رەسمي وكىل رەتىندە تىركەلدى

ابۋ دابيدە قازاقستاننىڭ بىرىككەن اراب امىرلىكتەرىندەگى ەلشىسى قايرات لاما ءشارىپ جاڭارمالى ەنەرگيا كوزدەرى جونىندەگى حالىقارالىق اگەنتتىگىندە (IRENA) قازاقستان رەسپۋبليكاسىنىڭ رەسمي وكىلى رەتىندە اككرەديتتەلدى. اككرەديتتەۋ سالتاناتىندا جاڭار­مالى ەنەرگيا كوزدەرى جونىندەگى حالىق­ارالىق اگەنتتىكتىڭ باس ديرەكتورى ادنان امين ءوز سوزىندە اتالعان ماڭىزدى قادامدى قازاقستاننىڭ IRENA-مەن ىنتى­ماقتاستىعىن ودان ءارى كەڭەيتۋ مەن نى­عايتۋعا باعىتتالعان يگى نيەت دەپ جوعارى باعالادى. IRENA – گەرمانيا ۇكىمەتىنىڭ باستاماسىمەن جانە يسپانيا مەن دانيانىڭ بەلسەندى قولداۋىنىڭ نەگىزىندە 2009 جىلعى 26 قاڭتاردا بونن قالاسىندا قۇرىلعان حالىقارالىق ۇيىم. جاڭا ۇيىمدى قۇرۋدىڭ ۇلگىسى رەتىندە اتوم ەنەرگياسى جونىندەگى حالىقارالىق اگەنتتىك (ماگاتە) الىندى. 2010 جىل­دىڭ 25 قازانىندا IRENA مەن قابىلداۋشى تاراپ ء(باا) اراسىندا حالىقارالىق اگەنتتىكتىڭ شتاب-پاتەرىن ابۋ دابيگە كوشىرۋ تۋرالى كەلىسىمگە قول قويىلدى. قازىرگى ۋاقىتتا 135 مەملەكەت (134 مەملەكەت جانە ەۋروپالىق وداق) IRENA-عا مۇشە بولىپ تابىلادى, ال 36 ەل ۇيىمعا كىرۋ الدىندا تۇر. 2013 جىلدىڭ 22 ناۋرىزىندا وسى حالىقارالىق ۇيىمنىڭ جارعىسىن راتيفيكاتسيالاعاننان كەيىن قازاقستان IRENA-نىڭ تولىق قۇقىقتى مۇشەسى بولىپ ەسەپتەلەدى. ۇيىمدا 26 مەملەكەتتىڭ تۇراقتى وكىلدەرى تىركەلگەن. سۇحبات بارىسىندا ادنان امين مەن قايرات لاما ءشارىپ ابۋ دابيدە جاپونيانىڭ توراعالىعىمەن وتەتىن IRENA اسسامبلەياسىنىڭ 5-ءشى سەسسياسىنا (ۇيىمنىڭ جوعارى ورگانى) قازاقستان رەسپۋبليكاسىنىڭ ەنەرگەتيكا ءمينيسترى ۆ.س.شكولنيك باستاعان قازاقستاندىق دەلەگاتسيا قاتىسۋىنىڭ ۇيىمدىق-حاتتامالىق جانە ەكىجاقتى ىنتىماقتاستىق ماسەلەلەرى بويىنشا پىكىر الماستى. اتالعان سەسسيادا قازاقستان كەنيا, جاڭا زەلانديا جانە پەرۋمەن قاتار, اسسامبلەيانىڭ ۆيتسە-پرەزيدەنتى رەتىندە تانىستىرىلادى. IRENA اسسامبلەياسىمەن قاتار, ابۋ دابيدە تۇراقتى دامۋ اپتالىعى (Abu Dhabi Sustainability Week) وتەدى. ADSW 2013 جىلدان باستاپ جىل سايىن وتكىزىلەدى, ماڭىزدىلىعى جاعىنان تاياۋ شىعىستاعى ەنەرگەتيكا مەن تۇراقتى دامۋ سالاسىنداعى ەڭ ءىرى جانە تانىمال اپتالىققا اينالعان. ADSW شەڭبەرىندە بىرنەشە دەربەس فورۋمدار وتەدى. ولاردىڭ باستىسى – بولاشاق ەنەرگياسى جونىندەگى 8-ءشى الەمدىك سامميت– 2015 (World Future Energy Summit), سۋ رەسۋرستارى ماسەلەسى جونىندەگى 3-ءشى حالىقارالىق سامميت (International Water Summit), جاڭارمالى ەنەرگيا كوزدەرى جونىندەگى حالىقارالىق كونفەرەنتسيا (Abu Dhabi International Renewable Energy Conference) جانە قالدىقتاردى باقىلاۋ مەن كادەگە جاراتۋ جونىندەگى 2-ءشى حالىقارالىق كورمە («EcoWASTE»). «ەگەمەن-اقپارات».