ۇلتتىق مۋزەيدىڭ ءباسپاسوز قىزمەتىنىڭ مالىمەتىنشە, لەوناردو دا ءۆينچيدىڭ بىرەگەي تۋىندىسىن وسى ۋاقىتقا دەيىن 6 772 ادام تاماشالاپ ۇلگەرگەن. كەلۋشىلەردىڭ دەنى – ەرەسەكتەر (3 727 ادام), شەتەلدىكتەر (1 017) مەن مەكتەپ وقۋشىلارى (764).
سۋرەتشى وكسانا قالياكپەروۆانىڭ ايتۋىنشا, ەرەكشە سەزىم سىيلايتىن سۋرەتتى كورۋگە ءار جان ۇمتىلۋ كەرەك.
«لەوناردو دا ءۆينچيدىڭ بۇل تۋىندىسى استاناعا كەلۋىمە تۇرتكى بولدى. ەلىمىزدىڭ مادەنيەتىن كوتەرىپ, ۇلى ونەرمەن, ۇلى سۋرەتشىمەن ارالاسۋعا مۇمكىندىك بەرگەن ۇيىمداستىرۋشىلارعا ريزامىن. ارنايى بولمە مۋزىكالىق جانە كورنەكى سۇيەمەلدەۋمەن بەزەندىرىلگەن ەكەن. تۋىندىنىڭ ەرەكشە اسەر ەتكەنى سونشالىق, ءبىر ءسات ليفتپەن كوتەرىلىپ بارا جاتقانداي اسەردە بولدىم. الەۋمەتتىك جەلىدە كورگەنىمىز بەن مۋزەيدە كۋا بولعانىمىز مۇلدە بولەك. ناعىز بارۋعا تۇرارلىق دۇنيە», دەيدى ول.
سونداي-اق اتالعان مۇراجايدا 23 ماۋسىم كۇنى ولگا باتۋرينانىڭ لەوناردو دا ءۆينچيدىڭ ونەرى تۋرالى لەكتسياسى وتەدى.
ايتا كەتەيىك, تانىمال تۋىندىنىڭ كورمەسى ۇلتتىق مۋزەيدىڭ 10 جىلدىعىنا وراي يتاليانىڭ «Scripta Maneant» باسپاسىمەن بىرلەسە ۇيىمداستىرىلعان. جوعارى رەنەسسانس داۋىرىنە جاتاتىن بۇل قۇندى جادىگەر ەۋروپادان تىس جەرگە العاش رەت شىعارىلىپ وتىر. مادەنيەت جانە اقپارات مينيسترلىگى, يتاليانىڭ قازاقستانداعى ەلشىلىگى جانە يتاليا مادەنيەت ينستيتۋتى ۇيىمداستىرعان كورمەدەگى وسىناۋ بىرەگەي تۋىندى 4 تامىزعا دەيىن ۇسىنىلماق.
