اقتاۋ. 26 ءساۋىر. ماڭعىستاۋدا سايلاۋ قالىپتى وتۋدە. بۇل تۋرالى egemen.kz ءتىلشىسى حابارلادى.
ماڭعىستاۋ وبلىسىندا 177 سايلاۋ ۋچاسكەسى تۇرعىنداردىڭ داۋىسىن قابىلداۋدا. قاجەتتى ماتەريالدارمەن جانە جابدىقپەن قامتاماسىز ەتىلگەن داۋىس بەرۋ پۋنكتەرى جەرگىلىكتى ۋاقىتپەن تاڭەرتەڭگى ساعات 7.00-دە اشىلىپ, ءوز جۇمىستارىن باستادى.
اقتاۋ قالاسىنداعى 29 شاعىن اۋدانداعى مەكتەپتە ورنالاسقان №148 سايلاۋ ۋچاسكەسىنىڭ اۋلاسى انمەن تەربەلىپ, مەرەكەلىك كوڭىل-كۇيگە ەنگەن. داۋىس بەرۋگە اسىققان جۇرت جان-جاقتان اعىلۋدا – اراسىندا بالداعىنا سۇيەنگەن قارت تا, بالاسىن جەتەكتەگەن جاس وتباسىلىق جۇپتار مەن جاستار دا بار.
«ەڭ ءبىرىنشى سايلاۋشى 1949 جىلى تۋىلعان اتاەۆ قۇنانباي دەگەن ازامات تاڭەرتەڭگى ساعات 5.45-تە كەلىپ وتىردى. ەلىمىزدىڭ انۇرانىمەن سالتاناتتى جاعدايدا باستالعان سايلاۋدا العاشقى كەلگەن ادامعا جانە ەڭ العاش داۋىس بەرۋشى ءامىرباي زامانبەككە, سونداي-اق, ۇلى ساعىنباەۆ ماحمۋت ەرتىپ كەلگەن 1926 جىلى تۋىلعان ەڭ قارت سايلاۋشى اتامىزعا دەمەۋشىلەر كومەگىمەن سىيلىقتار تابىستالدى», – دەيدى سايلاۋ ۋچاسكەسىنىڭ باسشىسى ر.اياشقىزى.
ەكى ساعات ىشىندە اتالعان ۋچاسكەگە تىركەلگەن 2 751 ادامنىڭ 400-دەن استامى داۋىس بەرىپتى.
«سايلاۋ باستالىسىمەن وسىندامىن. ەشقانداي زاڭ بۇزۋشىلىق, وعاش وقيعالار ورىن العان جوق», – دەيدى سايلاۋ ءوتۋىنىڭ زاڭدىلىقتارىن بايقاۋشى «كاسپي» قوعامدىق كوميسسياسىنىڭ وكىلى ءالي سارسەنباەۆ.
گۇلايىم شىنتەمىرقىزى.
دەرەك, سۋرەت: egemen.kz.
