكەتتىك مەكەمەلەر ءۇشىن گەندەرلىك تەڭدىككە قول جەتكىزۋ بويىنشا سەرتيفيكاتتاۋ باعدارلاماسىنىڭ جاھاندىق مەنەدجەرى انا لاندا ۋگارتە, بىرىككەن ۇلتتار ۇيىمى دامۋ باعدارلاماسىنىڭ قازاقستانداعى تۇراقتى وكىلى كاتارجينا ۆاۆەرنيا, ازەربايجان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ رەكتورى ۋرحان كازىم وگلۋ الەكپەروۆ, فۋدان ۋنيۆەرسيتەتىنىڭ پروفەسسورى (قىتاي) Zhang Ping قاتىستى.
اتاپ وتەيىك, پرەزيدەنت جانىنداعى مەملەكەتتىك باسقارۋ اكادەمياسىنا 2024-2025 وقۋ جىلىنا ماگيستراتۋراعا جانە دوكتورانتۋراعا وقۋعا قۇجات قابىلداۋ وسى جىلدىڭ 26 ماۋسىمىنا دەيىن جۇرگىزىلەدى. جاڭا وقۋ جىلىنا مەملەكەتتەن 132 گرانت (ماگيستراتۋراعا – 120, دوكتورانتۋراعا – 12) ءبولىندى.
