استانادا بۇگىن تۋعان كۇنى بولعان سايلاۋشىعا سىيلىقتار بەرىلدى

استانا. 26 ءساۋىر. استانا مەديتسينالىق ۋنيۆەرسيتەتىندەگى №108 سايلاۋ ۋچاسكەسىندە بۇگىن تۋعان كۇنى بولعان سايلاۋشىعا سىيلىقتار تارتۋ ەتىلدى. بۇل تۋرالى «قازاقپارات» حابارلادى. كۇتپەگەن جەردەن قۇرمەتكە يە بولعان نۇرسۇلۋ وسپانوۆا بيىلعى تۋعان كۇنى ومىرىندەگى ەڭ ەرەكشە بولعانىن ايتتى. «سايلاۋدىڭ تۋعان كۇنىممەن قاتار كەلگەنىنە قۋانىشتىمىن. بۇگىنگى سايلاۋدا بارشامىز دۇرىس تاڭداۋ جاسايمىز دەپ سەنەمىن. بۇل تاڭداۋ –جارقىن بولاشاعىمىز ءۇشىن جاسالعان يگى قادام بولماق», – دەيدى نۇرسۇلۋ وسپانوۆا. ايتا كەتەيىك, №108 سايلاۋ ۋچاسكەسىنە سايلاۋشىلار وتە كوپ جينالۋدا. ۋچاسكە توراعاسى ايتبەك كارىبجانوۆتىڭ ايتۋىنشا, اتالعان ۋچاسكەگە 2 941 سايلاۋشى تىركەلگەن. تاڭەرتەڭنەن بەرى سولاردىڭ 600-دەن استامى داۋىس بەرىپ ۇلگەرگەن. «وزدەرىڭىز كورىپ تۇرعانداي, بيىل سايلاۋشىلاردىڭ ازاماتتىق بەلسەندىلىگى وتە جوعارى. داۋىس بەرۋشىلەردىڭ كوپشىلىگى جاستار. ولار بۇل ساياسي ناۋقانعا اسقان جاۋاپكەرشىلىكپەن قاراپ, ءوز تاڭداۋلارىن جاساۋدا», – دەدى ايتبەك كارىبجانوۆ. ەلامان قوڭىر. دەرەك: «قازاقپارات». سۋرەت: kazakia.kz.