فريستايلشى يۋليا گالىشەۆا – الەمدە ءۇشىنشى!

كەشە, 19 قاڭتار كۇنى قازاقستاندىق يۋليا گالى­­­شەۆا اۆستريانىڭ كرايشبەر قالاسىندا ءوتىپ جاتقان فريستايلدان الەم چەمپيوناتىندا جۇپتى موگۋل سايىسىندا قولا جۇلدەگە قول جەتكىزدى. جارىستىڭ بۇل ءتۇرى بويىنشا ءبىرىنشى ورىندى امەريكالىق حاننا كيرني جەڭىپ السا, ەكىنشى ناتيجەنى كانادالىق جيۋستين ديۋفۋر-لاپۋانت كورسەتتى. ال كىشى فينالدا يۋليا كەلەسى كانادالىق ءۇش اپالى-سىڭلىلەردىڭ ءبىرى – كلوە ديۋفۋر-لاپۋانتتان باسىم ءتۇسىپ, اقتىق سىنعا جولداما العان بولاتىن. بۇدان ءبىر كۇن عانا بۇرىن يۋليا موگۋل سايىسىندا بەسىنشى ناتيجە كورسەتكەن ەدى. وندا جيۋستين ديۋفۋر-لا­­­پۋانت ءبىرىنشى بولسا, حاننا كيرني – ەكىنشى, ال اۆسترا­ليالىق بريتتەني كوكس ءۇشىنشى تۇعىرعا كوتەرىلگەن ەدى. قالاي دەگەندە دە, يۋليا­نىڭ الەم چەمپيوناتىندا ءۇشىنشى ورىنعا تابان تىرەۋى – ۇلكەن جەتىستىك. بىلتىر سوچي قىسقى وليمپيا ويىندارىندا تورەشى­­­لەردىڭ دۇرىس باعالاماۋىنان جۇلدە­گەرلەر قاتارىنا ىلىكپەي قالعان ونىڭ ادىلەتسىزدىككە قاپالانىپ, سپورتپەن قوشتاسقىسى كەل­گەنىنەن دە حاباردارمىز. دەگەنمەن, جاڭا ماۋسىم جەت­كەندە ءوزىن ءوزى جەڭە ءبىلىپ, جاتتىعۋىن قايتا جالعاس­تىردى. بىراق وزىنە سپورت اگەنت­تىگىنىڭ قىزمەتىن كورسەتكەننەن باسقاعا شاماسى جوق جەكە جاتتىقتىرۋشىسى ەلەنا كرۋگلىحينادان باس تارتۋىنا تۋرا كەلدى. ول مىنا جارىسقا دا سىرت جاقتىڭ دەمەۋشىلىك ەتۋىمەن بارعان ەكەن. وسكەمەندە 1992 جىلعى 23 قازاندا تۋعان يۋليا 2006 جىلدان بەرى حالىقارالىق جارىستارعا قاتىسىپ كەلەدى. ول 2008 جىلعى اقپاندا نەمىستىڭ شليرزە قالاسىندا وتكەن الەم كۋبوگىندا جۇپتى موگۋلدا كۇمىس جۇلدە السا, بىرنەشە كۇننەن كەيىن شۆەدتىڭ ەنگەلبەرگ كەنتىندە موگۋل مەن جۇپتى موگۋلدىڭ ەكەۋىندە دە التىن جۇلدەگەر اتاندى. 2011 جىلى الماتىدا وتكەن ازيا ويىندارىندا دا موگۋلدان التىن مەدال جەڭىپ الدى. وتكەن جىلعى 13 جەلتوقساندا ءفيننىڭ رۋكا شاھارىندا وي­­نالعان الەم كۋبوگىندا سپورت­شى قىز جۇپتى موگۋلدا الدى­نا جان سالمادى. رۋسلان يگىلىك.