كوللاجدى جاساعان – زاۋرەش سماعۇل ,«EQ»
زامانداستارىمىزدىڭ اراسىندا شەتەل اسىپ, ءبىلىمىن جەتىلدىرىپ كەلگەن تالانتتى, تالاپتى جاستار جەتەرلىك. اركىم ءارتۇرلى ەڭبەك جولىن تاڭداپ, بولاشاعىن ءبىر سالامەن بايلانىستىرعىسى كەلەدى. ۋنيۆەرسيتەت بىتىرە سالا مەملەكەتتىك قىزمەتكە ارالاسۋ – تەك مانساپتىق وسۋىڭە عانا ەمەس, ومىردەگى بار قيىندىققا توتەپ بەرۋ, ءبىلىمىڭدى شىڭداپ, بىلىگىڭدى تانىتاتىن مول مۇمكىندىك. سوندىقتان بولار, بالا كەزدەن مەملەكەتتىك قىزمەتشىنى كوز الدىما ەلەستەتكەندە ۇنەمى ابىرويلى, سالماقتى, ءبىلىمدى, زيالى تۇلعانى ەلەستەتەتىنمىن. مەملەكەتتىك قىزمەتشى بولۋعا سول ءۇشىن دە كۇننەن-كۇنگە قىزىعۋشىلىعىم ارتا ءتۇستى.
فيلوسوفيادا, ادەبيەتتە ەكزيستەنتسياليزم دەگەن ۇعىم بار. ول – ادام ءومىرىنىڭ ءمانى, ونىڭ تۇلعالىق بولمىسى, ياعني ادامنىڭ وزىندىك «مەنىن» تانۋى – ءومىردىڭ ءمان-ماعىناسىن ءتۇسىنۋ. مەنىڭ تۇلعالىق بولمىسىمدى قالىپتاستىرۋعا ۇلكەن وقۋ ورداسى – ءال-فارابي اتىنداعى قازاق ۇلتتىق ۋنيۆەرسيتەتى كوپ كومەگىن تيگىزدى. جوعارى وقۋ ورنىن اياقتاعان سوڭ بىردەن مەملەكەتتىك قىزمەتكە كەلۋدى ويلاستىردىم. مەملەكەتتىك قىزمەتكە كىرۋدەگى تالاپتارمەن تانىسا باستاعان كەزدە, مەملەكەت باسشىسىنىڭ ەنگىزىپ جاتقان جاڭالىعىن تەلەديدار ارقىلى باعدارلامالاردان كورىپ, قىزىعۋشىلىعىم وياندى. بۇگىندە مەملەكەتتىك قىزمەتكە كىرۋدىڭ جەڭىلدەتىلگەن جوبالارى, وڭتايلى تالاپتارى – جاستار ءۇشىن جەڭىل, ءارى ەشقانداي مورالدىق اۋىرتپالىقسىز وتەتىنى مەن ءۇشىن قۋاتتى قولداۋ بولدى, قاتتى قۋانتتى. سەبەبى كەز كەلگەن جوعارى وقۋ ورنىن اياقتاعان تۇلەكتىڭ جۇمىسقا ەش كەدەرگىسىز كىرۋى جاس مامانعا ايرىقشا موتيۆاتسيا, كۇش-جىگەر سىيلاپ, ەرتەڭگى ماقساتىنا ۇمىتپەن قاراۋىنا مۇمكىندىك بەرەدى.
مەملەكەت تاراپىنان كورسەتىلىپ جاتقان بۇل قولداۋ مەن شەشىم ۇلكەن قۇرمەتكە لايىق دەپ سانايمىن. جاستاردىڭ باستاپقى تاجىريبەسىز مەملەكەتتىك قىزمەتكە تاعايىندالىپ, جۇمىس ىستەۋلەرى جاستاردى مانساپتىق وسۋگە ۇمتىلۋعا, قوعامدى دامىتۋعا, بارلىق ازامات ءۇشىن قولايلى ورتا قۇرۋعا ىقپال ەتە وتىرىپ, مەملەكەتتىك سالاعا يننوۆاتسيالىق تاسىلدەردى ەنگىزۋگە ىنتالاندىرادى. سونىمەن قاتار كادر تاپشىلىعىن ازايتىپ, وڭىرلەردە, اۋىلدىق وكرۋگتەردە الەۋمەتتىك ماڭىزى بار جوبالارمەن جۇمىس ىستەۋگە جانە ەل مەن قوعامنىڭ دامۋىنا ءوز ۇلەستەرىن قوسۋعا ىقپال ەتەدى.
مەملەكەتتىك قىزمەتكە كونكۋرستىق ىرىكتەۋسىز تىكەلەي تاعايىندالۋ – تەك جاس ماماندارعا ەمەس, وسى جاڭالىقتى ەستىگەن جاس تۇلەكتەر مەن بولاشاق ماماندارعا دا ۇلكەن ىنتا, قىزىعۋشىلىق تۋدىراتىنىنا سەنىمدىمىن. مۇنى ەستىگەن ستۋدەنتتەر وقۋدى ۇزدىك اياقتاۋعا, ۇلگىلى ءتارتىپ كورسەتۋگە تىرىسادى, قاتارىنىڭ الدى بولۋعا ۇمتىلادى. مەملەكەت تاراپىنان بۇل – وتە ۇتىمدى شەشىم, ويلى قادام.
مەملەكەتتىك قىزمەتكە كونكۋرستىق ىرىكتەۋسىز تاعايىندالعان جاس مامان رەتىندە جاستاردىڭ وسى مۇمكىندىكتى دۇرىس پايدالانۋىن قالار ەدىم. مىسالى, ءوزىم مەملەكەتتىك قىزمەتكە كەلۋ ارقىلى كاسىبي-تۇلعالىق بولمىسىمدى جەتىلدىرىپ كەلەمىن. مەملەكەتتىك قىزمەت ماعان ەلدىك جانە قوعامدىق مۇددەلەرگە ءادىل جانە ادال قىزمەت ەتۋگە, ءوز كۇش-جىگەرىمدى, ءبىلىمىم مەن تاجىريبەمدى وتانىمىزدىڭ دامۋىنا جۇمساۋعا ۇيرەتۋدە. تۋعان جەرىمە كەلىپ, مويىنقۇم اۋدانى اكىمى اپپاراتىنىڭ باس مامانى بولۋ – مەن ءۇشىن ۇلكەن مارتەبە. وسىنداي جاڭاشىلدىق ارقىلى مول مۇمكىندىك سىيلاعان مەملەكەتكە العىسىم شەكسىز. سەبەبى بۇل باستاما مەملەكەتتىك قىزمەتتى ساپالى جاڭعىرتۋدىڭ نەگىزى بولارى ءسوزسىز.
ايحانىم سەرىكوۆا,
مويىنقۇم اۋدانى اكىمى اپپاراتى ۇيىمداستىرۋ-ينسپەكتورلىق ءبولىمىنىڭ باس مامانى
جامبىل وبلىسى
