قاراعاندىدا سۋ باسقان اۋىل جۇرتىنىڭ 90 پايىزى سايلاۋعا كەلەدى (فوتو)

قاراعاندى. 26 ءساۋىر. قاراعاندى وبلىسىنداعى تاسقىن سۋدىڭ زاردابىن شەككەن عابيدەن مۇستافين (بۇرىنعى توكارەۆكا) اۋىلىندا تۇراتىن سايلاۋشىلاردىڭ 90 پايىزى سايلاۋعا قاتىسادى, دەپ كۇتىلىپ وتىر. بۇل تۋرالى Today.kz حابارلادى. ەلدى مەكەندەگى سايلاۋ ۋچاسكەسى وسىنداعى ورتا مەكتەپتىڭ عيماراتىندا ورنالاسقان. بۇل جەردە تاڭ ازاننان كەلۋشىلەردىڭ قاراسى كوپ. ءتىپتى داۋىس بەرۋ مەرزىمى باستالماي تۇرىپ-اق سايلاۋ ۋچاسكەسى ەسىگىنىڭ الدىندە كەزەك قۇرالىپ قالعان. كەنت تۇرعىندارىنىڭ العاشقى ءجۇز شاقتى ادامنان تۇراتىن لەگى ءبىرىنشى ساعاتتىڭ وزىندە داۋىس بەرىپ ۇلگەردى. اۋىلداعى №271 سايلاۋ ۋچاسكەسىنىڭ توراعاسى عانيات ءابىلدينوۆتىڭ ايتۋىنشا, مۇنداي بەلسەندىلىكتىڭ ءبىر عانا سەبەبى بار: اۋىل تۇرعىندارى بۇرىننان وسىلاي جوعارى ازاماتتىق بەلسەندىلىك كورسەتىپ كەلەدى. «مۇنداعى جۇرت بۇرىننان بەلسەندى بولاتىن. ال ەلىمىزدىڭ پرەزيدەنتىن سايلاۋ ءتارىزدى اسا ماڭىزدى سايلاۋعا ەلدى مەكەن تۇرعىندارىنىڭ ەشبىرى بەيجاي قاراي المايدى. ونىڭ ۇستىنە, بيىل كەنەتتەن ورىن العان سۋ تاسقىنى سەكىلدى ستيحيالى اپاتتان كەيىن بيلىكتىڭ وزدەرىنە قانشالىقتى وراسان زور كولەمدە جاردەم بەرىپ جاتقانىن ولاردىڭ بارلىعى دا جاقسى سەزىنىپ وتىر. ەندەشە, ەلىمىزدىڭ پرەزيدەنتى قايتا سايلانعالى جاتقان بۇگىنگى كۇنى سايلاۋ ۋچاسكەلەرىنە كەلىپ, ءوزىمىزدىڭ ءۇنىمىزدى بىلدىرۋگە ءبىزدىڭ ءبارىمىز دە اسا ىقىلاستىمىز. بۇل ءتىپتى ءبىزدىڭ ءجاي ازاماتتىق بورىشىمىز ورىنداۋىمىز عانا بولىپ تابىلادى. ءبىزدىڭ اۋىلدىڭ جۇرتى وسىنداي پىكىردى ۇستانىپ وتىر», - دەدى ول. ال كەنت تۇرعىنى سەرگەي گريششەنكو  بيىل ءوز ومىرىندە ءبىرىنشى رەت سايلاۋعا قاتىسقالى وتىر ەكەن. سوعان قاراماستان, سايلاۋعا كەلۋ نە كەلمەۋ تۋراسىندا كۇمانى بولماپتى. ول دا وسىنداي قىسىلتاياڭ كەزدە قامقور قولىن سوزعان مەملەكەتكە ءوزىنىڭ ريزاشىلىعىن بىلدىرەدى. «ءوزىنىڭ سايلاۋ جونىندەگى قۇقىعىن ورىنداۋ – ءاربىر سايلاۋشىنىڭ مىندەتتى قىزمەتى. سەبەبى, ورتاق ءۇيىمىز – قازاقستاننىڭ بولاشاعى ءبىزدىڭ ءبارىمىزدى دە تولعاندىرادى. سوندىقتان دا ءبىز ءۇشىن ەلىمىزدى كىم باسقارسا دا ءبارىبىر ەمەس. بىزگە ەلدى الدا دا تالاي اسۋلارعا باستايتىن ناعىز ليدەر كەرەك. ءبىز بيىلعى جىلى ءبىراز قيىندىقتارعا تاپ بولدىق. شىنىمدى ايتسام, مەن مەملەكەت وسى اپاتتان زارداپ شەككەندەرگە كومەكتەسەدى دەپ ويلماپپىن. ال بەرىلگەن جاردەمنەن كەيىن مەن ءوزىمنىڭ قانداي ەلدە تۇرىپ جاتقانىمدى تەرەڭ سەزىنە ءتۇستىم. وسىدان كەيىن ەلىمنىڭ بولاشاعى ءۇشىن داۋىس بەرۋگە ءتيىس ەكەنىمە ەش كۇمانىم قالمادى», - دەپ ويىن تارقاتىپ ايتتى ول. جەرگىلىكتى سايلاۋ كوميسسياسىنىڭ مالىمەتى بويىنشا, كەنتتە قازىر 1 539 ىقتيمال سايلاۋشى تۇرادى. الدىن الا جاسالعان بولجام بويىنشا بۇلاردىڭ كەمىندە 80-90 پايىزى سايلاۋعا قاتىسۋعا ءتيىس. ايقىن نەسىپباي. دەرەك, سۋرەت: Today.kz.