وتكەنىمىزگە كوز سالساق, ەلباسى نۇرسۇلتان نازارباەۆتىڭ كورەگەن ساياساتىنىڭ ارقاسىندا مەملەكەتىمىزدىڭ نىعايا تۇسۋىنە باعىتتالعان قۇقىقتىق زاڭنامالار مەن ءىس-شارالار قابىلدانىپ, ەل ەكونوميكاسى مەن الەۋمەتتىك جاعدايى تۇزەلىپ, قازاقستان الەم مەملەكەتتەرىنىڭ ورتاسىنان ءوز ورنىن ايقىندادى. بۇكىل الەمگە ءوزىنىڭ بىرتۇتاستىعىمەن, اجىراماس بىرلىگىمەن تانىلدى. قوعام دامۋىنىڭ جاڭا جولىن تاڭداپ, ۋاقىتتان تۋىنداعان ءارتۇرلى كەسەلدەردەن ايىعۋدى مىندەت ەتىپ قويدى. ول جول – پرەزيدەنتىمىزدىڭ باستاۋىمەن العا قويىلعان سىبايلاس جەمقورلىقپەن كۇرەس جولى.
قازاقستان حالقىنا جولداۋىندا ەلباسى نۇرسۇلتان نازارباەۆ «مەملەكەت پەن قوعام ءبىرتۇتاس مايدان قۇرىپ جەمقورلىققا قارسى شىعۋى ءتيىس. جەمقورلىق – جاي قۇقىق بۇزۋشىلىق ەمەس. ول مەملەكەتتىڭ تيىمدىلىگىنە دەگەن سەنىمدى سەتىنەتەدى جانە ۇلتتىق قاۋىپسىزدىككە تونگەن تىكەلەي قاتەر بولىپ تابىلادى», دەگەن بولاتىن. شىنىندا سىبايلاس جەمقورلىق قازاقستاننىڭ بارلىق تابىستارىنا قول جەتكىزۋگە مۇمكىندىك تۋعىزعان مەملەكەتىمىزدىڭ نەگىزگى قۇندىلىعى – تاۋەلسىزدىككە قاۋىپ توندىرەدى. بۇل باعىتتاعى جۇمىستاردى جانداندىرۋ ماقساتىندا ەلباسى 2015 – 2025 جىلدارعا ارنالعان سىبايلاس جەمقورلىققا قارسى ستراتەگيانى بەكىتتى. وتكەن جىلدىڭ سوڭىندا ەلباسىنىڭ «قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى» № 883 جارلىعى ناتيجەسىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى قۇرىلعان بولاتىن. وسىدان كەيىن قارجى پوليتسياسىنىڭ اتقارىپ كەلگەن مىندەتتەرى ەكى ۆەدومستۆوعا ءبولىنىپ, كوررۋپتسياعا قارسى كۇرەس اگەنتتىگى ءوزىنىڭ جيىرما جىلدىق تاريحىنداعى تاعى ءبىر بەلەستەن ءوتتى.
ارينە, پرەزيدەنتتىڭ مەملەكەتتىك باسقارۋ قۇرىلىمىنداعى وزىندىك ورنى بولعان ەكى ورگاندى قوسۋ جونىندەگى شەشىمىنە اسەر ەتكەن وبەكتيۆتى سەبەپتەر جوق دەۋگە بولماس. بۇل جەردە ەڭ باستىسى – قازىرگى تاڭدا سىبايلاس جەمقورلىققا قارسى كۇرەس باعىتىنا قوعامدى جۇمىلدىرۋ. ال بۇل باعىتتا قوعامدى جۇمىلدىرۋ ءۇشىن قوعامنىڭ ءتيىستى ورگانعا دەگەن سەنىمى نىعايۋى ءتيىس. مەنىڭ پىكىرىمشە, بۇرىنعى قارجى پوليتسياسىنىڭ سىبايلاس جەمقورلىققا قارسى كۇرەس سالاسىنداعى كاسىبيلىگى مەن مەملەكەتتىك قىزمەت ىستەرى اگەنتتىگىنىڭ ستيلىندەگى قوعاممەن سەنىمدى بايلانىسىن ۇشتاستىرۋ قاجەت بولدى. ياعني, جاڭا اگەنتتىكتە قۇقىق قورعاۋ ورگانىنىڭ مارتەبەسى ساقتالعانمەن, ونى ميليتاريزاتسيادان ساقتاۋ قاعيداتى كوزدەلدى. قازىرگى تاڭدا اگەنتتىكتىڭ قۇقىق قورعاۋ قىزمەتىن اتقاراتىن قىزمەتكەرلەردە اسكەري شەندەر الىنىپ تاستالدى.
سونداي-اق, جەكە قۇرامنىڭ قاتارى اكىمشىلىك مەملەكەتتىك قىزمەتشىلەرمەن تولىقتىرىلدى. ءبىزدىڭ قىزمەتكەرلەر ءۇشىن قىزمەت ەتۋ بارىسىندا ۇستانۋعا ءتيىس ارنايى ادەپتىلىك نورمالارى ازىرلەنىپ, بارلىق قىزمەتكەرلەر قاراپايىمدىلىقتى دارىپتەيتىن ەرەكشە مىندەتتى شەكتەۋلەردى قابىلدادى. وسىعان سايكەس مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتىندە ءبىراز وزگەرىستەر ورىن الدى. جۇمىس ساپالى, ناتيجەلى بولۋ ءۇشىن الدىمەن ءبىلىمدى, بىلىكتى ماماندار قاجەت. قىزمەتكەرلەردى ىرىكتەۋ وڭاي بولعان جوق.
دەپارتامەنت قاتارىنا ۇمىتكەرلەردى, ونىڭ ىشىندە تەك اكىمشىلىك مەملەكەتتىك لاۋازىمدارعا عانا ەمەس, قۇقىق قورعاۋ قىزمەتىن جۇزەگە اسىراتىن لاۋازىمدارعا دا ىرىكتەۋ كەزىندە تاۋەلسىز باقىلاۋشىلاردى شاقىرتىپ, جاريالىلىقپەن, شىنشىلدىقپەن وتكىزۋگە بارىمىزدى سالدىق. الداعى ۋاقىتتا جۇمىس سىبايلاس جەمقورلىقتىڭ ناتيجەسىمەن عانا ەمەس, ونىڭ الدىن الۋىنا باعىتتالاتىن بولادى. ياعني, سىبايلاس جەمقورلىقتىڭ الدىن الۋ باعىتىنداعى جۇمىستاردىڭ باسىم بولىگىن دەپارتامەنت قۇرامىنداعى سىبايلاس جەمقورلىققا قارسى وقىتۋ جانە قوعاممەن ءوزارا ارەكەتتەسۋ قۇرىلىمدىق ءبولىمى ارقىلى 9 باعىتتا جۇزەگە اسىرىلماق. ولاردىڭ ەڭ نەگىزگىسى سىبايلاس جەمقورلىققا قارسى وقىتۋ جۇمىستارى جانە مەملەكەتتىك ورگانداردا جانە ۇيىمداردا جەمقورلىقتىڭ الدىن الۋ بويىنشا شارالار قابىلداتۋ باعىتىنداعى جۇمىس. قوعامدى دەندەگەن, جەڭ ۇشىنان جالعاسقان پاراقورلىقپەن كۇرەسۋدى جالعىز قۇقىق قورعاۋ ورگاندارىنا جۇكتەپ قويۋعا بولمايدى. بۇل دەرتپەن ءسىز بولىپ, ءبىز بولىپ قارسى تۇرۋىمىز قاجەت.
ماقسات قوجاباەۆ,
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنت باسشىسى.
جامبىل وبلىسى.
